Al-Hilal Benzema sonrası Watkins hədəfləyir
Al-Hilal yay “pəncərə”si açılmamış, artıq Karim Benzema ilə vidalaşma planını işə salıb. Klubun baş məşqçisi Inzaghi növbəti mövsümdə hücum xəttinin lideri kimi bir adı digərlərindən ayırıb – Aston Villa forvardı Ollie Watkins.
MaxiFoot-un məlumatına görə, Səudiyyə nəhəngi 38 yaşlı fransız ulduzla yolları ayıraraq komandaya yeni nəfəs gətirmək istəyir. Amma planın bir şərti var və o da hamını saxlayıb: Benzemanın müqavilə məsələsi.
Benzema divarı: son ilin pulu olmadan razılıq yoxdur
2022-ci ilin Ballon d'Or qalibi müqaviləsinin son ilinə görə tam ödəniş tələb edir. O, yalnız bu məbləğ təmin olunduqdan sonra qarşılıqlı razılaşma ilə müqavilənin ləğvinə “hə” deməyə hazırdır.
Məhz bu maliyyə tələbı hazırda Benzema ilə Al-Hilal rəhbərliyi arasında danışıqları dalana dirəyib. Klub Watkins üçün irəli atılmaq istəyir, amma fransız forvardın müqaviləsi hələ də masanın üstündədir və hər şeyi kilidləyir.
Qələbə, qol və narazı ulduz
Gərginlik açıq-aşkar artıq meydançaya da çıxıb. Al-Hilal-ın cümə axşamı Al Faisaly üzərində 4:2 hesablı qələbəsində Benzema qol vurdu, amma sonrakı səhnə daha çox danışıldı.
Matçın bitməsinə təxminən 20 dəqiqə qalmış o, gənc Kader Meite ilə əvəzləndi. Fransız ulduzun narazılığı gizlənmədi, jestləri və bədən dili hər şeyi deyirdi. Skor tabelində adı olsa da, üzündə məmnunluq yox idi.
Inzaghi isə oyundan sonra alovu söndürməyə çalışdı:
“Bu barədə matçdan sonra danışdıq. Onun hər oyunda oynamaq istəməsi normaldır, mən onu başa düşürəm, çünki özüm də hücumçu olmuşam. Həmin anda bizim üçün başqa bir gənc oyunçu, Kader Meite, mövcud idi, o, klubun gələcəyini təmsil edir. Matçdan sonra Karimlə zarafatlaşdım, aramızda hörmətə əsaslanan münasibət var. O, təkcə böyük çempion deyil, həm də çox böyük peşəkardır”.
Sözlər yumşaq idi, amma kulislərdə qərar daha sərtdir.
Kvota və yaş faktoru: klub sərt xətt çəkir
Eyni mənbənin məlumatına görə, Al-Hilal rəhbərliyi Benzemanın müqaviləsini ləğv etməkdə qərarlılıq göstərir. Səbəb yalnız idman deyil. Səudiyyə Ərəbistanı çempionatında legioner limiti sərt şəkildə tətbiq olunur və hər seçim ağır çəkir.
Klub rəhbərliyi növbəti mövsümdən əvvəl komandanın ümumi yaş həddini aşağı salmaq istəyir. AS yazır ki, Inzaghi 30 yaşlı Ollie Watkins-i bu planın mərkəzinə yerləşdirib. İngiltərə hücumçusu Aston Villa forması ilə 2025–26 mövsümündə 55 oyunda 21 qol vurub və italiyalı mütəxəssis üçün ideal profil kimi görünür: işlək, dinamik, məhsuldar.
Watkins planı: hər şey Benzemadan asılıdır
Hazırkı vəziyyətdə bütün ssenari bir şərtdən asılıdır: Benzema ilə maliyyə anlaşması.
Fransız ulduz legioner kvotasında yer tutduğu müddətdə Al-Hilal Watkins üçün rəsmi addım ata bilmir. Klub yeni hücumçunu gətirmək üçün əvvəlcə həmin yeri boşaltmalıdır. Bu da yalnız bir yolla mümkündür – müqavilənin qarşılıqlı ləğvi və ya şərtlərə uyğun maliyyə anlaşması.
Əgər Benzema təzminat paketi ilə razılaşsa, Al-Hilal Watkins üçün danışıqları dərhal sürətləndirməyə hazırdır. Plan masanın üstündədir, hədəf müəyyən edilib, vaxt isə getdikcə daralır.
Hələlik isə keçmiş Real Madrid kapitanı rəsmi olaraq Al-Hilal futbolçusudur. Amma həm meydandakı jestləri, həm də klubun transfer hədəfləri bir sualı önə çıxarır: bu yay Səudiyyə macərasının son səhifəsi çevrilmək üzrədir, yoxsa Benzema daha bir mövsümə meydan oxuyacaq?
