Alba Redondonun Madrid macərası: Juventusda yeni başlanğıc
Real Madrid ilə Juventus nəhayət ki, Alba Redondonun gələcəyi mövzusunu bağladı. Uzun-uzadı şayiələr, sızmalar, ehtimallar… və yekunda cəmi 150 min avro. Rəqəm kiçikdir, mesaj isə aydındır: Madrid macərası iflasla başa çatdı.
29 yaşlı ispaniyalı yarımmüdafiəçi bir il daha müqavilə altında qala bilərdi. Qalmadı. Qalmaq istəmədi. Çünki Madrid ona meydan vermədi, o isə tribunada oturub Dünya Çempionatı üçün İspaniya yığmasındakı yerini riskə atmaq niyyətində deyildi.
Bernabeudan qorxu ilə çıxış
"AS" nəşrinin məlumatına görə, Juventus bu 150 min avroluq məbləği Real Madrid-ə ödəyəcək və bununla da Redondonun müqaviləsinin son ili erkən bağlanacaq. Kağız üzərində sadə transferdir. Kulis arxasında isə bu, iki mövsümlük məyusluğun nəticəsidir.
Redondo 2024-cü ildə Levante-dən gələndə, İspaniya qadınlar liqasının ən məhsuldar hücumçularından biri kimi təqdim olunurdu. Gələndə gözləntilər böyük idi, xüsusən də qol instinkti və hücum xəttində çevikliyi ilə. Real Madrid isə ona nə ritm verdi, nə də liderlik rolu.
Santiago Bernabeuda keçən iki mövsüm onu parlatmadı, əksinə, kölgədə saxladı. O, nə əsas heyətin dəyişməz üzü oldu, nə də oyunun taleyini həll edən futbolçuya çevrildi. Hər həftə ehtiyat oyunçular skamyasında keçən dəqiqələr, hər qaçırılan fürsət bir sualı böyüdürdü: belə davam etsə, Dünya Çempionatı qatarını əldən verəcəkmi?
Qorxu burada qərar verdi. O, meydanda olmaq istəyirdi, televizorda yox.
Uğursuzluqdan qaçış, Calcio-ya sığınma
Real Madrid-dəki dövrü, gələndəki imicinə baxanda, açıq-aşkar gözləntilərin altında qaldı. Hücum xəttindəki rəqabət, taktiki seçimlər, bəlkə də uyğunlaşma problemi – səbəblər çox ola bilər, amma nəticə dəyişmir: klubun onu gətirərkən xəyal etdiyi lider obrazı heç vaxt reallığa çevrilmədi.
Məhz buna görə o, çıxış yolunu İtaliyada gördü. Calcio yeni başlanğıc, yeni ritm, yeni məsuliyyət deməkdir. Juventus isə bu rolu ona verməyə hazır görünür.
Juventusun iddialı planı
Turin klubu qadın futbolunda yenidən köhnə ihtişamını qaytarmaq istəyir. İspaniyalı baş məşqçi Guerrero-nun rəhbərliyi altında qurulan layihə təkcə söz üzərində ambisiyalı deyil, transfer bazarında da bunu göstərir.
Bu yay təkcə Alba Redondo gəlmir. Klub artıq Cyla və Khelifi ilə güclənib, üstəlik, onun həmyerlisi Julia Bartel də heyətə qatılıb. Bu adlar təsadüfi yığma deyil, düşünülmüş planın hissələridir. Juventus qadın komandası yenidən ön sıralara qayıtmaq, İtaliyada və Avropada söz sahibi olmaq üçün hücuma keçir.
Redondo üçün bu transfer yalnız klub dəyişikliyi deyil. Bu, karyerasının növbəti imtahanıdır. Levante-dəki parlaq illər təsadüf deyildisə, bunu indi, Turində sübut etməlidir.
Real Madrid-də alınmayan liderlik rolu, bəlkə də, Juventusda onu gözləyir. Sual indi budur: qorxunun başladığı bu yol, nəhayət, onun üçün azadlığa və yenidən zirvəyə qayıdışa çevriləcəkmi?
