Alejandro Balde-nin Barcelona-dakı İmtahanı

Alejandro Balde üçün “Barcelona”da hesab dövrü başlayır. Yayda gedə bilmədi, indi isə öz gələcəyini özü yazmalı olacaq.

Flick-in səbr zonası

Yay transfer pəncərəsi boyu klub onun üçün yeni komanda axtardı. “Manchester United” adı ciddi şəkildə gündəmdə idi, amma danışıqlar heç yerə çıxmadı. Nəticə aydındır: 22 yaşlı sol cinah müdafiəçisi Camp Nou-da qaldı və indi Hansi Flick-in yanvar sonrası planlarına düşüb-düşməyəcəyinə bu dörd ay qərar verəcək.

Məsələ təkcə dəqiqələrdə deyil. SPORT-un məlumatına görə, Flick artıq açıq şəkildə göstərib ki, Balde-dən daha çox şey gözləyir. Bu isə o deməkdir ki, gənc müdafiəçi yalnız meydanda yer qazanmağa çalışmır, həm də məşqçilər qərargahında özünə olan etimadı bərpa etməyə məcburdur.

Gənc “La Masia” yetirməsi üçün bu, sadəcə rotasiya mübarizəsi deyil. Bu, “etibarlı oyunçu” statusunu geri alma savaşıdır.

Dörd aylıq imtahan

Növbəti aylar Balde üçün açıq imtahandır. O, yaxşı bilir ki, Flick ondan nə tələb edir və həmin səviyyəni ilk növbədə məşqlərdə göstərməlidir. Çünki hazırda sol cinahda Xavi Espart və Joao Cancelo ondan öndə görünür. Bu sıralamanı dəyişmək asan olmayacaq.

Balde isə fürsətin fərqindədir. Yayda qapı üzünə kimi açıq idi, o isə o qapıdan keçmədi. İndi başqa bir qapı var – start heyətinə gedən yol. Oradan keçə bilsə, qışda onun adı satış siyahısında yox, Flick-in əsas planlarında olacaq.

Klubun hesabı: meydan, yoxsa pul?

“Barcelona” rəhbərliyi də öz tərəzisinin qarşısındadır. Balde hələ də bazarda dəyərli aktiv sayılır. Onun transfer qiyməti təxminən 30-40 milyon avro civarında qiymətləndirilir. Əgər vəziyyət dəyişməsə və o, yanvarda ayrılsa, klub bu məbləği istifadə edib mövqeyə daha tipik sol cinah müdafiəçisi gətirməyi sürətləndirə bilər.

Məhz burada Jorge Salinas adı yenidən gündəmə gəlir. Klub onu sol cinah üçün əsas namizədlərdən biri kimi görür. Lakin Racing Santander gənc müdafiəçinin buraxılış məbləğini artırmaq qərarı ilə işləri çətinləşdirib. Bu addım potensial transferi həm mürəkkəbləşdirir, həm də xərci yuxarı çəkə bilər.

Yəni, əgər Balde gedərsə, Salinas daha baha başa gələ bilər. “Barcelona” üçün bu, həm meydandakı performans, həm də maliyyə hesablaması arasında incə balansdır.

Top Balde-nin ayağındadır

Hazırda “Blauqrana”nın vaxtı var. Yanvara qədər tələsik qərar verməyə məcbur deyillər. Bu da hər iki tərəf üçün ən rahat ssenaridir: klub gözləyir, oyunçu özünü sübut etməyə çalışır.

Balde-nin üstünlükləri hələ də yerindədir: yaşı, fiziki gücü, bazar dəyəri. Amma ən önəmlisi – qərarı indi özü verəcək. Çünki “Barcelona”nın ehtiyacı olan yeganə şey var: real oyun performansı.

Bu dörd ayda ya Flick-in gözündə yenidən əsas fiqura çevriləcək, ya da Camp Nou-dan çıxan növbəti böyük satışa.