Alvarez üçün Barcelona bəndi: 20 qolla açılan qapı
Yay pəncərəsinin ən gurultulu hekayələrindən biri idi. Alvarez bütün başlıqları tutdu, “Barcelona”ya keçid üçün hər şeyi sanki zorlayırdı, amma sonda heç nə alınmadı. Argentina hücumçusu istəmədən də olsa Madridə bağlı qaldı və bu, “Atletico Madrid”lə münasibətləri xeyli gərginləşdirdi.
Diego Simeone isə onu silmədi. Əksinə, planlarında saxladı. Alvarez bu mövsüm artıq üç oyunda meydanda görünüb, “Liverpool”a qarşı matçda isə tam 90 dəqiqə oynayıb. Yəni soyuma otağında hava soyuq ola bilər, amma meydanda ona hələ də etibar var.
Bu yay “Barcelona”nın planı sadə idi: Alvarez-i almaq. Reallıq isə çox sərt oldu. “Atletico Madrid” klubun mövqeyini bir cümlə ilə izah etdi – 500 milyon avroluq sərbəstqalma bəndi. Katalon klubunun maliyyə imkanları bu məbləğin yanına belə yaxın düşməyə icazə vermədi və danışıqlar faktiki olaraq oradaca dayandı.
İndi isə İspaniyada xəbərlər dəyişən havadan danışır. “El Chiringuito”nun məlumatına görə, “Atletico Madrid” nəhayət yumşalmağa başlayıb. Klub prezidenti Gil Marin daxildə bir vəd verib: Alvarez-in astronomik sərbəstqalma bəndi azaldılacaq, amma bir şərtlə.
Şərt meydandadır. Hücumçu bu mövsüm bütün turnirlər üzrə ən azı 20 qol vurmalıdır. O bunu bacarsa, bənd endiriləcək. Yəni gələcək transfer üçün kilid nöqtə artıq rəqəmlə ölçülür.
Bu hədəf kağız üzərində əlçatmaz görünmür. Madrid karyerası bunun sübutudur. Alvarez ötən mövsüm məhz 20 qola imza atmışdı. Klubdakı ilk mövsümündə isə 29 dəfə fərqlənmişdi. İndi yenidən həmin planı təkrarlamaq həm özünü təsdiq, həm də çıxış qapısını açmaq anlamına gəlir.
Hazırda “Barcelona” bu hekayəyə kənardan baxan kimi görünə bilər. Mövsümə möhtəşəm start veriblər, hücum xətti alov içindədir. Raphinha və Lamine Yamal sayəsində Avropanın ən məhsuldar komandalarından birinə çevriliblər. Qapılar sanki hər həftə daha da böyüyür.
Amma uzun mövsüm heç vaxt yalnız ilk aylarla ölçülmür. Temp düşür, yorğunluq gəlir, zədələr qapını döyür. Hücum xəttində bu qədər yüklənmiş iki cinah oyunçusuna arxa cəbhədən dəstək lazımdır. Alvarez səviyyəsində, müxtəlif mövqelərdə oynaya bilən bir hücumçu heyətə daxil olsa, yük paylaşılar, risk azalardı.
Bir zədə kifayətdir ki, Raphinha və ya Yamal-dan biri sıradan çıxsın və “Barcelona”nın qol ritmi anidən pozulsun. Buna görə hücum xəttinə əlavə oyunçu gətirmək klub üçün sadəcə lüks deyil, uzunmüddətli strategiyanın məntiqli hissəsidir – istər qışda olsun, istərsə də gələn yay.
Ancaq qışda sensasion keçid gözləmək real deyil. Sərbəstqalma bəndinin azaldılması yalnız bir şərtə bağlıdır və bu şərt mövsümün sonunda ölçüləcək. Alvarez 20 qola çatmasa, “Atletico Madrid” üçün heç nə dəyişməyəcək. Bu isə o deməkdir ki, Kataloniyanın ümidləri əsasən yay pəncərəsinə yönələcək.
İndiki halda top tamamilə Alvarez-in ayağındadır. O, Simeone-nin komandası üçün qollarını vurmalı, eyni zamanda öz azadlıq planını meydanda yazmalıdır. 20 qol – nə az, nə çox, növbəti yay “Camp Nou” istiqamətində açılan qapının şifresi məhz bu rəqəmdə gizlənib.
