Ançelottinin Dünya Kubokundakı Acı Etirafı
Carlo Ançelotti Braziliya millisinin 2026 Dünya Kubokundan niyə bu qədər erkən çıxdığını artıq dəqiq bilir. Onun fikrincə, cavab nə taktiki lövhədə, nə də məşq planlarında gizlənib. Cavab bir neçə dəqiqəlik su fasiləsindədir.
Norveçə 1:2 hesablı məğlubiyyət, 1/8 finalda vidalaşma və 2002-dən bəri davam edən dünya çempionluğu həsrəti.
Braziliyada bu nəticəni izah etmək üçün min cür nəzəriyyə dolaşır, amma Ançelotti barmağını bir anın üzərinə qoyur: ikinci hissədəki o qısa dayanma.
“Oyunun axınını yanlış oxudum”
İtalyan mütəxəssis açıq danışır. O, etiraf edir ki, məhz su fasiləsində oyunun ritmini səhv qiymətləndirib və bunun ardınca verdiyi qərarlar Braziliyanın taleyini dəyişib.
Ançelotti “ESPN”ə açıqlamasında əvvəlcə ilyarımlıq layihəni müdafiə edir, sonra isə bir anın hər şeyi necə alt-üst etdiyini yada salır:
“Ümumilikdə, bir il ərzində görülən işin əla olduğunu düşünürəm. Logistika baxımından milli komanda otel, stadion, məşq bazası – hər şeydə çox yaxşı təşkil olunmuşdu. İlin gedişində futbolçuların çıxışı da müsbət idi. Çağırılan 26 futbolçunun orada olmağa ən uyğun adlar olduğunu hesab edirəm”.
Sonra səs tonunu dəyişir, söhbət planların dağılmasına gəlir:
“Keçən il çəkdiyimiz plan zədələrə görə bir az dəyişdi. Martla Dünya Kuboku arasındakı dövrdə çox zədə aldıq: Militão, sonra Rodrygo, sonra Estêvão, Wesley Dünya Kubokundan əvvəl, turnir zamanı isə Raphinha zədələndi. Plan bir az başqa cür oldu”.
Bu fonun içində isə Ançelottinin yaddaşına həkk olunan o an dayanır:
“Düşünürəm ki, Dünya Kubokunu Norveçə qarşı su fasiləsində uduzduq. Niyə? Çünki həmin ana qədər oyunun axını tam bizim nəzarətimizdə idi”.
Top Norveçdə idi, nəzarət Braziliyada
Rəqibin üstünlüyü kağız üzərində başqa cür görünürdü. Norveç topa daha çox sahib olurdu, amma İtalyan məşqçi bunun aldadıcı olduğunu deyir:
“Doğrudur, Norveç topa sahib idi, özü də çox vaxt öz yarımmeydanlarında… Onlar İngiltərəyə qarşı da eyni cür oynadılar. Oyuna nəzarət etdilər, amma sonda İngiltərəni də uda bilərdilər”.
Ançelotti həmin fasilədə beynində yaranan yanlış siqnalı indi aydın görür. O anda elə zənn edib ki, komanda oyuna nəzarəti itirir. Elə bu hiss də onu dəyişikliklərə sövq edib. Ardınca isə səhnəyə Erling Haaland çıxıb.
“Bəlkə də səhvim elə burada oldu – komandanın oyuna nəzarəti itirdiyini düşündüm, halbuki belə deyildi. Heyətdə bəzi dəyişikliklər etdim, sonra Haalandın qolu problemi yarandı. Dünya Kubokunda sənə ikinci hissənin otuzuncu dəqiqəsində qol vururlarsa, toparlanmaq çox çətindir. Yenə də, bərpa etmək üçün imkanımız var idi”.
Neymar qərarı: tənqid yağışı, peşmanlıq yox
Ən çox mübahisə doğuran məqam isə oyunun sonlarına yaxın Neymarın meydana buraxılması oldu. Braziliyada bu dəyişiklik “komandanın balansını pozan” addım kimi qələmə verildi. Ançelotti isə bu fikirlə razı deyil və geri addım atmır.
Keçmiş “Real Madrid” baş məşqçisi o anı belə izah edir:
“Xeyr, Neymarın həmin anda meydana çıxması ilə bağlı peşman deyiləm. Mən Ryanı çıxarıb Endricki sağ cinahda oynatdım, düşünürdüm ki, Neymar o anda – 70-ci dəqiqədə – qol yarada, fərdi ustalığını göstərə bilər. Yaponiyaya qarşı da bunu etmək istəyirdim”.
Yaponiya oyunu da Ançelottinin yaddaşındadır. O görüşdə ssenari tamam fərqli idi:
“Bəs niyə Yaponiyaya qarşı Gabriel Martinellini meydana buraxdım? Çünki komanda oyuna tam nəzarət edirdi. Yaponiya yalnız əks-hücumlara güvənirdi. Məqsəd qol vurmaq deyildi, Neymarı Yaponiyaya qarşı əlavə vaxtda oyuna salmağı düşünürdüm”.
Norveçə qarşı isə gərginlik fərqli idi. İtalyan mütəxəssis bu dəfə riskə daha tez getdiyini boynuna alır:
“Neymarı oyuna bir az tez buraxdım ki, oyuna nəzarəti yenidən ələ keçirək. Həm də qərar vermək məcburiyyətində qaldığın anları düşünməlisən… (Thomas) Tuchelin ağır tənqidlər aldığını dediyini eşitdim, həqiqət budur ki, çox çətin qərarlar verməli olursan. Bu, gərginliyin pik həddə çatdığı andır və sən həmişə düzünü tapa bilmirsən”.
“Gəlməli idi – və gəldi”
Ançelotti bütün təzyiqə baxmayaraq, Neymar qərarının arxasında durur. Onun üçün bu, sadəcə ulduz futbolçunun adından doğan məcburiyyət deyildi, meydandakı hazırlığa verilən qiymət idi:
“Düşünürəm ki, Neymar oyuna daxil olmalı idi, həmin anda meydana gəlməli idi. Çünki yaxşı çıxış edirdi, yaxşı məşq edir, yaxşı hazırlaşmışdı. Onun idman ruhu xoşuma gəldi. Komandaya kömək etdiyini düşünürəm. Amma o oyuna girəndə komandanın strukturunu dəyişməyə ehtiyac yox idi”.
Braziliya üçün bu Dünya Kuboku indi artıq arxada qalan bir məyusluq, Ançelotti üçünsə saniyələrlə ölçülən bir peşə dərsidir. Sual isə açıq qalır: növbəti dəfə su fasiləsi gəldikdə, o eyni riskə yenə gedəcək, yoxsa bu dəfə saniyələrə yox, içgüdələrinə xəyanət etməyəcək?
