Arsenal 20 ildən sonra Çempionlar Liqasının finalına yüksəldi
Arsenal 20 ildən sonra ilk dəfə Çempionlar Liqasının finalına adladı. Emirates-dəki gecə isə sadəcə idman nəticəsi deyildi – bu, bir nəslin həsrətinin partlayışı idi.
Bukayo Saka-nın qolu London səmasını işıqlandıran fişənglərin rəsmi siqnalına çevrildi. Atletico Madrid-in səbrini sındıran həmin zərbə, yarımfinalın ikinci oyununda 1:0 hesablı qələbəni, ümumi hesabda isə 2:1-lik üstünlüyü rəsmiləşdirdi. Final fitindən dərhal sonra meydan doldu, Arteta futbolçularına qoşulub azarkeşlərlə birgə sevinc yaşadı, tribunalar isə uzun illərin gərginliyini bir anda boşaltdı.
Lakin bu coşqu hər kəsin xoşuna gəlmədi.
Rooney-nin sərt mesajı
Prime Video Sport studiyasında ekspert qismində çıxış edən Wayne Rooney həmin anları soyuq başla dəyərləndirdi və Arsenal-ın sevincini həddən artıq saydı. Manchester United və İngiltərə millisinin keçmiş ulduzu komandanın hələ heç nə qazanmadığını xatırlatdı:
“Bu mövqedə olmağı haqq edirlər, amma hələ qalib deyillər. Məncə, bu qədər çox sevinmək bir az artıqdır. Kuboku qazandığınız gün qeyd edin!”
Rooney-nin bu fikirləri sosial şəbəkələrdə dərhal alovlandı. Arsenal azarkeşləri özlərini hədəfə alınmış kimi hiss etdilər. Və tezliklə köhnə bir səs, klub tarixinin ən güclü simalarından biri bu mübahisəyə qoşuldu.
Ian Wright: “Bayram edin, bu anı qaçırmayın”
Keçmiş hücumçu Ian Wright, X platformasında paylaşdığı videoda, birbaşa azarkeşlərə müraciət etdi. Onun tonu aydın idi: bu uğuru kiçiltməyin, dadını çıxarın.
“Arsenal azarkeşləri, sizə bir söz deyim: bundan zövq alın,” – Wright videoda bildirdi. “Bayram polisləri hər yerdə olacaq, tutdurmayın özünüzü! Əylənin, futbol anlar üçündür və bu böyük andır. Zövq alın. Və ümid edək ki, finalda və finaldan sonra başqa bir nəhəng an yaşayacağıq. Bu, əla gündür, əla gündür!”
Wright azarkeşlərin hisslərinə səs verdi. İyirmi illik fasilədən sonra Çempionlar Liqasının finalına qayıdış – bu, təkcə idman nəticəsi deyil, həm də klubun özünü yenidən Avropa elitasına yazması deməkdir.
Wenger-in xəbərdarlığı: sevinc var, amma iş bitməyib
Emirates-dəki atmosferə münasibət bildirən başqa bir böyük ad da səhnəyə çıxdı – Arsene Wenger. Fransız mütəxəssis, beIN Sports-a danışarkən, sevincin tamamilə haqlı olduğunu dedi, amma dərhal arxasınca xəbərdarlıq tonunu da gizlətmədi.
“Oyundan sonra yaxşı qeyd edirlər – bu normaldır, amma indi onların finala və növbəti oyuna fokuslanmasını daha çox istəyərsiniz,” – Wenger vurğuladı. “Bu bayramı haqq ediblər, xoşbəxtlik tamamilə normaldır, amma növbəti addım finala gedib onu qazanmaqdır.”
Wenger-in sözləri Arsenal-ın mövsüm reallığını xatırladır: komanda təkcə Budapeşt finalına yox, eyni zamanda Premier League titul yarışına da köklənməlidir. Sevinmək olar, amma sərhədi keçmədən. Qalibiyyət hələ qabaqdadır.
Budapeştə gedən yol və köhnə yaralar
Arteta-nın komandası indi Avropa şöhrətindən cəmi 90 dəqiqə uzaqdadır. Rəqib hələ müəyyənləşməyib. Arsenal Budapeştə yollananda qarşısına ya Bayern Munich, ya da Paris Saint-Germain çıxacaq. Fransa çempionu cavab görüşü öncəsi Allianz Arena-ya 5:4-lük cüzi üstünlüklə gedir. Bu hesabın özü belə, finalın nə qədər açıq və partlayışa hazır ola biləcəyini göstərir.
Arsenal üçün bu, sadəcə yeni final deyil, köhnə xatirələrin də dirçəlişidir. Klub son dəfə 2005-06 mövsümündə Çempionlar Liqasının finalına yüksəlmiş, Parisdə Barcelona qarşısında 2:1 hesablı ağrılı məğlubiyyət yaşamışdı. O gecə hələ də bir çox azarkeşin yaddaşında sağalmamış yara kimi qalır.
İndi isə yeni nəsil üçün yeni səhnə hazırlanır. Saka-nın zərbəsi, Arteta-nın emosiyası, tribunaların alovu – bunların hamısı bir suala doğru yönəlir: bu dəfə Arsenal o son addımı ata biləcəkmi?
