Arsenal futbolçularının dünya çempionatında mübarizəsi
Premyer Liqanı qazanan və Çempionlar Liqasının finalına çıxan heyətə sahib olanda, dünya çempionatında komanda futbolçularının hər yerdə görünməsi qaçılmaz olur. Bu yay da elədir: Arsenal heyəti qitələrə səpələnib, azarkeşlər isə ekrana baxarkən həm qürur, həm də narahatlıq yaşayır.
İngiltərənin ürəyi: Rice və Saka
İngiltərə yığmasının heyətində dörd Arsenal oyunçusu var. Declan Rice, Eberechi Eze, Bukayo Saka və Noni Madueke bazar günü Azteca stadionunda Meksikoya qarşı 1/8 final matçına hazırlaşırlar.
Məsələnin mərkəzində isə Rice dayanır. O, uzun müddətdir davam edən arxa bud əzələsi problemi ilə oynamağa davam edir. Konqo DR üzərində 2:1 hesablı qələbədən sonra onun həmin nahiyəni buzla müalicə etməsi görüntüləndi və bu, şübhəsiz, Londonun şimalında siqnal kimi qəbul olundu. Rice özünü son həddə qədər sıxır, amma İngiltərə üçün meydanda olmalıdır. Komanda turnirdə irəliləsə, yarımmüdafiəçi daha iki həftə fasiləsiz yüksək tempdə oynaya bilər.
Oxşar vəziyyət Bukayo Saka üçün də keçərlidir. O, Axilles zədəsindən sonra hələ tam ritmini tapmağa çalışır və İngiltərənin baş məşqçisi Thomas Tuchel onun oyun vaxtını diqqətlə dozalaşdırır. Saka meydanda olduğu hər dəqiqədə fərq yaradır, amma Arteta və klub azarkeşləri hər sprinti, hər ikili mübarizəni nəfəs tutaraq izləyir.
Erkən dönüşlər: Havertz, Gyökeres və Hincapie
Dünya çempionatı futbolçular üçün zirvədir, amma klub məşqçiləri üçün bəzən erkən geri dönüş də bir növ “uğur” sayılır. Pley-off mərhələsi başlayanda bu reallıq Arsenal üçün də özünü göstərməyə başladı.
Kai Havertz artıq mundialdan kənardadır. Almaniya 1/32 finalda Paraqvaya uduzdu və hücumçunun turniri gözləniləndən tez bitdi. Eyni aqibəti Viktor Gyökeres də yaşadı – İsveç Fransa qarşısında məğlub oldu və forvard da çemionatla vidalaşdı. İki hücumçunun da erkən geri dönməsi Arteta üçün planlaşdırılmamış, amma pis də sayıla bilməyəcək bir “fasilə” deməkdir.
Daha dramatik hekayə isə Piero Hincapie üçün yazıldı. Ekvador Meksikaya uduzaraq turnirlə vidalaşdı, müdafiəçi isə kabus kimi bir son yaşadı. Rəqiblə gərgin mübahisə zamanı ağzını əli ilə örtməsi ona birbaşa qırmızı vərəqə qazandırdı. Komanda turnirdən kənar, o isə həm də diskvalifikasiya ilə başı aşağı meydanı tərk etdi.
Hələ də mübarizədə olanlar
Arsenal üçün dünya çempionatı tam qaranlıq deyil. Bəzi əsas simalar hələ də mübarizədədir və yüksək səviyyədə oyun təcrübəsi toplayır.
Belçika millisinin üzvü Leandro Trossard həmtəşkilatçılardan olan ABŞ-a qarşı oyuna hazırlaşır. Onun çevikliyi və yaradıcılığı Belçikanın hücum xəttində yenə açar rol oynaya bilər.
İspaniya cəbhəsində isə Arsenal izləri daha da qabarıq görünür. David Raya, Mikel Merino və Martin Zubimendi ilə təmsil olunan ispanlar artıq 1/8 finala yüksəlib. Bu üçlükdən yalnız biri kluba məxsus olsa da, Artetanın sisteminə uyğun profillərin mundial səhnəsində parlaması diqqətdən yayınmır. Onlar üçün bu, şəxsi karyera zirvəsinə gedən yol, Arsenal üçün isə gələcəyə dair əlavə siqnaldır.
Artetanın incə hesabı
Dünya çempionatı futbolçular üçün ən böyük şərəfdir. Bu, heç kim tərəfindən mübahisə olunmur. Amma Mikel Arteta üçün indi başqa bir məsələ ön plana çıxır: çempion heyəti növbəti mövsümə necə hazır çatacaq?
Bəziləri artıq istirahətə keçib, bəziləri hələ də ölkəsinin uğuru üçün meydandadır. Hər oyun, hər uzatma dəqiqəsi, hər zədə riski Artetanın beynində hesablanır. Arsenal Premyer Liqa titulunu müdafiə etməyə hazırlaşır və bu, tam güclü, həm fiziki, həm də mental cəhətdən təravətli bir heyət tələb edir.
Mundialın parıltısı yavaş-yavaş sönəndə, sual təkcə kuboku kimin qaldıracağı deyil. Daha vacibi budur: Arsenal ulduzları Meksika səmasından, ABŞ stadionlarından, qitənin müxtəlif guşələrindən Londona qayıdanda, yenidən İngiltərə çempionu olmaq üçün kifayət qədər enerjiyə sahib olacaqlarmı?
