Arsenal Liverpool akademiyasının hücumçusunu ələ keçirir
Liverpool son illərdə Britaniya futbolunun ən parlaq yeniyetmələrini bir-bir Merseyside-a gətirməklə öyünürdü. İndi isə eyni fənd onlara qarşı işlədilir. Və bunu edən, birbaşa daxili rəqibdir – Arsenal.
Harvey Elliott, Ben Gannon-Doak, Trey Nyoni, Rio Ngumoha... Son illərdə Anfield yolunu tutan gənclərin siyahısı uzundur, üslub isə tanış: rəqib akademiyalardan vaxtında dartıb çıxarılan istedadlar, uzunmüddətli layihə kimi kluba qazandırılırdı. Bu dəfə ssenari dəyişir.
16 yaşlı hücumçu üçün London planı
The Athletic-in məlumatına görə, Arsenal artıq Liverpool akademiyasının hücumçusu Vincent Joseph ilə şərti razılığa gəlib. Söhbət hələ peşəkar müqavilə imzalamamış, 16 yaşlı bir forvarddan gedir. Klublar hazırda təzminat məbləği üzərində danışıqlar aparır.
Əgər tərəflər ortaq məxrəcə gələ bilməsə, qərarı tribunal verəcək. Gənc futbolçu 24 yaşına qədər ilk peşəkar anlaşmasını imzalamadan və ya peşəkar müqaviləsinin sonunda klubunu dəyişirsə, məhz belə mexanizm işə düşür. Yəni bu, İngiltərə sistemində yaxşı tanınan prosedurdur.
Joseph bu yay Liverpool ilə təqaüd (scholarship) müqaviləsi bağlamayıb. Onun məktəbli kimi qeydiyyatının müddəti başa çatdıqdan sonra yollar ayrılıb və Arsenal fürsəti qaçırmayıb.
Liverpool-un itkisi, Arsenal-ın qazancı
Liverpool azarkeşləri və akademiya rəhbərliyi üçün bu xəbər acı dad verir. Səbəbi aydındır: Joseph aşağı yaş qruplarında elə rəqəmlər göstərib ki, onun potensialı haqqında artıq ciddi danışılır.
Ötən mövsüm Under-18 Premier League-də cəmi iki oyuna çıxıb, amma üç qol vurub. İngiltərə U16 millisində isə doqquz oyunda səkkiz qol – bunların içində ötən ilin dekabrında Niderland U16-yə qarşı het-trik də var (Transfemarkt məlumatına əsasən). Bu yaş üçün olduqca ağır statistikadır.
Liverpool digər perspektivli gənclərlə, məsələn, Lucas Clarke ilə peşəkar müqavilə bağlamaqda sürətli davranıb. Ancaq 16 yaşlı mərkəz hücumçu ilə eyni çevikliyi göstərə bilməyib. İndi isə Joseph-in Emirates yolunu tutması demək olar ki, an məsələsidir.
Bu hekayə Liverpool üçün tanışdır. Onlar qısa müddət əvvəl Rio Ngumoha-nı 16 yaşı tamam olan kimi Chelsea akademiyasından almışdılar və o transferin də yekun məbləğini tribunal müəyyənləşdirmişdi. İndi eyni üsulu Arsenal onlara qarşı tətbiq edir.
Merseyside üçün bu, yalnız bir gəncin itkisi deyil. Rəqibin, xüsusilə də London nəhənginin, sənin modelini özünə uyğunlaşdırıb sənin hesabına güclənməsi hissi var. Amma reallıq belədir: bazarda ən kiçik boşluq belə dərhal doldurulur.
Joseph üçünsə bu, başqa səviyyəyə addım atmaq şansıdır. Arsenal son illərdə gənclərə meydan verməkdə, onlara əsas komandaya yol açmaqda kifayət qədər cəlbedici nümunə yaradıb. İndi sual budur: Liverpool-un əldən buraxdığı bu yeniyetmə, Emirates-də növbəti böyük hücum silahına çevrilə biləcəkmi?
