Arsenal 22 ildən sonra Premyer Liqa kubokunu qazandı
Arsenal 22 illik gözləntidən sonra Premyer Liqa kubokunu yenidən qucaqladı. İndi isə onu buraxmaq niyyətində deyil. Mikel Artetanın komandası mövsüm pərdəsi açılmadan öncə artıq ilk siqnalı verib: bu titul asanlıqla əldən çıxmayacaq.
Cardiffdəki Principality Stadium-da Community Shield-də Manchester City üzərində 3:0-lıq darmadağın – mövsümöncəsi sadə yoxlama yox, açıq mesaj idi. Çempion, yeni mövsümə başı aşağı girmir. Çempion meydanı silkələməyə hazır gəlir.
Xüsusi nəsə etməyə hazırıq
Cümə günü Emirates-də Championship qalibi Coventry City-yə qarşı açılış oyunu öncəsi Arteta sözünü gizlətmədi. İspan mütəxəssis ardıcıl çempionluq sualına cavabında komandanın iştahını açıq göstərdi:
“Sən yenidən o yoldan keçmək istəyirsən, istək gəlir; o anı yenidən yaşamaq istəyirəm və ondan da böyük anlar yaşamaq istəyirəm, bunun nəyə başa gələcəyini bilirik. Tapşırığın nə qədər çətin olduğunu bilirik, bu klubda bunu heç vaxt etməmişik – elə buna görə də bilirik ki, xüsusi nəsə tələb olunacaq və biz buna hazırıq”.
Arsenal Premyer Liqanı tarixində heç vaxt ardıcıl qazanmayıb. Üst-üstə çempionluq üçün son uğurlu müdafiəni xatırlamaq üçün isə 1930-cu illərə qayıtmaq lazımdır. Bu, klubun miqyası üçün inanılmaz uzun fasilədir.
Arteta isə inamla danışır. Onun fikrincə, bir dəfə dadına baxılan uğur iştahı yalnız artırır. Bazar günü Cardiffdəki oyun da bu iddianı gücləndirdi. City-ni 3 cavabsız qolla yıxan Arsenal Community Shield-i qaldırarkən, meydanda təkcə kubok yox, acgözlük də görünürdü.
Baş məşqçi həmin matçdan sonra belə danışdı: “Bu qədər böyük bir şey qazandıqda, buna görə çox mübarizə apardıqda, o emosiyadan keçib qalib gələndə, yenə istəyirsən. Bizim istədiyimiz də budur. Hər gün hamını itələməliyik. Bir-birimizi daha yaxşı edəcəyik və inanılmaz heyətimiz var, qoy, bunun dalınca gedək”.
Coventry ilə start, hər həftə “böyük sınaq”
Arteta Premyer Liqanın tempini və qəddarlığını yaxşı bilir. Hər turda fərqli tipli duel, hər həftə başqa tipli təzyiq. Buna görə də kağız üzərində autsayder görünən Coventry City-yə qarşı açılış oyunu da onun üçün sadə “ilk addım” deyil:
“Premyer Liqanın nələr gətirdiyini bilirik, hər həftə böyük çağırışdır və Cümə günü Coventry də böyük sınaq olacaq. Bazar günü böyük güc sərf etdikdən sonra indi bərpa olunmalıyıq, amma yenə də komandanın göstərdiyi istək və iradəni çox bəyəndim”.
Emirates-də ilk tur, tribunalar dolu, çempion meydanda. Arsenal üçün bu, sadəcə titulun müdafiəsinə başlamaq deyil, eyni zamanda rəqiblərə psixoloji zərbə vurmaq imkanıdır. İlk addımda sürüşmək istəmirlər.
Müdafiəyə təcili “təmirlər”: Ezri Konsa gəlişə yaxındır
Mövsüm ərəfəsində London klubunda təkcə emosiyalar deyil, kadr hərəkətliliyi də yüksəkdir. Arsenal müdafiə xəttinə təcili gücləndirmə üzərində işləyir və artıq hədəf dəqiqdir.
Çərşənbə günü klub Aston Villa-dan Ezri Konsa-nın transferi üçün 50 milyon funt sterlinqlik razılığa gəlib. İngiltərə millisinin üzvü yaxın 48 saatda tibbi müayinədən keçməlidir.
Bu addım təsadüfi deyil. William Saliba belindən aldığı zədə səbəbindən uzun müddət sıradan çıxıb. Jurrien Timber də qasıq nahiyəsindən ağır zədə alıb və uzunmüddətli itki sayılır. Arteta üçün arxa xəttdə etibarlı, Premyer Liqa təcrübəli mərkəz müdafiəçisi həyati əhəmiyyət daşıyırdı. Konsa bu boşluğu doldurmaq üçün gətirilir.
Təqvim isə sıxdır. Əgər Konsa-nın keçidi Coventry City ilə açılış oyununa qədər rəsmiləşməsə, 28 yaşlı müdafiəçinin debütü böyük ehtimalla növbəti turda baş tutacaq. Taleyin ironiyası: həmin oyun səfərdə, məhz Aston Villa-ya qarşı olacaq.
Arsenal yeni mövsümə çempion kimi, ac kimi və riskdən çəkinməyən baş məşqçi ilə girir. İndi sual təkdir: bu dəfə tarixə yazılacaq ardıcıl çempionluq hekayəsi başlaya bilərmi?
