Atletico və Barcelona arasındakı gərginlik: Julian Alvarez məsələsi
İspaniyanın iki nəhəngi arasında illərdir davam edən gərginlik yeni səviyyəyə qalxıb. Bu dəfə məsələ meydanda deyil, masa arxasında həll olunacaq. Atletico Madrid, Barcelona-nı rəsmi şəkildə FIFA-ya şikayət etməyə hazırlaşır və klub rəhbərliyi bunu açıq-aşkar “hücum” kimi görür.
Söhbət Julian Alvarez-dən gedir. 2024-cü ilin yayında Manchester City-dən Metropolitano-ya gələn, 2030-cu ilə qədər müqavilə imzalayan və təxminən 81,8 milyon funt sterlinqə başa gələn hücumçudan. City üçün rekord satış, Atletico üçün gələcək layihənin mərkəzi fiquru. Madrid klubu hesab edir ki, Barcelona bu uzunmüddətli müqaviləyə rəğmən, oyunçu ilə qanunsuz danışıqlara gedib.
Gil Marin: “Məsələ təkcə Julian deyil, Atletico-nun nüfuzudur”
Atletico-nun icraçı direktoru Gil Marin EFE-yə verdiyi açıqlamada klubun mövqeyini birmənalı ifadə etdi: onların fikrincə, bu, sadəcə bir transfer çəkişməsi deyil, prinsiplər savaşıdır.
“Bizim məsuliyyətimiz Atletico Madrid-in maraqlarını qorumaqdır və məhz buna görə də FIFA-ya Barcelona-ya qarşı şikayət verəcəyik. Onlar qorunan dövr ərzində etibarlı müqaviləsi olan oyunçu ilə danışıqlar aparıblar,” – Marin bildirib.
Metropolitano rəhbərliyi yalnız Barcelona-ya qəzəbli deyil. Julian Alvarez-in özü də hədəfdədir. Çünki hücumçu son açıqlamaları ilə odun üstünə benzin tökdü.
Milli komandada, dünya çempionatında Avstriya üzərində 2:0 hesablı qələbədən sonra ESPN-ə danışan Alvarez belə dedi: “Düşünmürəm ki, danışmaq üçün doğru andır, amma gizlənmək də istəmirəm. Səmimi insan olmağa çalışıram. [Atlético]-da danışmalı olduğum insanlarla danışdım. Hesab edirəm ki, hər kəs üçün ən yaxşısı transferdir. Arzumu reallaşdırmaq istəyirəm.”
Bu cümlələr Atletico rəhbərliyində dərin narazılıq doğurdu. Çünki burada artıq “mübahisəli şayiə” yox, açıq şəkildə ayrılmaq istəyi var.
“Onun bu açıqlamalarına görə çox təəssüflənirəm. O bəyanatlar üçün düzgün gün deyildi – bu, Messi-nin günü idi, Argentina millisinin günü idi, Julian-ın yox,” – deyə Gil Marin əlavə edib.
Alvarez yeni başlanğıc arzulayır, bunu gizlətmir. Amma klub qapını açmağa hazırlaşmır. Marin mövqelərini sərt şəkildə xatırladıb: “Julian-ın arzusu var, Atletico-nun da arzuları var. Doğrudur, o, bizimlə danışıb, amma bizim mövqeyimizi də çox yaxşı bilir, çünki hər şeyi açıq demişik. Atletico onun hüquqlarını satmaq istəmir. O, böyük oyunçudur və onun bizim üçün oynamasından qürur duyuruq.”
Barcelona-ya ağır ittiham: “Bizə, oyunçuya, azarkeşlərinə yalan deyirlər”
Gil Marin-in hədəfində təkcə Alvarez-in sözləri yox, Barcelona rəhbərliyinin davranış tərzi də var. O, katalon klubunu həm hörmətsizlikdə, həm də maliyyə imkanları ilə bağlı “illüziya satmaqda” ittiham edir.
Bu maraq təsadüfi deyil. Julian Alvarez 2025–26 mövsümündə Atletico forması ilə parladı: 20 qol, 9 məhsuldar ötürmə və ən əsası, Barcelona üçün zərbə olan matçlar. Hücumçu həm Çempionlar Liqasının 1/4 finalında, həm də Copa del Rey-in yarımfinalında katalonları turnirdən kənarlaşdıran əsas fiqurlardan biri oldu. Yəni bu, sıradan bir transfer hədəfi deyil, birbaşa idman və prestij zərbəsi potensialına malik oyunçudur.
“Barcelona bizə hörmətsizlik edir; elə bilirlər ki, bizi ayaqlaya bilərlər, zəifik, ya da sadəlövhük,” – Marin sərt danışıb. – “Əslində isə bütün dünyaya öz davranış tərzlərini göstərirlər. Bizə yalan deyirlər, oyunçuya yalan deyirlər, mediaya yalan deyirlər və öz azarkeşlərinə də yalan danışırlar. Hamını inandırmağa çalışırlar ki, əslində öhdəsindən gələ bilməyəcəkləri bir müqaviləni reallaşdıra bilərlər.”
Bu sözlər La Liga daxilində köhnə yaraları yenidən açır. Çünki Atletico-nun fikrincə, bu, təkcə Alvarez işi deyil, Barcelona-nın illərdir davam edən transfer siyasətinin davamıdır.
“La Liga” daxilində köhnə ssenari: adlar dəyişir, üsul qalır
Gil Marin xatırladır ki, bu, ilk dəfə deyil. Onun sözlərinə görə, İspaniya futbol ailəsi bu davranış modelinə çoxdan bələd olub.
“Barcelona bunu ilk dəfə etmir və futbol dünyası da bunu çox yaxşı bilir. Keçən il Nico Williams və Athletic Club ilə çox bənzər bir şey etdilər,” – o, belə deyib.
Metropolitano üçün bu iş artıq prinsip məsələsinə çevrilib. Bir tərəfdə müqavilə ilə bağlanmış ulduz hücumçu, digər tərəfdə onu “arzusuna qovuşdurmaq” istəyən Barcelona, arada isə FIFA-nın masasına gedən şikayət dosyesi.
İndi sual budur: bu qarşıdurma sadəcə hüquqi müstəvidə qalacaq, yoxsa Atletico–Barcelona rəqabətini növbəti illərdə də zəhərləyəcək yeni bir sərhəd müharibəsinə çevriləcək?
