Aubameyang Gabon millisindən ayrıldı: İmicimi ləkələdilər
Pierre-Emerick Aubameyang Gabon millisindəki səhifəni q definitif bağladı. 37 yaşlı hücumçu, ölkə tarixinin ən məhsuldar bombardiri, 2025-ci il Afrika Millətlər Kubokundakı fiaskodan sonra yaranan qalmaqalın fonunda yığmadan ayrıldığını açıqladı.
Deportivo-nun forvardı qərarını birbaşa turnirdən sonrakı rəftara bağladı. O, Bruno Ecuele Manga ilə birlikdə millidən kənarlaşdırıldı, daha sonra isə yenidən komandaya çağırıldı. Amma artıq gec idi.
Televiziya müsahibəsində Aubameyang açıq danışdı: “Məni alçaldıb imicimi ləkələdilər, halbuki Afrika Millətlər Kubokunda zədəli-zədəli oynadım”. Onun üçün bu, dözüm həddini aşan məqam oldu: “Bu, son damla idi və mən burda dayanmağı üstün tuturam”.
AFCON fiaskosu ölkəni silkələdi
Gabon üçün kabus Mərakeşdəki Afrika Millətlər Kubokunda başladı. “Panterlər” qrup mərhələsində bütün üç oyunu uduzdu və turniri sıfır xalla başa vurdu. Son zərbə isə Fildişi Sahili ilə 2:3 hesablı məğlubiyyət oldu.
Bu nəticə ölkədə emosiyaları alovlandırdı. Prezident Brice Clotaire Oligui Nguema həmin vaxt “milli kimliyin bir hissəsinin zəiflədiyini” bildirdi. Siyasi ton futbolla qarışdı, təzyiq kəskin artdı.
Hakimiyyət sərt addımlar atdı: məşqçi heyəti tamamilə buraxıldı, milli komandanın fəaliyyəti qeyri-müəyyən müddətə dayandırıldı, Aubameyang və Ecuele Manga isə yığmadan uzaqlaşdırıldı. Xüsusilə iki ən təcrübəli futbolçunun hədəfə qoyulması azarkeşlərin böyük hissəsində narazılıq doğurdu.
Günah keçisi obrazına etiraz
Bu proses Aubameyang üçün şəxsi zərbəyə çevrildi. O, özünü ölkə futbolunda illərlə daşıdığı rola baxmayaraq, böhranın əsas günahkarlarından biri kimi göstərilmiş sayır.
“Məncə, milli komandanın problemləri mənim təmsil etdiyim kiçik hissədən qat-qat dərindir”, – deyə hücumçu mövqeyini izah edərkən vurğuladı.
Onun qəzəbini daha da artıran məqam isə öz sözlərinə görə, turnirdə zədə ilə oynaması idi. Yəni, fədakarlıq göstərib meydanda qaldığı halda, sonradan sərt şəkildə kənara atılması Aubameyang üçün açıq hörmətsizlik kimi görünürdü.
Bəli, o, daha sonra yenidən milliyə dəvət aldı. Amma yaranan çat artıq bağlanmadı. Etimad hissi itdi, münasibət qırıldı. Nəticədə Aubameyang davam etməmək qərarına gəldi və Gabon futbol tarixinin ən önəmli beynəlxalq karyeralarından birinə özü nöqtə qoydu.
Gabonun bombardiri səhnəni tərk edir
Bu ayrılıq yeni baş məşqçi Sébastien Migné üçün start xətini dəyişir. O, illərlə ölkənin hücum simvolu, dünyada ən tanınan futbolçusu olmuş bir lider olmadan yeni dövrə başlamağa məcburdur.
Aubameyang millini rekordçu bombardir kimi tərk edir. O, bir nəslin kapitanı, Gabon futbolunun beynəlxalq arenadakı üzü oldu. Onun qolları, sürəti, imzasına çevrilmiş qaçışları bu komandanın ən parlaq anları ilə assosiasiya olunurdu.
Amma vida ssenarisi tam fərqli yazıldı. Nə dolu tribunalar qarşısında alqışlarla yola salınma, nə də illərin xidmətinə görə simvolik oyun. Əvəzində, zədənin ağrısı, uğursuz turnirin tozu və “məni alçaldılar” cümləsi ilə bitən acı ayrılıq.
İndi sual budur: Gabon bu boşluğu necə dolduracaq və ölkənin futbol kimliyi Aubameyang sonrası dövrdə özünü yenidən qurmağı bacaracaqmı?
