Ayyoub Bouaddi: Manchester City-nin Gənc Ulduzu
Ayyoub Bouaddi. Dünya çempionatını yaxından izləyənlər üçün bu ad artıq yad deyil. Turniri yola-ara baxanlar belə, yəqin ki, onu xatırlayır. Çünki onu görməmək çətindir.
Təkcə köhnə məktəbə xas, sıx, qıvırcıq saçlarına görə yox. Yayda böyük səhnədə göstərdiyi soyuqqanlılıq, topa münasibətdəki yüngüllük, oyunu sanki əlcək kimi idarə etməsi kifayət etdi ki, hamı ondan danışsın. Lille-in mərkəz yarımmüdafiəçisi ilk böyük beynəlxalq turnirində, xüsusilə də qrup mərhələsində Braziliyaya qarşı matçda səhnəni ələ aldı.
Maraqlıdır ki, bu, Carlo Ancelotti-nin rəqib komandada öz futbolçularından “duellərdə daha yaxşı” olan bir gənc barədə düşünməyə məcbur qaldığı ilk an deyildi.
O gün Braziliyanın mərkəzində Casemiro ilə Bruno Guimaraes dayanmışdı. Təcrübə, status, ad-san – hamısı onlardaydı. Amma parlayan Bouaddi oldu. Ancelotti üçün bu hiss tanış idi.
Madrid gecəsi: 17 yaşında zirvəyə atılan addım
Fransada doğulan gənc 2023-cü ildə, 16 yaşı tamam olandan cəmi üç gün sonra Lille ilə rəsmi debütünü etdi. Bir il sonra, 17-ci doğum günündə isə artıq tam başqa səhnədə idi: Çempionlar Liqasında start heyətində, rəqib – Avropanın mövcud çempionu Real Madrid. Ancelotti-nin Real-ı.
Həmin gecə təkcə nəticə ilə yadda qalmadı. Lille, Real-ın Çempionlar Liqasında 14 oyunluq məğlubiyyətsiz seriyasına son qoydu. Fede Valverde, Eduardo Camavinga, Jude Bellingham – hamısı Bouaddi-nin rəhbərlik etdiyi mərkəzdə sıxışdırıldı. Demək olar ki, heç kim tanımırdı onu Fransa sərhədlərindən kənarda, amma o, meydanda hamıdan çox məsafə qət etdi.
Lille-in baş məşqçisi Bruno Genesio həmin gecəni “adını dünyaya yazdırdığı an” kimi təsvir etdi. Ancelotti isə sonradan onu “dünyanın ən yaxşı gənc futbolçularından biri” adlandıracaq qədər irəli getdi.
O gündən bəri Bouaddi radarların mərkəzinə düşdü. Skautlar tribunaları doldurmağa başladı. Arsenal, Paris Saint-Germain, Bayern Munich – hamısı növbəyə düzülmüşdü. Amma yarışı udan görünür ki, Manchester City oldu. Səbəb də aydındır: Rodri-nin bu yay ayrılma ehtimalı fonunda yaranan boşluq.
City-nin planı: gələcək üçün yox, bu gün üçün transfer
Cəmi 18 yaşı var. Amma Bouaddi artıq sübut edib ki, potensialı yaşını çoxdan qabaqlayıb. Ötən mövsüm Lille-də top itkisindən sonra top qazanma (151) üzrə bütün komanda yoldaşlarını üstələdi. Hər 90 dəqiqəyə düşən bərpaedici top qazanma (5.8) göstəricisi də komandanın ən yaxşısı idi.
Məlumata görə, Enzo Maresca onu dərhal əsas heyətə inteqrasiya etmək istəyir. Baş məşqçi hesab edir ki, Premyer Liqa üçün kifayət qədər hazırdır – axı Bouaddi artıq Lille ilə 100-ə yaxın rəsmi oyuna çıxıb.
Onun profili City üçün niyə bu qədər uyğundur? Bouaddi meydanın dərinliyində oynayan, oyunun ritmini diktə edən “dirijor” funksiyasını daşıyır. Şablon aydındır: Rodri tipli dayaq yarımmüdafiəçisi. O, bu yay Nottingham Forest-dən alınan və 116 milyona başa gələn, daha çox qutu-qutu qaçan Elliot Anderson-dan fərqli olaraq, taktiki lövbər rolunu yerinə yetirir. Bu ikilinin Maresca-nın sevdiyi 4-2-3-1 sistemində bir-birini tamamlaması gözlənilir.
Onun yaşında olan az futbolçu topu olmayan vaxtdakı fiziki gücü, top ayağında olanda isə sakitliyi və balansı bu qədər ustalıqla birləşdirə bilir. Tez qazanılan təcrübə, yaşıdlarına qarşı ona real üstünlük qazandırıb.
Bouaddi hündür və güclüdür, amma eyni zamanda meydanda sürüşərək hərəkət edir, pressinqdən çıxma tərzi ilə yenə Rodri-ni xatırladır. Bu, onu məsafə qət edərək top daşımaqda əla silaha çevirir. Dünya çempionatındakı ötürmə performansı da City-nin, eləcə də Maresca-nın topa nəzarətə söykənən futbol fəlsəfəsinə uyğunluğunu bir daha göstərdi.
Onun Fransa gənclər yığmalarındakı komanda yoldaşı Rayan Cherki bir dəfə ona “Einstein” ləqəbini verib. Texniki cəhətdən bu qədər istedadlı bir oyunçudan gələn bu kompliment təsadüfi deyil.
Rekonstruksiya dövründə tapılan lövbər
Bəs niyə məhz indi? City-nin davam edən yenidən qurulması bu yay və ya gələn pəncərədə iki mərkəz yarımmüdafiəçisinin alınmasını qaçılmaz edirdi. Maresca 60-dan çox oyunun gözlədiyi mövsümdə keyfiyyətli dərinliyə ehtiyac duyur. Bernardo Silva-nın itkisi və Rodri-nin mümkün gedişi komandanın strukturunu, balansını ciddi şəkildə dəyişir. Üstəlik, Tijjani Reijnders də ayrıla bilər.
Bouaddi-də isə Maresca demək olar ki, zəif nöqtəsi olmayan dayaq yarımmüdafiəçisi tapıb. O, həm top qəbul edən, həm də onu irəli daşıyan futbolçudur. Artıq hazırdır, amma eyni zamanda böyümək üçün yer saxlayır. Fransa yığmasının bütün aşağı yaş qruplarında oynadıqdan sonra, daha çox rəqabət, daha çox məsuliyyət istəyi ilə milli komanda seçimini dəyişib və Mərakeşi seçib.
Premyer Liqa hər yeni gələn üçün sınaq meydanıdır. Adaptasiya dövrü qaçılmazdır. Ligue 1-dən bu sıçrayışın neçə futbolçunu çətin vəziyyətə saldığını tarix yaxşı xatırlayır.
Ancaq City Bouaddi-ni gələcəyin layihəsi üçün almır. Onu bu gün üçün gətirir. Mövcud faktlar da göstərir: bu yükü daşımağa hazırdır. Sual indi başqadır – bu gənc “Einstein” Manchester-də oyunun qaydalarını nə qədər tez dəyişəcək?
