Bayern Munich JJ Gabriel üçün hücuma keçdi

Manchester United akademiyasının ən parlaq istedadlarından biri olan JJ Gabriel ətrafında yarış qızışır. 15 yaşlı hücumçu artıq klub rəhbərliyinə ayrılmaq istədiyini bildirib və iddialara görə, bir daha United forması geyinməsi gözlənilmir.

İngiltərə mətbuatının – xüsusən də The Sun və Manchester Evening Newsin – məlumatına görə, gənc futbolçunun düşərgəsi ilə həm Bayern Munich, həm də Real Madrid arasında danışıqlar gedir. Səhnə arxasında isə tanınmış “super-agent” Ali Baratın adı keçir. O, Gabriel tərəfi ilə Almaniya və İspaniya nəhənglərini eyni masa arxasına gətirən əsas fiqurlardan biri kimi göstərilir.

Rəsmi qaydalara görə, futbolçular 16 yaşına çatmadan agentlə müqavilə imzalaya bilməz. Amma Ali Barat və onun rəhbərlik etdiyi Epic Sports şirkəti artıq JJ Gabriel üçün favorit nümayəndə namizədlərindən sayılır. Onların bu prosesdə fəal rolu, xüsusilə də iki nəhəng klubla əlaqə yaratmaları, gələcək əməkdaşlığın konturlarını indidən cızır.

Bayern Munich bu yarışda açıq-aşkar ön sıralardadır. Klubun idman direktoru Christoph Freund ötən həftə keçirdiyi mətbuat konfransında gənc futbolçuya verdiyi yüksək qiymətlə diqqət çəkdi. O, Gabriel haqqında belə danışdı: bu, “fövqəladə istedad”dır.

Freund daha dərin detallara girməkdən yayınsa da, sözləri kifayət qədər aydın mesaj kimi qəbul olundu: “Mən başqa klublarla müqaviləsi olan oyunçular barədə danışmıram. Biz bu futbolçunu tanıyırıq, çünki o, çox istedadlıdır. O, fövqəladə istedaddır. Bununla bağlı daha artıq heç nə deyə bilmərəm”.

Bu cümlələrdən sonra suallar daha da çoxaldı. Bayern Munich artıq illərdir gənc oyunçular üçün cəlbedici inkişaf platforması kimi tanınır. Real Madrid isə ən istedadlı yeniyetmələri erkən yaşda sisteminə qatmaqda israrlıdır. Manchester United isə, görünür, öz akademiyasının növbəti böyük ümidini itirmək üzrədir.

JJ Gabriel hələ 16 yaşına çatmayıb, amma onun ətrafında qurulan planlar artıq böyük futbol səhnəsinin qaydalarına uyğun ölçülür. İndi əsas sual budur: bu “fövqəladə istedad” karyerasının ilk böyük addımını Allianz Arena istiqamətində atacaq, yoxsa Madrid yolunu seçəcək?