Benjamin Mendy dünya çempionu kubokunu satdı
Benjamin Mendy yenidən gündəmdədir – bu dəfə meydandakı oyunu ilə yox, futbolçular üçün az qala toxunulmaz sayılan bir xatirədən imtinası ilə.
2018-ci ildə Fransa yığmasının heyətində dünya çempionu olan müdafiəçi, Rusiya mundialından sonra hər oyunçuya verilən rəsmi Dünya Kuboku replikasını hərraca çıxarıb və satıb.
62 min dollarlıq kubok
Mendy-nin kuboku ABŞ-da idman yadigarları üzrə ixtisaslaşan Goldin hərrac evinin təşkil etdiyi Global Football Auction Part 2 çərçivəsində satışa çıxarılıb. Rəsmi replika 62 min dollara alıcı tapıb – təxminən 54 min avro.
Bu, adi bir medal, forma və ya imzalı top deyil. Dünya çempionu titulunu simvolizə edən kubok futbolçu üçün karyerasının zirvəsini təmsil edir. Məhz buna görə Mendy-nin addımı bir çox azarkeş və mütəxəssislər arasında qəzəb və təəccüb doğurdu.
“Bu kubok mənimdir, yoxsa sizin?”
Tənqid dalğası gücləndikcə, Mendy susmadı. O, Snapchat hesabında sərt reaksiya verdi: “Bu mənim kubokumdur, yoxsa sizin? Axırda o mənə məxsusdur, onunla istədiyimi edirəm”.
Daha sonra Fransa mediasının, xüsusilə RMC-nin yaydığı məlumata görə, o, mövzuya istehza ilə davam edib: “Bir də ki, şkafda həddindən artıq çox yer tuturdu”.
Mendy bununla da dayanmayıb. O, başqa titullarını da satmağa hazır olduğunu açıq şəkildə ima edib: “Yeri gəlmişkən, hələ satışda başqa titullarım da var”, – deyə əlavə edib.
Beləliklə, müdafiəçi azarkeşlərin “hörmətsizlik” kimi qiymətləndirdiyi addımı sadəcə şəxsi mülkiyyətinə dair sərbəst qərar kimi təqdim edir.
Parlaq başlanğıc, bahalı transfer, titullarla dolu illər
Mendy-nin satdığı kubok, əslində, onun parlaq karyerasında sadəcə bir sətirdir. 2017-ci ildə o, Monaco ilə Fransa çempionu oldu və həmin yay Manchester City-yə keçidi ilə dünya futbolunun gündəmini dəyişdi.
İngiltərə nəhəngi onun üçün 58 milyon avro ödəyərək o dövr üçün planetin ən bahalı müdafiəçisinə çevirdi.
2017–2023-cü illər arasında Manchester City forması ilə Mendy səkkiz kubok qazandı. Onların dördü Premier League çempionluğudur. Yüksək sürəti, hücuma qoşulmaları və geniş meydan görməsi ilə o, Pep Guardiola-nın sistemində nəzərdə tutulan əsas fiqurlardan biri idi, baxmayaraq ki, zədələr və meydandankənar hadisələr onun sabitliyinə mane olurdu.
Fransa yığmasında isə Mendy 10 oyun keçirib və 2018-ci ildə dünya çempionu olan heyətin bir parçası olub.
Məhkəmə işi, itirilən illər və geri dönüş cəhdi
2021-ci ildə Mendy-nin karyerası kəskin dönüş aldı. O, bir neçə zorlamada və zorlamaya cəhddə ittiham olundu. İş ictimaiyyətin və medianın diqqət mərkəzinə çevrildi, futbolçu uzun müddət meydandan kənarda qaldı, hətta həbsdə vaxt keçirdi.
İki ildən çox davam edən hüquqi mübarizənin sonunda, 2023-cü ilin iyulunda məhkəmə onu bütün ittihamlardan bəraət verdiyini açıqladı.
Lakin bu müddət Mendy-ni həm fiziki, həm də peşəkar baxımdan ağır zərbə altında qoydu. Futboldan kənar qalan illər onun karyerasını dondurdu, imicini ciddi şəkildə zədələdi.
Buna baxmayaraq, o, geri dönməkdən imtina etmədi. Əvvəlcə Fransada Lorient ilə yenidən yaşıl meydanlara qayıtdı, sonra İsveçrədə Zurich, ardınca isə Polşada Pogon Szczecin klubuna keçdi. Hazırda Polşa klubuyla 2027-ci ilin iyununa qədər müqaviləsi var və karyerasını yenidən bərpa etməyə çalışır.
Kubokun satışı – simvolik jest, yoxsa soyuq hesab?
Mendy-nin dünya çempionu kubokunu satması bəziləri üçün sadəcə şəxsi qərardır: peşəkar futbolçunun öz əmlakı üzərində ixtiyarı. Digərləri üçün isə bu, illərlə xəyalını qurduqları titulun dəyərini alçaldan, azarkeşlərin emosiyasını nəzərə almayan sərt bir jestdir.
Müdafiəçi özü isə məsələni çoxdan həll olunmuş mövzu kimi görür: kubok onun üçündür, qərar da ona məxsusdur.
İndi sual başqadır: Mendy üçün 2018-ci ilin qızıl xatirələri artıq bağlanmış bir fəsildir, yoxsa bu satış, sarsıntılarla dolu karyerasında yeni bir başlanğıcın, köhnə yükdən qurtulmağın simvolik addımıdır?
