Chelsea-yə 10 milyon funt cərimə və transfer qadağası
Stamford Bridge bir daha məhkəmə zalının sədası ilə silkələndi. Meydanda deyil, kağız üzərində uduzan bu dəfə Chelsea oldu.
Klub 74 dəfə agent qaydalarını pozduğunu etiraf etdikdən sonra Futbol Assosiasiyasının (FA) qərarı ilə 10 milyon funt sterlinq məbləğində cərimələnib və iki transfer pəncərəsini əhatə edən şərti transfer qadağası alıb. Bu, sadəcə maliyyə zərbəsi deyil, həm də imicə vurulan ağır zərbədir.
Əvvəlcə müstəqil komissiya daha sərt cəza seçmişdi: 10 milyon funtluq cərimə ilə yanaşı, 2027-ci il 30 iyuna qədər qüvvədə qalacaq şərti altı xallıq cərimə. Yəni Chelsea həmin tarixə qədər yenidən oxşar pozuntuya yol versəydi, cədvələ birbaşa mənfi altı xal yazılacaqdı.
Londonda bu ssenariyə qarşı dərhal reaksiya gəldi. Klub həmin qərardan apellyasiya verdi və bu gediş oyunun axarını dəyişdi. Altı xallıq şərti cəza indi şərti iki transfer pəncərəsi qadağası ilə əvəzlənib. Məğz eynidir: yenə günah təkrarlansa, bu dəfə transfer bazarının qapıları üzlərinə çırpılacaq.
Bu işin kökü Roman Abramoviç dövrünə gedib çıxır. Pozuntular FA-nın agentlərlə iş, vasitəçilərdən istifadə və futbolçulara üçüncü tərəf sərmayəsi ilə bağlı qaydalarına aiddir. Yəni danışıq masasında kimin oturduğu, kimə nə qədər ödəniş edildiyi, hansı pulların hansı yolla hərəkət etdiyi bu işin mərkəzində dayanır.
Maraqlı detal: bu dəfə iş üstə çıxanda Chelsea yaxalanmayıb, özü etiraf edib. Klubun yeni sahibləri 2022-ci ildə, Abramoviçdən alqı-satqı prosesi gedərkən, bu pozuntuları futbol hakimiyyət orqanlarına özləri bildiriblər. Yeni rəhbərlik köhnə defterləri açıb masaya qoydu, indi isə həmin səhifələrin hüquqi əks-sədasını yaşayırlar.
Chelsea bu məsələ ilə bağlı daha əvvəl də cəza mexanizmləri ilə üz-üzə qalıb. Klub artıq Premier League və UEFA ilə sanksiya razılaşmalarına gedib, yəni müxtəlif instansiyalarda eyni dosyenin müxtəlif fəsilləri oxunur. FA-nın qərarı isə bu zəncirin növbəti həlqəsi kimi ortaya çıxıb.
İndi sual başqadır: bu şərti transfer qadağası klubun gələcək planlarına necə təsir edəcək? Chelsea son illərdə aqressiv transfer siyasəti, uzunmüddətli müqavilələr və böyük investisiyalarla gündəmdədir. Sərhədləri bir daha zorlasalar, həmin strategiya qəfil divara çırpıla bilər.
Stamford Bridge tribunaları üçün bu, qazanılan və ya itirilən xallardan daha çox, klubun kimliyinə, idarəetmə mədəniyyətinə aid hekayədir. Köhnə səhvlərin kölgəsi hələ də meydanın kənarından çəkilmir və indi yeni rəhbərliyin qarşısında tək bir seçim var: ya bu dövrü qəti şəkildə bağlamaq, ya da gələcək mövsümlərdə cəzaların ağırlığı altında oynamaq.
