Chelsea-də Liam Roseniorla yollar ayrıldı

Stamford Bridge-də daha bir layihə cəmi bir fəsil davam etdi. Chelsea rəhbərliyi ardıcıl beş Premyer Liqa məğlubiyyətindən sonra Liam Roseniori vəzifəsindən azad etdi və bunu klubun rəsmi açıqlaması ilə təsdiqlədi.

41 yaşlı mütəxəssis yanvarda, Enzo Maresca ilə yollar ayrıldıqdan sonra, klubun amerikalı sahiblərinə məxsus layihənin bir parçası olan Strasbourg-dan böyük ümidlərlə gətirilmişdi. Yeni dövr, yeni ideyalar, uzunmüddətli baxış – hamısı kağız üzərində gözəl görünürdü. Meydanda isə tam başqa mənzərə yarandı.

Komanda son səkkiz oyunun yedisində uduzub. Daha ağır fakt: Chelsea beş ardıcıl liqa matçında qol vura bilmədən məğlub olub. Klubun tarixində belə seriya son dəfə 1912-ci ildə qeydə alınmışdı. Yəni söhbət sadəcə zəif formadan yox, tarixi böhrandan gedir.

Brighton & Hove Albion qarşısında 0:3 hesablı darmadağın vəziyyəti partlatdı. Oyun bitəndən sonra Rosenior özü bu çıxışı “qəbuledilməz” adlandırmışdı. Elə həmin sözlər, həmin axşam Stamford Bridge tribunalarındakı gərgin ab-hava ilə birlikdə, rəhbərliyin səbr kasasını daşıran son damla oldu.

“Chelsea Football Club bu gün baş məşqçi Liam Rosenior ilə yollarını ayırıb.”

Ardınca mesajın tonunu sərtləşdirən cümlə gəldi: “Bu, klubun yüngül aldığı qərar deyil, lakin mövsümdə hələ bu qədər çox şey uğrunda mübarizə aparıldığı halda, son nəticələr və çıxışlar tələb olunan standartların xeyli altında qalıb.”

Yəni siqnal aydındır: nəticə dərhal, bəhanə isə qəbul edilmir.

Roseniorun gəlişi bir növ daxili sistem həllinə bənzəyirdi. Strasbourg-dakı işi, müasir futbola baxışı, sahiblik strukturuna uyğunlaşması – hamısı Chelsea üçün uyğun profil kimi görünürdü. Amma Premyer Liqa reallığı fərqlidir. Təzyiq fasilə tanımır, vaxt istəmir, layihə söhbətlərini gözləmir.

Beş ardıcıl liqa məğlubiyyəti, üstəlik qol hesabının “0”da donması, hər turun sonunda cədvəldə yavaş-yavaş aşağı sürüşmə – bütün bunlar bir yerdə London nəhəngini addım atmağa məcbur etdi. Rəhbərlik açıq şəkildə bildirir ki, mövsüm hələ itirilməyib və bu dəyişiklik məhz bu inamın nəticəsidir.

İndi sual budur: bu dəfə sükan kimə tapşırılacaq və növbəti cəhd nə qədər davam edəcək? Chelsea üçün saat yenidən sıfırlanıb, amma Premyer Liqa heç kəsi gözləmir.