Cristiano Ronaldo: Qızıl butsdan qızıl heykələ gedən yol

Cristiano Ronaldo hələ də meydandadır. 41 yaşında, Səudiyyə Ərəbistanının çempionu olan Al-Nassr ilə müqaviləsi qüvvədə, dünyanın ən bahalı kontraktlarından birinin son 12 ayına girib. Karyerası günbatımına yaxınlaşır, amma hədəflər bitmir. Əksinə, siyahı hələ də kifayət qədər uzundur.

Ən böyük rəqəm – 1000 qol

Onun üçün rəqəmlər həmişə hekayənin bir hissəsi olub, bəzən isə başlığı. İndi isə böyük sonluq kimi qarşıda bir rəqəm dayanır: 1000 rəsmi qol.

Bu, ulduz hücumçunun şəxsi manifesti kimidir. İllərdir rekordları alt-üst edən Ronaldo üçün daha bir zirvə. Səudiyyə Pro Liqasında qol sayını artırmaq, beynəlxalq arenada yenə də fərqlənmək – hamısı bu nəhəng hədəfin parçasıdır.

Yanında başqa bir arzu da var: böyük oğluyla eyni meydanda oynamaq. Cristiano Junior peşəkar səviyyəyə qalxa bilsə, ata-oğulun eyni komandada çıxış etməsi təkcə ailə hekayəsi yox, futbol tarixinin ən simvolik səhnələrindən birinə çevrilə bilər.

Orta 40-lara qədər – və ondan da o yana?

Ronaldo üçün yaş sadəcə rəqəmdir deyimi klişe deyil, fakt kimi görünür. 223 oyun, 146 qol – bu, milli komanda karyerasının hazırkı hesabıdır. Bu rəqəmlər hələ yekun deyil.

Euro 2028? Niyə də yox. 2030-cu ildə öz meydanında keçiriləcək dünya çempionatı? Bu da gündəmdən çıxmayıb. Onun üçün böyük turnirlər hələ bağlanmış qapı deyil. Bədəninə necə qulluq etdiyini, işinə münasibətini nəzərə alsaq, Portuqaliya formasını bir müddət də görməyimiz sürpriz olmaz.

Amma bir gün o butslar asılacaq. Yekun fit səslənəcək. Sual odur: sonra nə olacaq?

MLS, Messi və Hollivud qapısı

Bu sualın cavabı getdikcə daha çox Atlantik okeanının o tayına işarə edir. Söhbət ABŞ-dan, MLS-dən gedir. Orada onu təkcə yeni bir liqa yox, köhnə bir rəqabət də gözləyə bilər. Lionel Messi ilə illərlə Avropanı silkələyən duel bu dəfə okeanın o tayında, bəlkə də Kaliforniyada yenidən alovlana bilər.

Belə bir keçid təkcə idman deyil, biznes qərarı da olardı. Los-Anceles, Hollivud, qlobal brend – Ronaldo üçün bu şəhər sadəcə yeni klub deyil, yeni səhnədir. O, artıq kino sənayesinə ayaq qoyub: öz studiyasını yaradıb, media layihələrinə sərmayə yatırıb. Dünya miqyasında tanınan siması onu böyük büdcəli filmlər üçün təbii seçim edir.

Keçmiş komanda yoldaşları da bunu görür.

Silvestre: “Səma belə onun üçün limit deyil”

Manchester United-in keçmiş müdafiəçisi Mikael Silvestre, BetVictor Online Casino vasitəsilə GOAL-a danışarkən, Ronaldo üçün növbəti addımı demək olar ki, hazır görür: “Düşünürəm ki, onun üçün limit səmanın özüdür. Əlini vurduğu, vaxt və enerji sərf etdiyi hər iş uğurlu biznesə çevrilir”.

Silvestre xatırladır ki, Ronaldo bir müddət əvvəl Dubayda mükafatlandırma mərasimində aktyorluqdan açıq danışmışdı: “Deyəsən, aktyor olmaq istədiyini demişdi. Məncə, bu, onun növbəti addımıdır. Əgər Vinnie Jones aktyor ola bilibsə, Cristiano kimi yaraşıqlı biri bu işi rahatlıqla görə bilər”.

Burada söhbət sadəcə ekrana çıxmaqdan getmir. Bu, Ronaldo brendinin yeni fazası ola bilər – meydandan kənarda da tamaşaçıları eyni güclə cəlb edən bir faza.

Petit: “Onun həyatına film çəkmək kifayətdir”

Dünya çempionu Emmanuel Petit də bu mövzuda düşüncələrini gizlətmir. Onun fikrincə, idmançılar ekrana daha tez-tez çıxmalı, amma nədənsə bu, hələ də geniş trendə çevrilməyib: “Niyə filmlərdə daha çox idmançı görmürük? Reperlər, influencerlər, müxtəlif tanınmış simalar filmlərə gedir, amma idmançılar azdır. Niyə?”

Petit xatırladır ki, Eric Cantona, Vinnie Jones, David Ginola, Frank Leboeuf bu yolu artıq sınaqdan keçirib: “Biz də əyləndiririk. İdmanda da xarakter, dramatizm, hekayə var. Niyə daha çoxu bunu etmir?”

Ronaldo mövzusuna gələndə isə Petit-in sözləri daha da kəskinləşir: “Onun xarizması, aurası var. Ronaldo sosial şəbəkələrdə ən məşhur insandır. Təsəvvür edin, o, böyük Hollivud ulduzlarının ortasında dayanır. Heç kəsə özünü sübut etməli deyil. Sadəcə deyə bilər: ‘Sən böyük ulduzsan, amma mən Cristiano Ronaldo. Futbol tarixinin ən yaxşılarından biriyəm. Milyardaram. Futbolda qazana biləcəyim hər şeyi qazandım. Bəs sən kimsən?’”

Petit hətta daha irəli gedir: “Oscar? Bir gün. Onun həyatı haqqında film çəkmək kifayətdir. Mən heç vaxt onun qədər güclü mentalitetə sahib biri görməmişəm. Bu adam mənə görə mental baxımdan gördüyüm ən güclü insandır”.

Şübhələri susduran karyera

Ronaldo karyerasını bir cümlə ilə təsvir etmək lazım olsa, bu belə səslənərdi: şübhə edənləri susdurmaq. Hər dəfə “artıq alınmaz” deyiləndə, o, yeni bir zirvə tapdı. Hər dəfə “bu, həddi keçdi” deyəndə, həmin həddi bir az da yuxarı qaldırdı.

Hollivuda getsə, eyni inad, eyni iş etikası, eyni ambisiya ilə ora da daxil olacaq. Oscar heykəlciyini qaldırmaq bu gün üçün bir az uzaq səslənə bilər. Amma bir vaxtlar da onun bu yaşda, bu səviyyədə oynayacağına, 1000 qola qaçacağına, 40 yaşdan sonra da milli komanda üçün hədəflər qoyacağına çoxları inanmırdı.

İndi sual başqa cür səslənir: Cristiano Ronaldo üçün həqiqətən limit varmı, yoxsa o, növbəti dəfə futbol meydanlarını tərk edib, bu dəfə kino səhnəsində dünyanı təəccübləndirməyə hazırlaşır?