De Zerbi Tottenham-da yeni transfer istəklərini açıqladı
Transfer pəncərəsinin son düzüyü, London klubunda isə hələ nöqtə qoyulmayıb. Roberto De Zerbi açıq danışır: Tottenham daha bir transfer görmək istəyir və baxışlar birbaşa Cody Gakpo üzərindədir.
Liverpool hücumçusuna maraq gizli deyil. Klubun holland forvardı üçün cəhdlərini pəncərənin son günlərində gücləndirəcəyi gözlənilir. Vaxt azdır, risk böyükdür, amma De Zerbi öz planına inanır.
Cümə günü media qarşısına çıxan italiyalı baş məşqçi hazırkı yay kampaniyasını belə dəyərləndirdi: “Belə bir transfer pəncərəsi gözləmirdim. Düşünürəm ki, konkret bir mövqedə daha bir oyunçu ala bilərik”.
Bu, sadəcə istək deyil, klub içində razılaşdırılmış xəttdir. De Zerbi danışır, rəhbərlik dinləyir.
“Dünən sahiblərlə, Johan (Lange, idman direktoru) və Vinai (Venkatesham, baş icraçı) ilə birlikdə şam yeməyində idik və bunu müzakirə etdik. Hamımız eyni fikirdəyik, aramızda çox yaxşı əlaqə var”, – deyə o əlavə edib.
Saat işləyir, Spurs isə hər iki istiqamətdə hərəkətdədir. Çərşənbə axşamı saat 23:00-da pəncərə bağlanana qədər klubun həm daxil olan, həm də çıxan transferlərlə məşğul olacağı gözlənilir. Getmək istəyənlər var və De Zerbi onlara yol xəritəsini çoxdan cızıb.
Mütəxəssis komandanın daxilindəki vəziyyəti gizlətmir: “Bütün oyunçularla çox aydın danışmışam: əgər açıq danışırsansa, sürpriz gözləyə bilməzsən. Getmək istəyənlər artıq gedib. Bəlkə hələ də getmək istəyən bir neçə oyunçumuz var, onlar gözləyir, biz də təklif gözləyirik”.
Burada təkcə taktika deyil, hisslər də işə qarışır. De Zerbi Tottenham-da qalmağın özlüyündə bir mesaj olduğunu vurğulayır: “Burada qalmaqdan qürur duymalısan. Yeni oyunçularla emosional bir layihə qururuq”.
Bu layihənin kənarında qala biləcək adlardan biri də Pape Matar Sarr-dır. Yay pəncərəsi boyunca maraq gördü, amma mövsümün ilk iki oyununda meydan üzü görməyib. Bu da sualları artırır: o, De Zerbinin planında yer alacaq, yoxsa son anda qapıdan çıxanlardan biri olacaq?
Baş məşqçi seneqallı yarımmüdafiəçi barədə qısa, amma anlamlı cavab verib: “Pape yaxşıdır, fiziki cəhətdən problem yoxdur. Transfer bazarının son günlərində onunla bağlı nə ola biləcəyinə baxmalıyıq”.
Bir tərəfdə Cody Gakpo kimi yüksək profilli hədəf, o biri tərəfdə gələcəyi havada qalan Pape Matar Sarr. Pəncərə bağlananda De Zerbinin “emosional layihəsi” daha aydın görünəcək – ya cəsarətli bir hücum gedişi ilə, ya da gözlənilməz itkilərlə. Spurs bu dəfə hansı riskə gedəcək?
