Ethan Nwaneri: Arsenal Gənc Ulduzunu İtirməyə Hazırlaşır
Yay pəncərəsinin son iki həftəsinə girərkən, Ethan Nwaneri ətrafında hava tamamilə dəyişib. Artıq bu, sadəcə gənc istedadın gələcəyi ilə bağlı sakit müzakirə deyil. Bu, ciddi transfer yarışıdır.
İtaliya, Almaniya, Türkiyə – hamısı sıradadır. Transfer jurnalisti Fabrizio Romano-nun məlumatına görə, gənc hücumçuya bu üç ölkədən bir neçə klub konkret maraq göstərir. Sıralamada önə çıxanlar isə adları özü kifayət edən nəhənglərdir: AC Milan və Türkiyə çempionu Galatasaray. Hər iki klub artıq rəsmi sorğu göndərib.
Milanın “10 nömrə” axtarışı
“Rossoneri” rəhbərliyi hücum xəttində çox dəqiq profil axtarır: hücumçunun arxasında, cərimə meydançası ətrafındakı ciblərdə oynaya bilən, xüsusən də sağ zonaya girib oradan fərq yaradan yaradıcılıq mərkəzi. Skautların cavabı isə aydındır – Nwaneri.
Onlar ingilis gəncini hücumameylli yarımmüdafiə üçün yaradıcı həll kimi görürlər. Yəni Milan üçün bu, sadəcə perspektivli gəncə yatırım deyil, hazır sistemdə konkret boşluğu doldurmaq cəhdidir.
Avropadan Premyer Liqaya – dairə daralır
Avropadan gələn təkliflər manşetləri tutsa da, Arsenal üçün işin ən çətin hissəsi indi başlayır. Çünki mübarizəyə daxili rəqiblər də qoşulub. Məlumatlara görə, bir neçə Premyer Liqa klubu artıq qərarını verib və onun transferi üçün “all in” gedir.
Bu maraq dalğası elə bir vaxtda yüksəlir ki, Nwaneri-nin birinci komandaya yolu getdikcə daralır. Komandada artıq öz yerini möhkəmləndirmiş ulduzlar var, gənc isə həmin divarı tam aşa bilmir. 19 yaşlı cinah oyunçusu indiyədək Premyer Liqada 24 oyunda 4 qol vurub. Rəqəmlər partlayış deyil, amma istedadın parlaq anlarını göstərməyə kifayət edir.
Community Shield sonrası qopmuş fırtına
Nwaneri-nin gələcəyi ilə bağlı söz-söhbətlər, Arsenal-ın Manchester City üzərində Community Shield qələbəsindən sonra pik həddə çatdı. Gəncin heyətdə olmaması diqqətdən yayınmadı. Mikel Arteta seçimlərin məhdud yerlərə görə edildiyini desə də, bu qərar çoxları üçün aydın siqnal idi: hazırkı iyerarxiyada Nwaneri arxa plandadır.
Fabrizio Romano isə pərdəni tam qaldırdı: “Ethan Nwaneri yay transfer pəncərəsi bağlanmadan Arsenal-dan ayrılacaq, həftələr öncə planlaşdırıldığı kimi. O, Man City-yə qarşı oyunda ehtiyat skamyasında belə yoxdur, halbuki yay hazırlıq dövründə komandayla idi”.
Bu cümlə ilə proses artıq şayiə olmaktan çıxdı. Ayrılıq, sadəcə, vaxt məsələsidir.
İki həftə, üç istiqamət
Qarşıdakı iki həftə Nwaneri üçün karyerasının indiyədək ən ağır seçim dövrü olacaq. İtaliya və ya Almaniya variantı – yeni mühit, fərqli taktiki mədəniyyət, daha səbirli inkişaf imkanı deməkdir. Premyer Liqada qalmaq isə tanış ritm, tanış rəqiblər, amma eyni zamanda böyük təzyiq və gözləntilər anlamına gəlir.
Arsenal isə qərarını artıq verib: klub gənc oyunçunu hələ də yüksək dəyərləndirir. Onların möhkəm qiymət qoyması və klassik “loan-to-buy” (icarə + satınalma opsiyası) təkliflərini qəbul etməməsi bunu açıq göstərir. London klubu Nwaneri-ni 2026–27 mövsümü üçün planlarında görməsə də, onun dəyərini ucuzlaşdırmaq niyyətində deyil.
İndi sual təkcə budur: bu istedad partlayışını hansı meydanda edəcək – San Siro işıqları altında, Bundesliga sürətində, İstanbulun təzyiq dolu tribunalarında, yoxsa yenə də Premyer Liqanın tanış, amma amansız səhnəsində?
