Fransa müdafiə xəttində dəyişiklik: Konaté geriləyir, Lacroix irəliləyir

Dünya çempionatına sayılı günlər qalıb və Fransa millisində ən az müzakirə açmalı mövqe mərkəz müdafiə xətti olmalı idi. Kağız üzərində hər şey aydındır: William Saliba – Dayot Upamecano cütlüyü Deschamps-ın birinci seçimidir. Sabit, aqressiv, topa münasibətdə inamlı. Kağız üzərində.

Reallıq isə bir az fərqlidir. Saliba uzun müddətdir bel ağrıları ilə oynayır və “L’Équipe”in məlumatına görə, turnirdən dərhal sonra əməliyyat masasına uzanması ehtimalı masadadır. Bu, sabahın problemidir. Bu gün isə Deschamps-ın qarşısında daha sərt sual dayanır: üçüncü mərkəz müdafiəçisi kim olacaq?

Konaté-nin enişi

Bu rol uzun müddət İbrahima Konaté-yə aid idi. Liverpool formasında parladığı dövrlərdən sonra o, təbii olaraq “Les Bleus” üçün də əsas ehtiyat variant sayılırdı. Yayda Real Madrid-ə keçməyə hazırlaşan müdafiəçi üçün bu mövsüm fərqli ssenari yazıldı.

Çətin mövsüm, zədələr, ritm itkisi, özünəinamın dalğalanması – klubdakı eniş yığmada da özünü göstərdi. Dünya çempionatına hazırlıq oyunlarında Konaté-nin hər səhvi, hər gecikmiş müdaxiləsi diqqət çəkdi. Təzyiq artdıqca onun oyunu açılmadı, əksinə, daha da ağırlaşdı.

Nəticə gecikmədi. “L’Équipe” yazır ki, Deschamps artıq onu “birinci ehtiyat” statusundan geri çəkib. Formal qərar hələ elan olunmayıb, amma meydanda verilən siqnallar hər şeyi deyir.

Lacroix səhnəyə çıxır

Bu boşluğu dolduran ad: Maxence Lacroix. Crystal Palace müdafiəçisi səssiz-sədasız gəldi, amma fürsəti səs-küylə ələ keçirdi.

Şimali İrlandiyaya qarşı 3:1 hesablı qələbədə bunun açıq işarəsini görmək mümkün idi. Fasilədə Saliba oyunu tərk edəndə hamı baxışlarını təbii olaraq Konaté-yə çevirdi. Amma texniki zonadan çıxan başqa biri oldu. Deschamps seçim etdi – meydançaya Lacroix daxil oldu, Konaté isə kənarda qaldı.

Bu, sadəcə dəyişiklik deyildi. Bu, iyerarxiyanın yenidən yazılması idi.

Lacroix-in üstünlüyü nədir? Sürət, birə-bir duelərdə aqressivlik, arxaya atılan toplara qarşı ayıqlıq. O, risk etməyi sevir, amma bu risk nəzarətsiz deyil. Deschamps üçün, xüsusən də Saliba-nın fiziki durumu sual altındaykən, bu dinamika cəlbedici görünür.

Deschamps üçün incə balans

Baş məşqçi üçün məsələ təkcə forma göstəricisi deyil. Dünya çempionatında üçüncü mərkəz müdafiəçisi tez-tez ilk iki nəfərdən birinin yerinə meydanda olur – ya zədə, ya cəza, ya da sadəcə rotasiya səbəbi ilə. Yəni bu rol kağız üzərində “ehtiyat” kimi görünə bilər, amma praktikada həlledici anlara təsir edən mövqedir.

Saliba belindəki ağrıları idarə etməyə çalışır, Upamecano intensiv təqvimdən gəlir. Deschamps risk edə bilməz. O, hazır, ritmdə, psixoloji cəhətdən sərt futbolçuya üstünlük verməlidir. Hazırda bu profilə daha çox Lacroix uyğun gəlir.

Konaté-nin adı, keçəcəyi klub, potensialı – hamısı təsirli faktorlardır, amma meydanda son sözü formada olan deyir. Deschamps da məhz ora baxır.

Fransanın müdafiə xətti bir müddətdir sabit güc mənbəyi kimi təqdim olunurdu. İndi isə səssiz, amma kəskin bir dönüş yaşanır. Suallar çoxdur: Saliba əməliyyata qədər nə qədər dözəcək? Upamecano yükü nə dərəcədə daşıya biləcək? Lacroix bu etimadı turnirin təzyiqi altında da doğruldacaqmı?

Və ən əsası – Konaté bu enişdən geri dönüş üçün nə qədər gücə sahibdir? Dünya çempionatında cavab tapılacaq suallardan biri də budur.