Frenkie de Jong-un Barselonadakı Gələcəyi: Son Mövsüm Ssenarisi
Frenkie de Jong-un Barselonadakı gələcəyi yenidən sual altındadır. Niderlandlı jurnalist Valentijn Driessen-in iddiasına görə, yarımmüdafiəçi Kataloniya nəhəngi ilə son mövsümünə çıxmış ola bilər.
Bu dəfə söhbət yalnız şayiələrdən getmir. Klubun mərkəz xəttinə Rodri-nin gətirilməsi, üstəlik De Jong-un davamlı zədələri onun statusunu əvvəlkindən xeyli daha kövrək hala salıb.
Driessen “De Telegraaf”ın podkastında bildirib ki, bu amillərin cəmi niderlandlı futbolçunun 2026/27 mövsümündən sonra artıq “Barça” formasında olmayacağına işarə edir:
“Çox zədələnib, ondan əvvəl də qurtulmaq istəmişdilər, indi isə Rodri-ni gətirirlər. Zədəlidirsə, hazırda onu satmağa çalışdıqlarını düşünmürəm – bunu təsəvvür edə bilmirəm – amma fikrimcə, bu, onun “Barça”dakı son mövsümüdür”.
Rodri gəlir, rol dəyişir
De Jong illərdir açıq şəkildə deyir: karyerasını Barselonada başa vurmaq istəyir. Amma klubun son addımı bu arzunu xeyli çətinləşdirir.
Barselona dünya futbolunun ən təcrübəli mərkəz yarımmüdafiəçilərindən birini heyətə qatıb. İspaniya millisinin üzvü Rodri-nin Hansi Flick-in planlarında mərkəzi rol alacağı gözlənilir. Bu, birbaşa De Jong-un meydandakı mövqeyinə toxunur.
Driessen düşünür ki, Rodri-nin gəlişi avtomatik olaraq De Jong-un zədəli ikən satışa çıxarılması demək deyil. Amma rəqabətin sərtləşməsi, niderlandlı futbolçunun komandadakı çəkisini tədricən azalda bilər:
“O, karyerasını Barselonada başa vurmaq istəyirdi, amma bu, çox az futbolçuya nəsib olan bir imtiyazdır. Elə oyunçu deyil ki, 35 yaşına qədər “Barça”da daim əsas heyət üzvü kimi qalsın. Yəni karyerasının sonunu orada görməyəcək”.
Jurnalist həmçinin De Jong və Rodri-nin mütəmadi olaraq eyni start heyətində oynaya biləcəyinə də şübhə ilə yanaşır:
“Oynamağa davam etmək üçün hər dəfə performans göstərməlisən. Sənin mövqeyinə əla bir oyunçu gəlirsə, onların ikisinin birlikdə oynamasını təsəvvür edə bilmirəm”.
De Jong üçün yeganə çıxış yolu: taktiki yenidən doğuluş
Driessen-in fikrincə, indi De Jong-un taleyini müəyyən edəcək əsas məsələ uyğunlaşma qabiliyyətidir.
Niderlandlı futbolçu karyerasını daha çox topa nəzarət edən, dərinlikdən driblinqlə irəli çıxan, müdafiə ilə hücum arasındakı körpünü quran oyunçu kimi qurub. Yəni klassik “orqanizator” rolunda.
Rodri ilə yanaşı oynamaq üçün isə jurnalist hesab edir ki, De Jong daha irəli, daha hücumameyilli mövqeni mənimsəməlidir. Amma o, bu dəyişikliyin real olacağına inanmır:
“Bəlkə cəhd edə bilər, amma daha hücumçu olmalıdır və ona qarşı tənqid də həmişə bu olub: bunun çatışmazlığı. Heç vaxt bacarmayıb”.
Burada söz artıq Hansi Flick-ə keçir. Alman mütəxəssis orta xəttdə müxtəlif profilli bir neçə oyunçuya sahibdir və De Jong qayıtdıqdan sonra seçəcəyi sistem çox şeyi müəyyənləşdirəcək.
Rodri-nin gəlişi De Jong-u avtomatik olaraq ehtiyat skamyasına göndərmir. Amma bir həqiqət dəyişmir: Barselonanın mərkəz xəttində rəqabət indi əvvəlkindən qat-qat sərt olacaq.
Bu sıxlıqda De Jong özünü yenidən kəşf edəcək, yoxsa Barselonadakı hekayəsi doğrudan da bu mövsümlə bitəcək?
