Hugo Ekitike-dən Ibrahima Konaté-yə çağırış: “Signe, frère”

Ibrahima Konaté-nin “Liverpool”dan ayrılacağı xəbəri fonunda “Anfield”də gözlənilməz bir səs yüksəldi. O səs də elə komanda yoldaşına meydandan yox, “Instagram”dan səslənən Hugo Ekitike idi.

Mərkəz müdafiəçisinin yeni müqavilə danışıqları dalana dirənib, klub isə fransız futbolçunun bu yay azad agent kimi getməsinə hazırlaşır. Bu, “Liverpool” azarkeşlərinin heç eşitmək istəmədiyi cümlədir. Amma Konaté Fransa millisinin toplanışına qatılarkən paylaşdığı sadə bir foto, əslində, bu hekayəni yenidən alovlandırdı.

Şəkil – milli komandanın düşərgəsinə gəliş anı. Şərhlər isə təkcə Fransa azarkeşlərindən yox, “Liverpool” tərəfdarlarından da dolub-daşırdı: “Qal”, “Müqaviləni imzala”, “Səni itirə bilmərik”. Tələb aydındır: Konaté getməməlidir.

Və həmin şərhlərin birinə Ekitike-nin reaksiyası diqqəti dərhal çəkdi. O, Konaté-yə ünvanlanan “müqaviləni imzala” çağırışına fransızca, “signe frere” – “imzala, qardaş” sözləri və iki gülən emodzi ilə cavab verdi. Qısa, zarafatcıl, amma bir o qədər də açıq mesaj. Komanda yoldaşının yalnız azarkeşlərin yox, həm də paltardəyişmə otağının istədiyi adam olduğunu göstərən jest.

“Burada qalma ehtimalım böyükdür” – amma...

Bir neçə həftə əvvəl tablo tamam başqa idi. Konaté özü də “Liverpool”da qalmağa yaxın olduğunu deyirdi. O, “Everton” üzərində qələbədən sonra Hill Dickinson Stadium-un qarışıq zonasında jurnalistlərin qarşısına çıxanda sözləri kifayət qədər inamlı səslənirdi:

“Əminəm, gələn mövsüm burada olma ehtimalım böyükdür. Mən həmişə bunu istəmişəm. Müqavilənin həll olunmasını gözləyirəm, hər şey bitəndən sonra Richard (Hughes)-a sentyabrda, noyabrda ona nə dediyimi soruşarsınız, o da hamını sakitləşdirəcək bir cavab verəcək”.

Konaté sanki pərdəarxası dialoqlara işarə edir, aylarla davam edən söhbətlərin onu “Anfield”də saxlayacağına inanırdı:

“Hər şey həll olunanda, istəyərdim Richard (Hughes)-la söhbət edəsiniz və bir neçə ay əvvəl, hamı danışmağa başlamazdan əvvəl ona nə dediyimi soruşasınız. O cavab verəndə hər şeyi görəcəksiniz. Mən sadəcə bunu istəyirəm”.

O vaxt bu cümlələr “qalacaq” başlıqlarını doğururdu. Amma müqavilə imzalanmadı. İndi isə gözlənti tam əksinədir – Konaté-nin yayda azad agent kimi yola çıxacağı düşünülür.

Liderlik missiyası yarımçıqmı qalır?

Bu ayrılığın mümkünlüyü təkcə müdafiə xəttini zəiflətmir. Arne Slot-un komandasında liderlik xəttinə də zərbədir. Çünki fransız müdafiəçi özü də artıq bu rolu daşıdığını açıq şəkildə dilə gətirirdi:

“Mən artıq bu komanda üçün, gənc oyunçular üçün və açığı, hamı üçün liderəm”, – deyirdi o.

Onun sözlərində “növbə bizə çatdı” hissi vardı:

“Bilirik ki, bu, futbol həyatının bir hissəsidir. Əfsanələr bir gün gedəcək və sonra liderlik növbəsi bizə gələcək. Mən artıq bu prosesi başlamışam və bu, böyük məsuliyyətdir”.

Konaté bu məsuliyyəti yalnız şəxsi ambisiya kimi yox, klubun gələcəyi kimi görürdü:

“Biz bu cür şanslara sahib olmaq, bu möhtəşəm klub üçün hər şeyin qaydasında olmasını təmin etmək üçün futbol oynamağa başlayırıq. Amma mənə hamının köməyi lazımdır”.

İndi isə sual dəyişib: “Liverpool” bu liderlik iddiasını gerçək kapitallara çevirə biləcəkdimi, yoxsa bu, sadəcə yarımçıq qalan bir layihə kimi tarixə düşəcək?

Beş ilin sonu və açıq qapılar

Konaté 2021-ci ildə “RB Leipzig”dən “Liverpool”a qoşulanda, klubun uzunmüddətli müdafiə sütunu kimi təqdim olunurdu. Beş il sonra “Anfield”lə yolların ayrılması real ssenariyə çevrilib.

Bir şey isə dəqiqdir: o, azad agent kimi bazara çıxsa, təklif qıtlığı yaşamayacaq. “Real Madrid” və “PSG” kimi nəhənglərin adı artıq onunla yanaşı çəkilir. Mərkəz müdafiəçisi üçün bu səviyyədə azad transfer imkanı, futbol karyerasında nadir rast gəlinən fürsətdir.

Eyni anda “Liverpool” üçün də bu, acı reallıqdır: dəyəri yüksək olan, liderlik iddiası daşıyan, ən yaxşı yaş dövründəki müdafiəçini pulsuz itirmək riski.

Hugo Ekitike isə bu fonda sadə, amma çox şey deyən bir cümlə yazdı: “Signe, frère”.

Bu çağırış eşidiləcək, yoxsa Konaté-nin “Anfield”dəki hekayəsi elə bu yay, azarkeşlərin “qal” deyə qışqırdığı anda bitəcək?