Huijsen: Real Madrid-in yeni müdafiə lideri
Yeni mövsüm qapını döyür, Madrid isə artıq qaynamaqdadır. Yayda altı yeni transferlə heyətini yeniləyən Real Madrid, start fitinə ən çox baxılan komandalardan birinə çevrilib.
Jose Mourinho hazırlıq prosesindən razıdır, amma mövsüm ərəfəsində onu bir neçə ağır seçim gözləyir. Ən kəskin sual isə mərkəz müdafiəsindədir.
Konate gəldi, rəqabət alovlandı
Yayda gətirilən Ibrahima Konate mərkəzdə rəqabəti tam başqa səviyyəyə qaldırdı. Artıq həmin zonada Dean Huijsen, Antonio Rüdiger, Éder Militao və Konate bir-biri ilə yer uğrunda mübarizə aparacaq.
Kağız üzərində seçim çoxdur. Amma hazırda bir ad digərlərindən yarım addım öndə görünür.
Sol tərəfdə favorit: Huijsen
İspaniyanın aparıcı nəşrlərindən olan MARCA-nın məlumatına görə, bu an üçün Huijsen, komandanın əsas sol mərkəz müdafiəçisi postu üçün bir nömrəli namizəddir.
Bunun məntiqi izahı var. Huijsen heyətdə hər iki ayağı ilə rahat oynaya bilən yeganə mərkəz müdafiəçisidir, sırf sağaxın deyil. Bu da ona xüsusilə sol tərəfdə böyük üstünlük verir.
Son həftələrdə qazandığı ritm də seçimə təsir edir. Deportivo La Coruna ilə yoxlama görüşündə göstərdiyi oyun, bu üstünlüyü daha da gücləndirdi.
Teresa Herrera gecəsi: “Bu mövqeyə mən hazıram”
Mourinho-nun rəhbərliyi altında ilk dəfə start heyətində meydana çıxdığı Teresa Herrera turnirində Huijsen müdafiəni demək olar ki, təkbaşına idarə etdi.
Yeddi uğurlu müdafiə hərəkəti, bircə uduzulmuş duel belə yox. Rəqəmlər quru deyil, həmin gecənin atmosferini təsdiqləyən faktlardır.
O performans klub daxilindəki inamı yenidən alovlandırdı: Huijsen hələ də “Real Madrid” müdafiəsinin mübahisəsiz startçısı və uzunmüddətli dayağına çevrilə biləcək potensiala sahibdir.
“Dörd nömrə”nin məsuliyyəti
Məsələ yalnız meydandakı oyunda deyil. Huijsen-in artan çəkisi nömrə seçimində də özünü göstərdi. David Alaba-nın gedişindən sonra o, klub tarixində simvolik yeri olan 4 nömrəni götürməyi seçdi.
Bu rəqəm Madrid üçün sadəcə forma üzərindəki işarə deyil. Sergio Ramos, Fernando Hierro kimi əfsanələrin daşıdığı nömrədir. Huijsen bu yükdən qaçmadı, əksinə, onu qucaqladı.
Onun sosial şəbəkədə yazdığı sözlər də bunu açıq göstərir: uşaqlıqdan arzusu “Real Madrid” forması və məhz bu nömrə olub, idolu isə həmişə Sergio Ramos sayılıb.
Bu, gənc müdafiəçinin özünü hansı rolun içində gördüyünü çox açıq göstərir: liderlik.
Tək maneə: bədən bəzən “yox” deyir
Amma bir böyük “əgər” qalır. Huijsen-in zədələrə meylliliyi.
Ötən mövsüm məhz bu səbəbdən onun ritmini pozdu, üstəlik, İspaniyanın Dünya çempionatı heyətindən kənarda qalmasına gətirdi. Bədəni onu yarı yolda qoydu.
Keçən həftənin böyük hissəsində yenə fərdi məşqlərlə kifayətlənməsi, narahatlığının davam etməsi də bunun təsadüfi olmadığını göstərir. Fiziki durum hələ də həllini gözləyən əsas məsələdir.
Mourinho üçün tablo aydındır: taktiki cəhətdən, topa münasibətdə, xarakterdə Huijsen artıq start heyəti səviyyəsindədir. İndi sual yalnız budur – bədəni bu ambisiyaya nə qədər dözəcək? Yeni mövsümün cavabı, bəlkə də, “Real Madrid”in bütün müdafiə xəttinin taleyini müəyyən edəcək.
