Hull City Premyer Liqaya Qayıdışını Qələbə ilə Başladı

Premyer Liqanın açılış turu, kağız üzərində sadə görünürdü. Elitaya 2017-dən bəri ilk dəfə qayıdan, mövsüm başlamamış “aşağı düşənlər” siyahısına yazılan Hull City, mövsümə iddialı başlayan Manchester United-i qəbul edirdi. Amma meydanda başqa ssenari yazıldı.

Hull City 2:0 hesablı qələbə ilə geri dönüşünü elan etdi, Michael Carrick isə ilk turdan soyuq duş aldı.

Ajayi erkən zərbə vurdu

Oyunun cəmi 17-ci dəqiqəsi idi. United hələ ritm axtarırdı, Hull isə artıq inanmağa başlamışdı. Semi Ajayi-nin vurduğu qol tribunaları alovlandırdı və mövsüm başlamamış “autsayder” elan edilən komanda üçün ton verdi.

United-in reaksiyası? Topa daha çox sahibolma, amma dişsiz hücumlar. Hull isə hər qalib duelin dadını çıxarır, meydanın hər qarışında aqressiv görünürdü.

Təzyiq 38-ci dəqiqədə öz bəhrəsini verdi. Nobel Mendy cərimə meydançasında yüksəlib başla vurdu və hesabı 2:0 etdi. Birinci hissə bitəndə tablo United üçün ağır, Hull üçün isə inanılmaz dərəcədə ümidverici görünürdü.

İkinci hissədə Carrick-in komandası fərqi azaltmağa çalışsa da, sanki ideyalar tükənmişdi. Nə ritm artdı, nə də yaradıcılıq. Hull üstünlüyünü qorudu və Premyer Liqaya qayıdışını “təmiz” qələbə ilə qeyd etdi.

Carrick: “Sakitlik xaosdan daha vacibdir”

Meydanı məyus halda tərk edən tərəf United idi, amma Michael Carrick panikadan uzaq durdu. O, nəticəni gizlətmədi, amma dramatizasiya da etmədi.

“Ola biləcək ən böyük məyusluqlardan biridir, təbii ki, belədir, bura qələbə üçün gəlmişdik, heç nə ilə qayıtmaq çox məyusedicidir,” – deyə o bildirib. – “Nə bundan çox, nə də az. Bunu içimizdə həzm etməli və daha güclü qayıtmalıyıq.”

Carrick məğlubiyyətin kursu dəyişməyəcəyini açıq dedi: “Uduzmağımız o demək deyil ki, passivik. Nəticə – nəticədir. Qəbul edirik, xoş hiss deyil, amma bu, komanda və klub olaraq istiqamətimizi dəyişməyəcək. Belə şeylər ola bilər, biz daha yaxşı ola bilərik. Elə anlar oldu ki, pis deyildik.”

O, xüsusilə rəqibin qurduğu sistemə qarşı çətinlikləri vurğuladı: “Fərqli sistemlərə qarşı oynayanda müəyyən problemlər olur və biz buna cavab tapmalıyıq.”

Carrick uzun illər bu səviyyədə futbolçu kimi yaşadığı dalğalanmaları xatırlatdı: “Burada uzun müddət oynamışam, eniş-yoxuşsuz mümkün deyil. Amma normal davam etməlisən. Hamımız qışqırıb bağırmalı, süni xaos yaratmalı deyilik. Sakitlik emosiyasızlıq demək deyil. Bir oyun uduzmuşuq və xoş məğlubiyyət deyil.”

Bir turdan sonra panika yoxdur. Amma xəbərdarlıq siqnalı artıq çalıb.

Jakirovic: “Onları inandırmalı idim ki, bu səviyyəyə layiqdirlər”

Digər tərəfdə isə tam fərqli ab-hava var idi. Hull City baş məşqçisi Sergej Jakirovic üçün bu qələbə sadəcə üç xal deyildi. Bu, bütün ölkənin gözləntilərinə meydan oxuyan bəyanat idi.

“Oyundan çox məmnunam, futbolçularımız bu gün meydanda nə var idisə, hamısını qoydular, necə danışmışdıqsa, elə də oynadılar. Həftəboyu bunun üzərində çalışmışdıq və nəticə budur, bunun üçün çox, çox məmnunam,” – deyə o bildirib.

Jakirovic-in fikrincə, əsas silahları inamdır: “Bu, gələcək üçün böyük itələmədir. Bütün həftə komandaya qalib gələ biləcəyimizi deyirdim. Bəlkə də əsas məqam budur – oyunçularımı inandırmalı idim ki, bu səviyyədə oynamağa qadirdirlər.”

O, ötən mövsümün də təsadüfi olmadığını xatırlatdı: “Keçən mövsüm göstərdik ki, mental cəhətdən çox güclüyük və hər kəslə rəqabət apara bilərik, bəlkə də açar budur. Bu qələbə möhtəşəmdir, çünki indi onlar özləri inanırlar ki, bu səviyyədə rəqabət apara bilərlər.”

Jakirovic eyni zamanda bu nəticənin transfer bazarına da təsir edəcəyini düşünür: “İndi gələcəklər, 100%. Heç bir şübhəm yoxdur.”

Mövsümün ilk mesajı

Bir tərəfdə gözləntiləri yüksək olan, amma ilk oyunda ilişən Manchester United. Digər tərəfdə isə mövsüm başlamadan silinən, amma ilk gündən dişini göstərən Hull City.

Bir matçla heç nə həll olunmur. Amma bəzən elə ilk turda verilən mesaj mövsümün tonunu müəyyənləşdirir.

Hull City bu tonun içində olacaqmı, yoxsa bu, sadəcə parlaq başlanğıc kimi yadda qalacaq? Premyer Liqanın qalan hissəsi bu sualın cavabını verəcək. Carrick və United üçün isə artıq cavab gözləmək yox, cavab vermək vaxtıdır.