Hull City-nin Premyer Liqaya yüksəliş iddiası: İlicalı xaosun içində

Championship-in ən qalmaqallı mövsümlərindən birində Acun İlicalı qaydaların arasından öz yolunu görür: Hull City-nin sahibi hesab edir ki, bu xaosun ən məntiqli həlli “Pley-off finalı”nı keçmək, “Tigers”i birbaşa Premyer Liqaya göndərməkdir.

Southampton-ın rəqib məşqlərini gizli izlədiyinə görə yarışdan qovulması bütün sistemi alt-üst edib. EFL, yarımfinalda uduzmasına baxmayaraq, finalda boş qalan yeri Middlesbrough-a verib. Kağız üzərində qərar aydındır. Meydanda isə tam başqa hekayə yazılır.

İlicalı isə hesab edir ki, bu hekayənin əsas qəhrəmanı Hull-dur – və onlar artıq finala çıxmış yeganə “orijinal” komandadır, yenidən rəqib axtarmağa borclu deyillər.

“Hüquqşünaslarımız deyir ki, birbaşa Premyer Liqa”

Türkiyəli iş adamı mövqeyini “Asist Analiz”ə danışarkən açıq şəkildə ortaya qoydu. Onun sözlərinə görə, klubun hüquq komandası artıq hüquqi boşluqları axtarır:

“Normal şəraitdə iki komanda finala çıxıb və onlardan biri diskvalifikasiya olunub. Hüquqşünaslarımızın fikri budur ki, biz birbaşa Premyer Liqaya yüksəlməliyik, amma indi bunu detallı şəkildə araşdırırlar. Qəti bir şey deyə bilmərik. Vəziyyət bir az qarışıqdır”.

Qarışıqlığın kökü isə sadədir: Southampton yarımfinaldan əvvəl Middlesbrough-un məşqlərinə intern göndərdiyini etiraf edib. Qaydaların kobud pozuntusu, amma cəza – misilsiz dərəcədə sərt. Klub pley-offdan kənarlaşdırılıb, üstəlik gələcək mövsüm üçün xal silinməsi qərarı verilib.

Southampton rəhbərliyi, xüsusilə də klubun icraçı direktoru Phil Parsons, bu həftəki qərarın apellyasiyaya göndərildiyini artıq təsdiqləyib. Onların arqumenti kəskindir: bu cəza İngiltərə futbolunda indiyə qədər görünməmiş dərəcədə ağırdır.

Hull üçün “idman ədalətsizliyi”

Bu müddətdə Hull City özünü boşluqda qalmış kimi hiss edir. Komanda bir həftədən artıq vaxtını tək bir rəqibə – Southampton-a qarşı plan qurmağa sərf edib. Analiz, video, məşq planları, xüsusi tapşırıqlar – hamısı bir komanda üçün hazırlanıb. Sonra isə lövhədə rəqibin adı silinib, yerinə Middlesbrough yazılıb.

İlicalı üçün bu, sadəcə narahatlıq deyil, açıq-aşkar idman ədalətsizliyidir. Onun fikrincə, belə şəraitdə Hull-a avtomatik yüksəliş haqqı verilməlidir.

O, komandanın hazırlığının necə alt-üst olduğunu detallı şəkildə təsvir edir:

“Biz 10 gündür Southampton-a hazırlaşırdıq. Bütün planlama, analiz, görülən iş onların üzərində qurulmuşdu. İndi isə finala bu qədər az gün qalmış rəqib dəyişib. Sabah futbolçular istirahətdədir, cümə axırıncı ciddi məşqdir. Yeni rəqibə cəmi bir məşqlə hazırlaşacağıq”.

Bir məşqlə 200 milyon funtluq oyuna çıxmaq. Premyer Liqaya gedən yol bu qədər daralmışkən, hər detalın dəyəri artır.

Southampton özünü müdafiə edir, Hull isə özünü qurban sayır

Southampton rəhbərliyi diqqəti cəzanın “proporsional” olmamasına yönəldir. Onlar xatırladırlar ki, 2019-cu ildə Leeds United-ın məşq izləmə qalmaqalı yalnız maliyyə cəzası ilə nəticələnmişdi. İndi isə söhbət təkcə puldan getmir – pley-offdan uzaqlaşdırılmaq, təxmini dəyəri 200 milyon funtdan çox olan oyundan məhrum edilmək, üstəlik gələcək mövsümə də damğa vuran cəza.

Southampton özünü haqsızlıqla üz-üzə qalmış klub kimi göstərir.

Hull isə tamam başqa bucaqdan baxır. Klub rəhbərliyi hesab edir ki, bu dramın əsas zərərçəkəni məhz onlardır. Onların arqumenti sadədir: “lucky loser” – yarımfinalda uduzub, amma masa arxasında finala çıxarılan Middlesbrough-la bu qədər qısa müddətdə final oynamaq pley-off sisteminin bütövlüyünü zədələyir.

Təqvim isə dayanmır. Final hələ də 23 may üçün planlaşdırılıb. Stadion, logistika, azarkeşlərin planları – hamısı bu tarixə kilidlənib. Kağız üzərində hər şey hazırdır, amma məhkəmə və apellyasiya prosesləri bu oyunu hər gün bir az daha qeyri-müəyyənliyə sürükləyir.

Premyer Liqaya gedən yol bu qədər dolaşıq olmamışdı. İndi sual budur: bu xaosun sonunda qapı kimin üzünə açılacaq – qaydaların sərt təfsirinə dirənən Southampton-ın, hüquqi boşluqları tutmağa çalışan Hull City-nin, yoxsa sadəcə “şanslı məğlub” Middlesbrough-un?