İtaliya millisində zəlzələ: Paolo Maldini istefa verdi
İtaliya yığmasının texniki layihəsi daha start götürməmiş dağıldı. Paolo Maldini cəmi iki həftə davam edən texniki direktorluq vəzifəsindən istefa verdi. Onunla birlikdə əsas məsləhətçisi Leonardo da getdi. Səbəb – baş məşqçi seçimi üstündə yaranan açıq toqquşma.
FIGC prezidenti Giovanni Malagò ilə Maldini-Leonardo tandemi arasında yaşanan fikir ayrılığı, nəhayət, qırılma nöqtəsinə çevrildi.
Pirlo üstündə qopan qığılcım
Maldini və Leonardo ilk gündən kursu Andrea Pirloya yönəltmişdi. Onlar keçmiş yarımmüdafiəçini İtaliya millisinin yeni siması kimi görürdü. Lakin Malagò bu varianta qapını bağladı.
Səbəb meydandakı taktika yox, meydandan kənardakı imic idi. Pirlo hazırda Rusiya mənşəli mərc şirkətinin brend səfiridir və bu, İtaliya futbolunda siyasi müstəvidə güclü mənfi reaksiya doğurub. FIGC rəhbərliyi həmin dalğanın altına girmək istəmədi və Pirloya “yox” dedi.
Maldini və Leonardo isə bunu təkcə siyasi həssaslıq kimi yox, öz səlahiyyətlərinə açıq müdaxilə kimi qəbul etdilər.
Conte və Mancini: təklif olunan, amma qəbul olunmayan adlar
Malagò, Pirloya alternativ kimi, iki böyük adı önə çəkdi: Antonio Conte və Roberto Mancini. Kağız üzərində hər ikisi güclü namizəddir, amma Maldini-Leonardo cütlüyü hər ikisinə qapalı idi.
Conte ilə bağlı şübhə sadə idi: dözümlülük. O, karyerası boyu demək olar ki, hər iki ildən bir klub dəyişib. Maldini və Leonardo 2030 Dünya Çempionatına dörd il qalmış bu qədər tez-tez dəyişən fiqura millini əmanət etməyi riskli sayırdı. Onlar uzunmüddətli layihə istəyirdilər, qısa “şok terapiya” yox.
Mancini məsələsində isə iş daha həssas idi. Gazzetta-nın yazdığına görə, Maldini və Leonardo 2023-cü ildə baş verən ayrılığın üstündən asan keçmək istəmirdilər. Mancini Euro 2024 seçmə mərhələsinin ortasında, komanda hələ mübarizənin içindəykən istefa verib, az sonra Səudiyyə Ərəbistanı millisinin sükanı arxasına keçmişdi. Onların arqumenti aydın idi: Pirloya qarşı irəli sürülən etibar və imic sualları Mancini üçün də eyni dərəcədə keçərlidir.
Beləliklə, FIGC-nin israrla masaya qoyduğu iki əsas namizəd Maldini və Leonardonun süzgəcindən keçmədi.
Thiago Motta cəhdi və bağlanan qapı
Bu gərgin fonun içində Maldini-Leonardo cütlüyü öz alternativini irəli sürdü. Onlar ex-Juventus və Bologna çalışdırıcısı Thiago Motta-nı təklif etdilər. Daha müasir futbol fəlsəfəsinə sahib, yüksələn məşqçi profili. Onların baxışına görə, uzunmüddətli layihə üçün ideal fiqur.
Amma bu qapı da bağlandı. Məlumata görə, Malagò Motta variantını da rədd etdi. Beləliklə, Maldini və Leonardo üçün həm Pirlo, həm də onların “plan B”si sistemdən kənara atılmış oldu.
Həmin gün – bazar ertəsi – tərəflər arasında son görüş keçirildi. Masanın bir tərəfində Maldini və Leonardo, o biri tərəfində Malagò. FIGC prezidenti onları Pirlodan imtina edib, Conte və ya Mancini üzərində dayanmağa razı salmağa çalışdı. Amma tərəflər ortaq nöqtə tapa bilmədi.
İstefanın arxasındakı əsas mesaj
Bu dialoqdan sonra Maldini və Leonardo qərarını verdi. Onlar FIGC-nin baş məşqçi seçimində özlərini formal fiqur, imzası təsdiq üçün lazım olan adlar kimi görmək istəmədilər. Pirloya “yuxarıdan” qoyulan veto, Motta-nın rədd edilməsi və Conte-Mancini israrı, onların gözündə, texniki rəhbərliyə verilmiş avtonomiyanın kağız üzərində qaldığını göstərdi.
Nəticə: hər iki isim istefa ərizəsini təqdim etdi. Maldini-nin İtaliya millisində texniki direktor kimi dönəmi cəmi iki həftə davam etdi. Futbol tarixinin ən nüfuzlu müdafiəçilərindən biri, bu dəfə də prinsipindən geri çəkilmədi.
İtaliya millisinin sabahı
FIGC Şurası bu gün saat 12:00 CET (11:00 GMT) radələrində toplanır və Malagò-nun yeni baş məşqçini rəsmən açıqlaya biləcəyi gözlənilir. Masada hələ də Conte və Mancini adları var. Maldini və Leonardo isə artıq bu masada yoxdurlar.
İtaliya millisi yeni dövrə qədəm qoyur, amma sual açıq qalır: bu qərarların bədəlini meydanda kim, nə vaxt və necə ödəyəcək?
