Joao Pedro-dan Chelsea-yə sərt mesaj: Məsələ bizdədir
“Chelsea” artıq altı Premyer Liqa oyunudur uduzur. Turnir cədvəlində yavaş-yavaş aşağı sürüşən klub üçün isə bu dəfəki zərbə öz meydanlarında gəldi.
“Stamford Bridge”də, azarkeşlərin gözləri qarşısında, düşmə xətti ilə mübarizə aparan “Nottingham Forest” 3:1 hesablı qələbə ilə meydanı tərk etdi. Skoru kosmetikləşdirən yeganə təsəlli qolunu isə əlavə olunmuş dəqiqələrdə akrobatik “baysaykıl” zərbəsi ilə Joao Pedro vurdu. Gözəl qol idi, amma heç nəyi xilas etmədi.
Altı məğlubiyyət, dəyişən məşqçi, eyni komanda
Liam Rosenior səkkiz oyunun yedisində uduzduqdan sonra vəzifəsindən uzaqlaşdırıldı. Onun yerinə gətirilən müvəqqəti baş məşqçi Calum McFarlane ilə nəsə dəyişəcək kimi görünürdü, amma tablo başqa hekayə danışır: Premyer Liqada ardıcıl altı məğlubiyyət, doqquzuncu yer və Avropa ümidlərinin sürətlə sönməsi.
Bu qaranlıq seriyada dəyişənlər çox oldu, amma bir şey sabit qaldı – heyət. Məhz buna görə də Joao Pedro kameralar qarşısına çıxanda barmağını kənara yox, birbaşa paltardəyişmə otağına tuşladı.
“Oyun başlayandan çox tez qol buraxırıq və “Nottingham”a qarşı belə oyunu çevirmək çətindir,” – o, “Sky Sports”a danışarkən dedi. – “Daha yaxşı olmalı idik”.
“Chelsea” matçın ilk 15 dəqiqəsində iki qol buraxdı. Ötən həftə “Brighton”a qarşı da eyni ssenari – erkən qol, dağılmış oyun, itirilən xal. Komandanın oyuna giriş anları sanki sistemli problemə çevrilib.
“Hər kəs özünə baxmalıdır. Mən də”
Pedro sözlərini yumşaltmağa çalışmadı, əksinə, məsuliyyəti açıq şəkildə futbolçuların üstünə götürdü:
“Düşünürəm ki, hər kəs özünə baxmalıdır, mən də daxil. Daha yaxşı olmağın yolunu tapmalıyıq”.
Bir cümləlik pauza, sonra isə azarkeşlərə ünvanlanan səmimi etiraf gəldi:
“Azarkeşlərə görə özümü pis hiss edirəm, harada inkişaf edə biləcəyimizi görməliyik”.
Bu çıxışda ən diqqətçəkən məqam isə məşqçi məsələsinə toxunuş oldu. Son günlərdə klub ətrafında dolaşan sualların çoxu məhz texniki zonaya yönəlirdi. Pedro isə bu mövzunu qəti şəkildə bağladı:
“Düşünmürəm ki, məsələ məşqçidədir. Məsələ biz futbolçulardadır, yaxşılaşmalıyıq. Hər kəs irəli çıxmalıdır. Mən də. Bu anda nəsə demək çətindir”.
Bu sözlər bir tərəfdən paltardəyişmə otağında məsuliyyətin necə bölündüyünü göstərir, digər tərəfdən isə FA Cup finalına cəmi 12 gün qalmış komandanın psixoloji durumuna işarə edir. Qısa müddətdə həm oyunu, həm də özlərinə inamı bərpa etməli olacaqlar.
Avropa uzaqlaşır, amma mübarizə bitmir
Çempionlar Liqasına gedən yol artıq demək olar ki, bağlanıb. “Chelsea” üçün Avropaya vəsiqə, hər turdan sonra bir az da uzaqlaşan hədəfə çevrilib. Joao Pedro da bunu gizlətmədi:
“Motivasiya həmişə var. Əgər bu oyunu udsaq, Çempionlar Liqasında ola bilərdik. İndi daha çətindir. Amma yenə də hər xal, hər oyun üçün mübarizə aparmalıyıq”.
Bu cümlə klubun mövsüm taleyini xülasə edir: itirilmiş fürsətlər, sıxılmış təqvim, azalan şanslar və buna baxmayaraq davam edən mübarizə məcburiyyəti.
İndi sual budur: bu komanda 12 günə özünü toparlayıb FA Cup finalına hazır ola biləcək, yoxsa bu mövsümün hekayəsi “Chelsea”nin yaddaşında uzun müddət acı dad buraxacaq?
