Kompany-nin yüksəlişi: Bayern-in inqilabı və risklər
Max Eberl etiraf edir: 2024-cü ilin yayında Vincent Kompany-ni tapmaq, sadəcə bir məşqçi seçimi deyildi, daxili müqaviməti, şübhələri və ictimai təəccübü yarıb keçən risk idi. Və bu riskin qırılma nöqtəsi bir telefon zəngi ilə gəldi.
Burnley ilə Premyer Liqadan düşmüş, Almaniyada adı daha çox oyunçu kimi hörmət görən, amma məşqçi kimi şübhə ilə qarşılanan bir belçikalı. Allianz Arena üçün, ən azı kağız üzərində, qeyri-adi seçim idi. Klub daxilində tərəddüd də bununla bağlı idi.
Eberl Almaniyanın “ZDF” kanalına danışarkən o kritik anı xatırladır: şübhələr artanda söhbət bir anda Pep Guardiola-ya dirəndi.
Sual ortada idi: bu qədər böyük layihəni Kompany-yə etibar etməyə həqiqətən əmindirlərmi?
Eberl həmin məqamı belə təsvir edir: Kalle – yəni keçmiş prezident Karl-Heinz Rummenigge – ilə söhbət açılır. “Dedim ki, ‘Kalle, sən Pep-ə bu qədər yaxınsan, elə deyilmi? Ona zəng elə və soruş, Kompany barədə nə düşünür’. Məhz bu, dönüş nöqtəsi oldu”. Pep-in sözü, Kompany-nin taleyini Bayern-də faktiki olaraq möhürlədi.
İlk seçim deyildi, amma doğru seçim oldu
Kompany-nin təyinatı klubun divarları xaricində “risk” kimi təqdim olunurdu. Eberl bunu gizlətmir: belçikalı heç də ilk gündən “plan A” olmayıb.
Bayern aylarla Tuchel-ə varis axtardı, ən yüksək səviyyəli adlarla danışıqlar apardı, amma cavablar çox vaxt eyni oldu – rədd.
Eberl açıq danışır: əvvəlcə başqa adlar masada idi. Julian Nagelsmann variant idi. Ralf Rangnick ilə danışıq aparıldı. Oliver Glasner ilə də. Klub daxilində Hansi Flick-in geri dönməsini istəyənlər belə vardı.
Kompany isə siyahıda olsa da, Eberl onu dərhal önə atmağa cəsarət etmədiyini deyir: “Düzünü desəm – və tam səmimi danışıram – Vincent Kompany-ni ilk olaraq təklif etməyə cürət etmədim. Əvvəlcə adı və şöhrəti olan top-məşqçilərə yönəldik”.
Yəni Bayern əvvəlcə “tanınmış ad” arxasınca getdi, sonra isə cəsarət edib ideyasına – Kompany-yə – qayıtdı.
Şübhələrdən kuboklara: Kompany-nin cavabı meydanda
Bu gün isə həmin tərəddüdlər artıq statistik rəqəmlərə çevrilib. Kompany Bayern-i ardıcıl iki Bundesliqa çempionluğuna daşıyıb, üstəlik Almaniya Superkuboku da vitrinə əlavə olunub.
Komanda hazırda Çempionlar Liqasının yarımfinalında, DFB-Pokal-ın finalındadır. Yəni “risk” deyilən qərar, faktiki olaraq klubun yeni hegemonluq dalğasının start nöqtəsinə çevrilib.
Ən təsirli nümunələrdən biri isə Mainz qarşısında yaşanan dramatik dönüş idi. Bayern fasiləyə 0:3 geridə yollanmışdı. Tribunada şok, meydanda çaşqınlıq, paltardəyişmə otağında isə – Kompany-nin qəzəbi.
Leon Goretzka sonradan danışarkən, fasilədə “sərt danlaq” eşitdiklərini vurğuladı. Bu, taktiki lövhədən çox, xarakter söhbəti idi.
Kompany özü də həmin anları izah edərkən emosiyanı ön plana çəkir. O bildirir ki, belə geri dönüşlərdə sistemdən çox ehtiras, qəzəb, uduzmağı rədd edən mentalitet işə düşür. O, futbolçu kimi 0:3 hesabı ilə fasiləyə gedən paltardəyişmə otaqlarını görüb, həmin atmosferi tanıyır. Mesajı sadə idi: qəzəbi düzgün kanala yönəlt, məğlubiyyəti qəbul etmə, sona qədər rəqibin üstünə get. Mainz qarşısında meydanda baş verən də məhz bu idi.
İndi isə səhnə: Çempionlar Liqası
Daxili titul artıq cibdədir. Bu, Kompany üçün sadəcə başlanğıcdır. İndi baxışlar Çempionlar Liqasına dikilib.
Yarımfinalda rəqib – Paris Saint-Germain. Avropanın ən ağır çəkili duelindən biri. Qalib, finalda Arsenal və ya Atletico Madrid-dən biri ilə qarşılaşacaq.
Kompany üçün bu, simvolik zirvə nöqtəsi ola bilər: cəmi üç il əvvəl Championship-də işləyən gənc məşqçi, indi isə qitənin ən böyük səhnəsində, Bayern-in başında, adını elita dəftərinə həkk etdirmək imkanı ilə üz-üzədir.
Bu hekayənin fonunda isə bir detal xüsusi seçilir: Eberl, futbol tarixinin ən böyük məşqçilərindən birinin – Pep Guardiola-nın – sözünə güvəndi və Kompany-yə qapını açdı. O vaxt sual işarələri çox idi. İndi isə həmin sual işarələri, Münhendə yeni bir dominantlıq dövrünün başlanğıc xəttinə çevrilib.
İndi tək bir sual qalır: bu cəsarətli qərar Bayern-i yalnız Almaniyada deyil, Avropada da yenidən dayandırılmaz edəcəkmi?
