Kvaratsxeliya üçün PSG-də Ballon d'Or təşvişi

Paris artıq növbəti ulduzunu itirmək qorxusunu yaşamaq istəmir. Ona görə də Khvicha Kvaratskhelia məsələsində sürət düyməsinə sonuna qədər basılıb.

25 yaşlı gürcü ulduzun müqaviləsi rəsmi olaraq 2029-cu ilə qədər qüvvədədir. Kağız üzərində heç bir təciliyyət yoxdur. Amma klub daxilində vəziyyət tam əksinədir: Paris rəhbərliyi Kvaratsxeliyanın dərhal, özü də daha sərfəli şərtlərlə yenidən müqavilə imzalamasını əsas prioritetə çevirib.

Bu tələsikliyin səbəbi meydanda deyil, səhnədədir. Daha dəqiqi, gələn ay keçiriləcək Ballon d'Or mərasimində.

Ballon d'Or-dan əvvəl imza planı

Fransız mətbuatının, xüsusilə də L'Équipe nəşrinin məlumatına görə, Kvaratsxeliya getdikcə daha ciddi şəkildə Ballon d'Or-un əsas favoritlərindən biri kimi göstərilir. Bu ssenari isə Paris idman direktorunu, Luis Camposu dərhal hərəkətə keçirib.

Klub rəhbərliyi yaxşı anlayır: əgər Kvaratsxeliya əvvəlcə qızıl topu qaldırsa, sonra stol arxasına keçib maaş barədə danışmaq qat-qat baha başa gələ bilər. Yeni agent Moussa Sissoko ilə danışıqlarda tələblərin kəskin artacağı ehtimalı klubda kimsəni təəccübləndirmir.

PSG bu riski almır. Onlar Kvaratsxelyaya artıq indi çox yüksək səviyyəli, rəqabətədavamlı müqavilə təklif etmək niyyətindədirlər. Paketə bir şərt də əlavə olunacaq: əgər o, doğrudan da Ballon d'Or qazanarsa, ciddi həcmdə bonus.

Klubun məntiqi sadədir: Ballon d'Or qalibi ilə yox, Ballon d'Or namizədi ilə danışmaq daha ucuzdur.

Parisin simasını dəyişən ulduz

Kvaratsxeliya 2025-ci ilin yanvarında Napolidən böyük məbləğə gələndə Parisdə ondan çox şey gözləyirdilər. Amma o, gözləntiləri aşdı.

Dinamik cinah oyunçusu PSG-nin oyun üslubunu kökündən dəyişdi. Xüsusilə də böyük səhnədə. Rəqibin səviyyəsi yüksəldikcə, Kvaratsxeliyanın təsiri daha da artırdı. Həlledici anlarda qol, asist, fərdi reyd – nə lazımdırsa, meydanda idi.

Onun statusu isə keçən mövsüm tamam başqa mərhələyə qalxdı. Gürcü ulduz paytaxt klubuna çox arzulanan Avropa dubli qazandıran kampaniyanın mərkəz fiqurlarından biri oldu. Bu performansdan sonra Avropanın nəhəngləri ondan uzaq durmağın ən yaxşı seçim olduğunu başa düşdü: PSG onu toxunulmaz elan edib.

Amma toxunulmaz oyunçu toxunulmaz maaş tələb edir. Klub bunu indi açıq şəkildə qəbul edir. Kvaratsxeliya PSG üçün sadəcə aparıcı futbolçu deyil, brendin özü, layihənin ürəyidir. Və bu status artıq mövcud müqavilənin rəqəmlərini köhnəldib.

Bir aylıq ultimatum

Paris rəhbərliyi bu dəfə özünə sərt çərçivə qoyub. Danışıqlar üçün daxili vaxt limiti müəyyənləşdirilib: bir ay.

Bu tələsikliyin kökündə yalnız Ballon d'Or qorxusu dayanmir. Klub hələ də Ousmane Dembele ilə uzadılan və gözləniləndən xeyli çətin keçən danışıqların “ağrısını” xatırlayır. O proses hazırkı idarə heyəti üçün açıq dərs oldu: nə qədər geciksən, bir o qədər çox ödəyirsən.

İndi isə vəziyyət daha həssasdır. Çünki söhbət sadəcə əsas oyunçudan yox, potensial Ballon d'Or qalibindən gedir.

PSG bu dəfə oyunun qaydalarını əvvəlcədən müəyyənləşdirmək istəyir. Uzanan süjetlər, sonsuz ultimatumlar, sızmalar, təzyiqlər – bunların hamısı artıq Kylian Mbappe hekayəsində yaşanıb. Klub həmin ssenarini yenidən görmək istəmir.

Güc balansı dəyişir

Məsələnin ən kəskin nöqtəsi budur: Paris rəhbərliyi futbolçuların maaş danışıqlarında “tam hakimiyyət” dövrünü bitirmək niyyətindədir.

Onlar Kvaratsxeliyanın düşərgəsindən gələn sərt tələblərə baxmayaraq, mövqelərindən geri çəkilməməyi planlaşdırırlar. Bəli, gürcü ulduz və onun komandası bu sürətli tempə və bir aylıq çərçivəyə dərhal razı olmaya bilər. Amma klubun mesajı açıqdır: bu dəfə ssenarini futbolçu deyil, PSG yazacaq.

İndi sual təkdir: Kvaratsxeliya Ballon d'Or podiumuna çıxmamış imza atacaq, yoxsa Paris tarixinin ən bahalı müqavilələrindən biri onu qızıl topu havaya qaldırdıqdan sonra gözləyəcək?