Lamine Yamal: La Liqanın ən yaxşı futbolçusu

Lamine Yamal – La Liqanı silkələyən yeniyetmə

"Camp Nou" tribunalarında adını hələ 16 yaşında əzbər etdirmişdi. İndi isə Lamine Yamal artıq rəsmi olaraq La Liqanın mövsümün ən yaxşı futbolçusudur. 18 yaşlı cinah oyunçusu təkcə Barcelona üçün deyil, bütün çempionat üçün mövsümün hekayəsinə çevrildi.

Mövsümün rəqəmləri danışır: 16 qol, 11 məhsuldar ötürmə. Yalnız komandanın ən yaxşı bombardiri olmaqla kifayətlənmədi, eyni zamanda liqada bu qədər qol ötürməsi verən başqa futbolçu tapılmadı. Hücumun ritmini dəyişən, müdafiələri açan, matçların taleyini həll edən oyunçuya çevrildi.

Üstəlik, bir mövsümdə üç dəfə "Ayın futbolçusu" mükafatını qazanan ilk La Liqa oyunçusu oldu. Bu, artıq təsadüf deyil, sabitlikdir. Gənc yaşına rəğmən, təzyiq altında belə oyunun məsuliyyətini üzərinə götürməyi bacardı.

Barcelona klubunun rəsmi açıqlamasında Yamalın rəqib müdafiələr üçün "baş ağrısı" olduğu xüsusi vurğulanırdı. Sürəti, topu dar məkanlarda belə itirməməsi, bir-birini tamamlayan hərəkət və qərarları onu dayandırılması çətin hücumçular sırasına çıxarıb. Müdafiəçilər bir anlıq boşluğa yol versələr, Yamal ya özü vurur, ya da komanda yoldaşını qola çıxarır.

Bu fərdi parıltının fonunda klub səviyyəsində də uğur gəldi: Barcelona daxili çempionluğunu qorudu. Hansi Flick üçün isə bu mövsüm fərdi mükafatla tamamlandı – o, ilin baş məşqçisi seçildi. Alman mütəxəssis gənc ulduzun ətrafında qurduğu hücum sistemi ilə həm nəticə qazandı, həm də Yamalın potensialını maksimum səviyyəyə çıxardı.

Mövsümün sonuna doğru bədən siqnallarını göndərməyə başladı. Öncə qasıq nahiyəsindəki problemlər, sonra isə hamstring zədəsi. Yamal Barcelona-nın mövsümün son altı oyununu buraxdı. Amma bu fasilə panika yox, daha çox ehtiyatlılıq qərarı idi: qarşıda İspaniya millisinin böyük planları var.

Kanada, Meksika və ABŞ-da start götürəcək Dünya çempionatı ərəfəsində xəbərlər ümidvericidir – Lamine Yamalın turnirə hazır olacağı gözlənilir. İspaniya üçün bu, sadəcə bir oyunçunun sağalması deyil, hücum xəttinin mərkəzi fiqurunun geri dönüşü deməkdir.

Onun milli komanda səviyyəsində yüksəlişi də ildırım sürətində baş verdi. 16 yaşında səhnəyə çıxan Yamal, 2024-cü ildə İspaniyanın tarixi dördüncü Avropa çempionluğunda əsas fiqurlardan biri oldu. Final turnirində göstərdiyi performans artıq onu "gələcəyin ulduzu" yox, bu günün liderlərindən birinə çevirdi.

İndi isə qarşıda daha böyük səhnə dayanır – Dünya çempionatı. La Liqanın mövsümün futbolçusu mükafatı artıq vitrinə qoyulub. Sual təkcə budur: növbəti parlaq hekayə klub rənglərində, yoxsa İspaniya millisinin formanısındakı qızıl medalla yazılacaq?