Madriddə Arsenal və Simeone arasındakı ot savaşı
Madrid axşamı hələ start fiti səslənməmiş qızışdı. Arsenal, Wanda Metropolitano-ya sadəcə məşq üçün yox, şübhə ilə dolu baxışlarla çıxdı. Rəqib Diego Simeone-disə, hər detalın hesabı aparılır. Hətta otun hündürlüyünün də.
Londonda qurulan plan Madridin otunda ilişməsin deyə klub rəhbərliyi qeyri-adi addım atdı: oyuna bir neçə saat qalmış UEFA-dan rəsmi meydança yoxlanışı tələb olundu. Səbəb – otun hündürlüyü.
İspaniyalı jurnalist Guillem Balague-nin sözlərinə görə, Arsenal nümayəndələri əvvəlcədən keçirilən meydança gəzintisində örtüyün vəziyyətindən ciddi narazı qalıb. Onlara elə gəlib ki, ot normadan hündürdür və bu, topun sürətini öldürəcək. Klub rəsmiləri UEFA nümayəndələrindən otun fiziki ölçülməsini istəyib, qaydalara uyğunluğun rəsmən təsdiqlənməsini tələb ediblər.
Balague bu gərgin epizodu canlı efirdə belə təsvir edib: Arsenal-in meydança işçiləri meydana daxil olur, otun üstündən keçir, sonra dayanıb deyirlər: “Ot çox hündürdür. Bununla razı deyilik”. Şübhə birbaşa Simeone-yə yönəlir – guya yenə “qara sənət” işə salınıb, meydança rəqibin oyun ritmini pozmaq üçün hazırlanıb.
Bu dəfə ittihamlar havada qalmadı, ölçü lentləri işə düşdü. UEFA nəzarətçiləri otun hündürlüyünü yoxlayandan sonra cavab gəldi: 26 millimetr. Limit – 30. Yəni hər şey qaydalara uyğun. Üstəlik, Balague-nin qeyd etdiyi kimi, bu, burada Barcelona ilə oynanılan oyunda da eyni rəqəm olub.
Simeone və komandası Çempionlar Liqasında illərdir eyni tip iddialarla yaşayır. Metropolitano ot örtüyü artıq bir neçə klubun əsəblərini tarıma çəkib. Məsələn, bu mövsüm daha əvvəl Barcelona səfərə gələndə Hansi Flick meydançanın vəziyyətini UEFA nümayəndəsi ilə müzakirə edirdi. Katalonlar otun uzunluğunun onların sürətli, ritmik pas oyununu yavaşıtmaq üçün bilərəkdən seçildiyini düşünürdü.
Tottenham Hotspur da bu arenadan narazı ayrılanlar siyahısına daxildir. London klubunun düşərgəsindən sızan fikirlərə görə, həmin görüşdə meydança həddən artıq suvarılmış, topun hərəkəti ağırlaşmışdı. İddialar eynidir: Atletico topu süründürür, rəqibi boğur, oyunun ritmini öz tempinə salır. Madrid klubu isə illərdir eyni cavabı verir – hər şey hava şəraitinə, temperatur və yerli şərtlərə uyğun tənzimlənir, heç bir hiylə yoxdur.
Bütün bu gərgin fon “ot savaşı”nı oyundan əvvəl psixoloji duelin bir hissəsinə çevirdi. Arsenal özünü artıq pərdəarxası mübarizənin içində görürdü. Simeone isə yenə öz evində, öz elementində idi: səs-küylü tribunalar, fiziki mübarizə, hər epizodda sərhəddə gəzən aqressiya.
Belə atmosferdə başlayan ilk oyun gözlənildiyi kimi ağır keçdi. Mikel Arteta-nın komandası nəhayət hesabı açanda, bunu standart vəziyyətdən etdi. Viktor Gyokeres penalti zərbəsi ilə Arsenal-i önə çıxardı və qonaqların planı – erkən üstünlük alıb oyunu idarə etmək – işə düşür kimi göründü.
Amma Metropolitano-da üstünlüyü qorumaq asan deyil. Təkcə ot yox, stadionun özü də rəqibə qarşı oynayır. Təzyiq artdıqca, Atletico oyuna qayıtmağın yolunu tapdı. İkinci hissənin əvvəlində meydan sahibləri penalti qazandı və Julian Alvarez soyuqqanlılıqla zərbəni qola çevirdi. 1:1 – və bütün mübarizə yenidən sıfırdan başladı.
Arteta-nın komandası üçün bu, həm nəticə, həm də mesaj idi. Bir tərəfdən, səfərdə Atletico qarşısında heç-heçə – xüsusən də belə gərgin fonun içində – pis hesab olunmur. Digər tərəfdən, Arsenal düşərgəsində otun vəziyyətinin Simeone-nin oyun planına daha çox xidmət etdiyi hissi güclü idi. Top bəzən ilişdi, paslar istənilən sürəti almadı, texniki üstünlük tam açılmadı.
İndi hər şey Emirates-də həll olunacaq. Orada ot hündürlüyünü Arsenal müəyyən edəcək, suvarmanı Arsenal tənzimləyəcək, tempə Arsenal diktə etməyə çalışacaq. London gecəsində meydança daha sürətli olacaq, top daha tez hərəkət edəcək, Arteta-nın kombinasiyalı oyunu üçün şərait daha əlverişli görünəcək.
Madrid səfəri bir şeyi aydın göstərdi: bu yarımfinal yalnız oyunçuların, məşqçilərin və azarkeşlərin savaşı deyil. Hər millimetr, hər damcı su, hər ot parçası bu səviyyədə fərq yarada bilər.
İkinci görüşdə üstünlük kimin tərəfində olacaq – taktikanın, yoxsa millimetrlərin?
