Man Utd 14 yaşlı qol maşını Blake Henry-i ovlayır

Manchester United bu yay akademiya bazarında sürəti artırıb. Klubun növbəti hədəfi – cəmi 14 yaşı olan, amma artıq ölkə miqyasında ad çıxaran hücumçu Blake Henry-dir.

Derby County-nin istedadı keçən mövsüm bütün yaş qrupları üzrə 45 qol vuraraq skautların diqqətini üzərinə çəkib. İngiltərənin U15 yığmasının üzvü olan Henry-nin bu yay Derby-dən ayrılması demək olar ki, reallığa çevrilib və hazırda onu ələ keçirmək üçün sıranın önündə dayanan klub məhz Man Utd-dir. Səhnənin arxasında isə başqa bir nəhəng dayanır – Manchester City də bu gənc forvardı yaxından izləyir.

Bu mövsüm Henry artıq U18 Premier League-də də meydana çıxıb və turnirdə oynayan ən gənc futbolçulardan birinə çevrilib. 14 yaşını qeyd etməsindən cəmi bir neçə ay sonra bu səviyyəyə qalxması, United skautlarının da diqqətini daha da kəskinləşdirib. Derby forması ilə həmin liqada cəmi bir neçə oyunda ümumilikdə 24 dəqiqə şans qazansa da, klubdaxili bütün yarışlarda 45 qol vurması onu ölkənin ən parlaq hücum perspektivlərindən biri kimi göstərməyə kifayət edib.

İşin indi daha çətin hissəsi başlayır. Henry United-ə keçərsə, Derby kompensasiya haqqına iddialı olacaq. Məbləğin həcmi bir neçə amilə görə hesablanacaq: futbolçunun yaşı, Derby akademiyasında keçirdiyi müddət, onu alan klubun akademiyasının kateqoriyası, həmçinin illər ərzində inkişaf və məşq xərcləri.

İdeal ssenari odur ki, iki klub masaya oturub ortaq məxrəcə gəlsin. Əgər danışıqlar dalana dirənsə, söz artıq Professional Football Compensation Committee tribunallarına qalacaq və yekun qərarı onlar verəcəklər.

United isə təkcə Henry ilə kifayətlənmir. Klub bu yay rəqib akademiyalarındakı bir çox gənci sistemli şəkildə izləyir, öz akademiyasını yenidən İngiltərənin ən güclü istedad mərkəzlərindən birinə çevirmək üçün bazarı xırdalayan bir yanaşma sərgiləyir. İndi sual başqa cür səslənir: 45 qolluq bu 14 yaşlı hücumçu, Carrington-da qurulan yeni nəsil komandanın mərkəz fiqurlarından birinə çevrilə biləcəkmi?