Manchester United Eduardo Conceicao transferi üçün hazırlaşır
"Manchester United" Braziliyanın yeni möcüzə ulduzlarından biri sayılan Eduardo Conceicao transferinə ciddi şəkildə girişməyə hazırlaşır. Braziliyadan gələn xəbərlərə görə, "Old Trafford" rəhbərliyi artıq həlledici addımın astanasındadır.
Cəmi 16 yaşı var. Amma Braziliya futbolunun son illərdə yetişdirdiyi ən parlaq cinah oyunçularından biri kimi təqdim olunur. "Palmeiras U20" və Braziliya U‑17 komandalarındakı çıxışları onu Avropa nəhənglərinin radarına salıb.
Düz qapıya gedən, sağ ayaqlı sol cinah
Conceicao – Braziliyada daha çox Dudu kimi tanınır – klassik şoumen driblerlərdən deyil. O, sağ ayaqlı sol cinah oyunçusudur və əsas instinkti birbaşa cərimə meydançasına hücum etməkdir. Yan‑yörə fəndləri ilə vaxt itirmir, oyunu şaquli sürətlə qırır, rəqibin müdafiə xəttini yarır.
Məhz bu yetkinlik onu həmyaşıdlarından ayırır. Sürət, qərarvermə, qapıya yönəlik oyun – 16 yaş üçün nadir kombinasiyadır. Elə buna görə də Avropanın bir çox klubu artıq növbəyə düzülüb. "Manchester City" də bu sıradadır.
Amma fon dəyişir. Dudu Avropaya ilk addımını atacağı ünvan kimi artıq "Old Trafford"u seçməyə meylli görünür və bu, "United"i sürətləndirməyə vadar edib.
40 milyon avroluq siqnal
"UOL Esporte"nin məlumatına görə, "Manchester United" gənc ulduzun nümayəndələrinə təxmini 40 milyon avroluq paket barədə siqnal göndərib. Rəqəm həm sabit, həm də bonuslardan ibarət olacaq.
Bu, 16 yaşlı futbolçu üçün az məbləğ deyil. Amma "United" tərəfi bilir ki, rəqabət yüngül olmayacaq. Xəbərdə qeyd olunur ki, "City Football Group" da Dudunun əsas izləyicilərindən biridir və bu maraq "INEOS"u daha aqressiv davranmağa məcbur edir. "United" rəhbərliyi "Palmeiras"ın bu incisini qonşuya buraxmaq istəmir.
Məhz buna görə, iddialara görə, Conceicao Avropadakı ilk klubu kimi "Old Trafford"u istədiyini artıq öz ətrafına hiss etdirib. Əks halda, "INEOS" bu həcmdə təklifi masa üstünə qoymağa bu qədər tez razı olardımı?
"United"də yeni nəsil qurulur
Əgər "Manchester United" bu yarışı udsa, Dudu klubun son aylarda topladığı gənc istedadlar zəncirinə qoşulacaq. 20 qat ölkə çempionu artıq açıq şəkildə kursunu dəyişib: hazırda məqsəd yalnız hazır ulduzlar yox, sabahın liderlərini də vaxtında ələ keçirməkdir.
"INEOS" strukturunun planı aydındır: yaxın illər üçün dominant komandanın bünövrəsini bu gün qoymaq. "JJ Gabriel", "Chido Obi", "Ayden Heaven" kimi adlar artıq sistemə daxil edilib. İndi bu siyahıya Dudu da əlavə olunsa, "Old Trafford"un gələcək onilliyi tam fərqli görünə bilər.
Bu transfer baş tutsa, "United" təkcə rəqiblərindən bir istedadı qoparmayacaq. Klub, həm də yeni erada hansı futbol fəlsəfəsinə sadiq qalacağını açıq şəkildə elan etmiş olacaq.
