Manchester United Jorge Salinas-ı transfer etmək istəyir
"Manchester United" yay pəncərəsinin son düzüyündə sol cinah üçün gözlənilməz hədəfə çevrilən "Racing Santander" müdafiəçisi Jorge Salinas-ın transferinə ciddi şəkildə maraq göstərir. Klubun uzun illər problemli mövqeyə çevrilən sol müdafiə xətti yenidən qurulmalıdır və 19 yaşlı ispan bu planın mərkəzinə düşüb.
Sol cinahda vaxt daralır
Luke Shaw müqaviləsinin son ilinə daxil olub. Zədələr və formadakı dalğalanmalar fonunda onun gələcəyi tam aydın deyil. Michael Carrick-in komandasında sol cinahda sabitlik isə hələ də tapılmayıb.
Patrick Dorgu artıq daha çox sol cinah hücumçusu kimi istifadə olunur. Diogo Dalot və Noussair Mazraoui isə məcburi seçimlərdir – hər ikisi təbii sağ müdafiəçidir, bu da balansı pozur. Akademiyanın istedadlı sol müdafiəçisi Harry Amass da variantdır, amma hələ yüksək səviyyəli futbolda təcrübəsi yoxdur.
"Newcastle"dan Lewis Hall bir müddət əsas hədəf sayılırdı. Premyer Liqa təcrübəsi və potensialı onu ideal namizədə çevirirdi. Amma "Magpies"də Bruno Guimaraes, Anthony Gordon və Sandro Tonali kimi böyük itkilərdən sonra vəziyyət dəyişdi. Klubun daxili planları sərtləşdi, Hall üçün razılıq almaq çətinləşdi və bu keçid real görünməməyə başladı.
Transfer pəncərəsinin bağlanmasına iki həftədən də az qalıb. "United" artıq vaxt itirə bilməz.
Salinas səhnəyə çıxır
Məhz bu məqamda Jorge Salinas adı gündəmə gəlib. 19 yaşlı sol müdafiəçi ötən mövsüm "Racing Santander"ın La Liqaya yüksəlişində əsas fiqurlardan biri idi. Gənc yaşına baxmayaraq, bütün turnirlərdə 34 oyuna çıxıb və 7 qol ötürməsi ilə yadda qalıb. Dinamik, cəsarətli, hücuma qoşulmağı sevən bir profil.
Onun yüksəlişi yalnız "United"i cəlb etmir. Salinas artıq "Barcelona" və "Atletico Madrid" ilə də əlaqələndirilir. İspaniyanın böyük klubları üçün növbəti sol cinah layihəsi kimi görünür.
"Infobae"nin məlumatına görə, yarışda ön sırada olan klub uzun müddət "Atletico" olub. Madrid təmsilçisi təxminən 12 milyon funt sterlinq dəyərində təklif irəli sürüb, amma "Racing Santander" bunu rədd edib. Klub rəhbərliyi aydın mesaj verib: 14 milyon funt sterlinqlik sərbəstqalma maddəsi ödənmədən razılıq yoxdur.
"Atletico" tərəddüd edir, "United" fürsət qoxusu alır
İspan mətbuatı yazır ki, "Atletico" müdafiəçi ilə razılığa gəlməkdə çətinlik çəkir. "Racing Santander" Salinas-a yeni müqavilə təklif edib, hazırkı anlaşma 2029-cu ilə qədər davam etsə də, klub onu daha da möhkəmləndirmək istəyir. Amma gənc futbolçunun özü gözləmə mövqeydindədir. O, son günlərdə ortaya çıxacaq təklifləri görmək niyyətindədir.
Məhz bu tərəddüd "United" üçün qapını açır. Carrick-in komandasının yarışa qoşulması "Atletico"nu tələsdirib. Xəbərlərə görə, Madrid klubu özünə həftəsonuna qədər son tarix qoyub: əgər həmin vaxta qədər danışıqlarda irəliləyiş olmasa, masadan qalxacaq və "United" gənc sol cinah üçün açıq yol qazanacaq.
Bu, Premyer Liqa nəhənginə həm riskli, həm də cazibədar ssenari təqdim edir. Sərbəstqalma maddəsi aydındır, oyunçu gəncdir, bazar isə daralıb.
"Racing"dən sərt mesaj: "16 milyon avro gətirən aparar"
"Racing Santander"ın idman direktoru Chema Aragon gündəlik transfer söz-söhbətlərindən artıq bezib. İspan mətbuatına danışan funksioner klubun mövqeyini qəti şəkildə ortaya qoyub:
“Bu mövzunu hər gün danışmaqdan yorulmuşuq. Bir gün sərbəstqalma maddəsi, o biri gün başqa klub... Şükürlər olsun ki, uşaq fokusunu itirməyib. Əgər kimsə gəlib 16 milyon avronu masaya qoysa və futbolçu həmin komandaya getmək istəsə, o zaman gedəcək.”
Aragonun bu cümlələri həm "Atletico"ya, həm də "United"ə açıq siqnaldır. Qiymət bəllidir, qərar isə indi klubların və futbolçunun özündədir.
"Manchester United" illərdir sol cinahda davamlılıq tapa bilmir. İndi isə vaxt daralır, bazar qaynayır, 19 yaşlı ispana yönələn maraq artır. Sual budur: Carrick risk edib gələcəyin sol müdafiəçisinə indi sərmayə qoyacaq, yoxsa "Old Trafford" bir mövsüm də bu mövqedə yarımçıq həllərlə yaşamalı olacaq?
