Manchester United-in 80 milyonluq hədəfi: Mateus Fernandes
Premyer Liqada ötən mövsüm həyata keçirilən 189 transfer bir-bir süzgəcdən keçirilib və tablo iki nəhəngin – Manchester United və Liverpool-un transfer siyasəti arasındakı uçurumu çılpaq şəkildə göstərib. Bir tərəfdə ağıllı, hədəfə dəyən addımlar, o biri tərəfdə rekord məbləğlərə başa gələn, amma geri dönüşü zəif olan risklər.
United-in dörd transferi – hamısı “vurdu”
The Athletic-in hazırladığı siyahıda Manchester United-in dörd əsas transferinin hamısı ilk 40-lığa düşüb. Bu, təkcə rəqəmlər deyil, klubun son illərdə tez-tez tənqid olunan transfer siyasəti üçün ciddi imic qələbəsidir.
- Matheus Cunha 40-cı
- Bryan Mbeumo 38-ci
- Benjamin Sesko 29-cu
- Senne Lammens isə sensasion şəkildə 9-cu yerdə qərarlaşıb.
Hamısı da Old Trafford-da debüt mövsümünü parlaq keçirdi, hərəsi fərqli şəkildə, amma eyni mesajla: bu dəfə skaut şəbəkəsi hədəfi tutub.
United azarkeşləri üçün bu, gələcəyə dair ümid siqnalıdır. Çünki uzun müddətdir klubun böyük pullar xərcləyib, az qarşılıq aldığı transferlər xatırlanırdı. Bu dəfə əksinə oldu.
Liverpool-un rekordları – kağız üzərində böyük, meydanda kiçik
Liverpool-un yay pəncərəsi isə rəqəmlərlə başlayıb, məyusluqla bitdi. Klub əvvəlcə Florian Wirtz üçün 116 milyon, ardınca Alexander Isak üçün 125 milyon funt ödəyərək iki dəfə transfer rekordunu yenilədi.
Amma siyahı göstərir ki, böyük məbləğ uğurun zəmanəti deyil. Wirtz cəmi 97-ci yerdə özünə yer tapıb. Isak isə zədələrlə dolu mövsümün qurbanına çevrilib və 189 oyunçu arasında 172-ci sıraya yuvarlanıb.
- Liverpool-un ən yaxşı transferi Milos Kerkez olub – 49-cu yer.
- Onun ardınca Hugo Ekitike 50-ci
- Giorgi Mamardashvili 73-cü
- Freddie Woodman 89-cu
- Jeremie Frimpong 119-cu
- debütündə ön çarpaz bağını qoparan Giovanni Leoni isə 143-cü yerdə qərarlaşıb.
Yəni ümumi mənzərə: çoxlu pul, az sayda tam uğurlu iş.
Zirvədə tanış ad: Granit Xhaka
Siyahının birinci pilləsində isə Premyer Liqaya möhtəşəm dönüş edən bir ad var – Granit Xhaka. Keçmiş Arsenal yarımmüdafiəçisi Sunderland-in hekayəsinə rəhbərlik edib. Klub elitaya qayıtdığı ilk mövsümdə möcüzə göstərərək Avropa Liqasına vəsiqə qazanıb və bu uğurun mərkəzində məhz Xhaka dayanıb.
Bu, həm də o deməkdir ki, siyahı yalnız “böyük altılıq” üçün yazılmayıb. Performans, təsir, kontekst – hamısı birlikdə dəyərləndirilib.
Ən dibdə Liverpool – Harvey Elliott-un “faciəvi” icarəsi
Listenin ən son pilləsi isə Liverpool-a məxsusdur. Aston Villa-ya icarəyə göndərilən Harvey Elliott-un mövsümü “faciəvi” damğası alıb.
The Athletic bu qərarı belə əsaslandırıb: hər iki klub və futbolçu üçün tam uğursuz əməliyyat. Aston Villa əla mövsüm keçirib, Unai Emery komandanın “beyni”, John McGinn isə “ürəyi” kimi təsvir olunub. Elliott? Sadəcə “appendiks” – bədəndə var, amma funksiyası yoxdur.
23 yaşlı hücumameyilli yarımmüdafiəçi mövsüm ərzində cəmi üç dəfə start heyətində meydana çıxıb. Emery ona açıq-aşkar güvənməyib. Yanvarda icarəni vaxtından əvvəl bitirmək, fevralda isə müqavilədəki məcburi satınalma şərtini (10 oyundan sonra işə düşəcəkdi; Elliott martda 9-cu oyununa çıxdı) dəyişmək cəhdləri də nəticəsiz qalıb.
Nəticə: nə Villa üçün fayda, nə Liverpool üçün dəyər artımı, nə də futbolçu üçün inkişaf. İstedadına görə təriflənən Elliott üçün bu mövsüm karyera yolunda ciddi əyləc rolunu oynadı.
United-in yeni hədəfi – siyahıda səkkizinci yer: Mateus Fernandes
Tablonun digər ucunda isə Manchester United-in indi yaxından izlədiyi bir ad dayanır – Mateus Fernandes. Siyahıda səkkizinci yerə yüksələn Portuqaliya millisinin yarımmüdafiəçisi ötən yay Southampton-dan West Ham-a 40 milyon funt qarşılığında keçmişdi.
West Ham üçün bu mövsüm kabus kimi keçdi və klub Çempionşipə yuvarlandı. Amma qaranlıq fonun içində bir neçə işıq nöqtəsi vardı, onlardan ən parlaqı isə Fernandes idi. Lucas Paqueta yanvarda klubdan ayrıldıqdan sonra o, London təmsilçisinin əsas oyun qurucusuna çevrildi.
The Athletic-in qiymətləndirməsində Fernandes-in oyunu belə təsvir olunub: müdaxilələr, ikili mübarizələr, top qazanma, uzaq məsafədən “bomba” qollar, şaquli, oyunu yaran ötürmələr – o, Paqueta-dan boşalan yaradıcılıq yükünü çiyinlərinə götürdü və bunun öhdəsindən gəldi.
Məntiq sadədir: belə profilli futbolçu Çempionşipdə qalmayacaq. London Stadium-da çox dayanacağı gözlənilmir.
Bruno-nun pərəstişkarı, Old Trafford-un potensial yeni dirəyi
Manchester United artıq Fernandes-lə bağlı ciddi düşünür. Yarımmüdafiəçinin idolu təsadüfi deyil – hazırkı komanda kapitanı Bruno Fernandes. Bu detal da keçidin emosional tərəfini gücləndirir: gənc portuqaliyalı, öz pərəstiş etdiyi oyunçu ilə eyni mərkəz xəttini paylaşa bilər.
Məlumata görə, West Ham futbolçunu indi təxminən 80 milyon funt civarında qiymətləndirir. Tez-tez olduğu kimi, aşağı liqaya düşmək satıcı klubun əlini zəiflədir, amma bazar hələ də amansızdır: keyfiyyətli, tam formalaşmış, Premyer Liqa təcrübəli yarımmüdafiəçi ucuz başa gəlmir.
Şəxsi şərtlər? Problem gözlənilmir. Fernandes-in United-ə qoşulmaq istəyi barədə məlumatlar kifayət qədər aydındır. İndi top Manchester klubunun əlindədir: bu profili, bu qiymətə almağa hazırdırlar, ya yox?
Cavab yalnız bir futbolçunun gələcəyini deyil, həm də United-in yeni dövrdə necə komanda quracağını müəyyənləşdirəcək. Liverpool-un “faciəvi” Elliott icarəsi fonunda isə bu qərar, iki nəhəngin transfer cəbhəsindəki fərqini daha da kəskin göstərə bilər.
