Mançester Yunayted-in Willy Kambwala ilə yeni planı

Willy Kambwala üçün Villarreal mərhələsi başa çatmaq üzrədir, amma bu hekayənin arxasında daha maraqlı detal gizlənir: Mançester Yunayted bu gedişdən də pul qazanacaq.

İtaliya klubu Como gənc müdafiəçini heyətinə qatmağa ən yaxın komanda kimi göstərilir və görünür ki, İspaniya təmsilçisi Osasuna ilə rəqabətdə öndədir. Villarreal bu transferdən müəyyən məbləğ əldə edəcək, həmin məbləğin faizi isə əvvəlcədən razılaşdırılmış satışdan pay (sell-on) maddəsinə görə Yunayted-in hesabına köçəcək.

Klub daxilində mənbələr Kambwala üçün həmin satışdan pay şərtini vaxtilə “əhəmiyyətli” kimi xarakterizə etmişdi. Amma reallıq fərqlidir: Villarreal-in Como ilə razılaşmasının böyük rəqəmlərlə nəticələnməsi gözlənilmir. Bu da o deməkdir ki, Yunayted-in payı nəzərəçarpacaq olsa da, kassanı silkələyən məbləğ olmayacaq.

2024-cü ildə Villarreal Kambwala-nı almaq üçün Mançesterə 5,5 milyon avro + 6 milyon avro bonuslardan ibarət paket təklif etmişdi. Razılaşmaya üç il müddətinə geri alma (buy-back) imkanı, uyğunlaşdırma hüquqları (matching rights) və məhz indi işə düşən iri həcmli satışdan pay maddəsi daxil edilmişdi.

Bu cür şərtlər Yunayted üçün yeni deyil, amma artıq klub siyasətinin mərkəzinə çevrilib. Sir Jim Ratcliffe-in kluba sərmayə qoymasından əvvəl də bəzən bu tip maddələr müqavilələrə salınırdı. İndi isə Ineos-un futbol əməliyyatlarına nəzarəti ələ almasından sonra bu, demək olar ki, standart prosedurdur.

Artıq “qırmızılar” keçmiş oyunçularının hər növbəti transferindən gəlir götürmək üçün müqavilələrə sərfəli maddələr salmaqda israr edir. Strategiya aydındır: akademiyadan və kənardan gətirilən gənclər yalnız bir dəfə yox, karyeraları boyu klub üçün maliyyə resursuna çevrilir.

Bu yay bunun bir neçə nümunəsi var. Tyler Fredricson-un Lausanne-Sport-a satışında Yunayted həm yüksək faizli satışdan pay, həm də geri alma hüququnu özündə saxladı. Oxşar yanaşma Radek Vitek-in Middlesbrough-a keçidində də tətbiq olundu: müqaviləyə geri alma bəndi, uyğunlaşdırma hüquqları və gələcək satışdan 35 faizə qədər pay daxil edildi.

Keçən həftə Ethan Williams-ın Peterborough-a transferi bu xəttin nə qədər aqressiv davam etdiyini göstərdi. Yunayted bu razılaşmada 50 faizlik satışdan pay maddəsi ilə yanaşı, yenə geri alma və uyğunlaşdırma hüquqlarını da müqaviləyə saldı.

Kambwala-nın Villarreal-dən ayrılığı bəlkə də başlıqlarda yer alacaq qədər böyük transfer deyil. Amma Mançester Yunayted üçün bu, daha böyük planın bir hissəsidir: hər gedişdən, hər müqavilədən maksimum qazanc çıxarmaq və heç bir istedadı tamamilə əldən buraxmamaq.