Manchester United-in yay transfer pəncərəsi: Yenidən qurma və hədəflər
Champions League biletini vaxtından əvvəl cibinə qoyan Manchester United artıq tam gücü ilə yay bazarına dönüb. Klub üçün bu, sadəcə adi transfer pəncərəsi deyil. Bu, mərkəz xəttinin yenidən yazıldığı, böyük adların getdiyi, bahalı ümidlərin gətirildiyi bir yay olacaq.
Casemiro dövrü bağlanır – yerinə üçlük planı
Casemiro özü deyib: yayda qalmaq “heç bir şansı” olmayan bir ssenaridir. Dörd il, kuboklar, böyük səhnələr və indi isə ayrılıq. Onunla yanaşı Manuel Ugarte üçün də əvəzləyici axtarışı gedir. Klub daxildə hesablayıb: mərkəz xətti üçün təxminən 150 milyon funt ayrılıb və bu pula üç yeni yarımmüdafiəçi gəlməlidir.
Adlar isə artıq sıraya düzülüb. Siyahının önündə Brighton-un fiziki gücü və dinamizmi ilə seçilən Carlos Baleba dayanır. TEAMtalk-ın məlumatına görə, 80 milyon funtluq keçid “gözlənilən” sayılır və bu, yay planının bir nömrəli hissəsidir. United onu ötən yay da almağa cəhd etmişdi, amma Baleba qalmağı seçmişdi. İndi isə Old Trafford-a yol açıq görünür.
Baleba ilə yanaşı Nottingham Forest-dən Elliot Anderson və Crystal Palace-dan Adam Wharton da ciddi namizədlər sırasındadır. Onların adları tək deyil: Aurelien Tchouameni, Sandro Tonali, Alex Scott, Ayoub Bouaddi, Matheus Fernandes, Tyler Adams, Shea Charles – klubun skaut şəbəkəsi mərkəzi zona üçün demək olar ki, bütün Avropanı süzgəcdən keçir.
Sky Sports-un məlumatına görə, Lille-in gənc istedadı Ayoub Bouaddi bu siyahıya son qoşulan addır. Klub bu qədər alternativi sadəcə “baxmaq üçün” izləməz. Mərkəz xətti köklü şəkildə dəyişəcək.
Ederson üçün maaş yarışı
Mərkəz xətti üçün daha bir ciddi hədəf – Atalanta-nın Ederson-u. İtaliyalı jurnalist Matteo Moretto-nun dediyinə görə, Manchester United artıq braziliyalıya təklif göndərib və Atletico Madrid-in verdiyi şərtləri maaş baxımından xeyli üstələyib. Moretto-nun məlumatına əsasən, United ildə təxminən 4,5 milyon avro xalis maaş təklif edir.
Atletico ilə şəxsi şərtlər baxımından razılıq əldə olunmuş kimi görünsə də, maliyyə gücü burada Manchester klubunun tərəfindədir. Ederson-un profili – ikili mübarizələrdə sərt, topu irəli daşıya bilən, həm də təcrübəli – Casemiro sonrası üçün məntiqli hədəfdir.
Premier League bazarına hücum
Klubun transfer strategiyası da dəyişmir: diqqət yenə ilk növbədə Premyer Liqa oyunçularına yönələcək. Bryan Mbeumo və Matheus Cunha kimi addımlardan sonra rəhbərlik daxili bazarın risk baxımından daha etibarlı olduğuna inanır.
Sol cinah müdafiəsi bu yay ikinci böyük prioritet kimi görünür. Bournemouth-dan Adrien Truffert klubun radarındadır; eyni zamanda Alejandro Balde, David Raum və Myles Lewis-Skelly də ehtimal olunan variantlar sırasında göstərilir. Newcastle United müdafiəçisi Lewis Hall üçün isə Jason Wilcox-un şəxsən böyük pərəstişkar olduğu vurğulanır.
Sporting CP-nin sol cinah müdafiəçisi Maxi Araujo da gündəmdədir. Onun müqaviləsində 69 milyon funtluq sərbəstqalma bəndi olsa da, 35–43 milyon aralığında bir məbləğlə transferin baş tuta biləcəyi iddia olunur.
Hojlund-dan PSR qurtuluşu, Zirkzee üçün çıxış qapısı
Rasmus Hojlund hekayəsi Napoli ilə birlikdə yeni mərhələyə keçir. İtaliya çempionu 38 milyon funt dəyərində sərbəstqalma bəndini aktivləşdirməyə hazırdır və idman direktoru Giovanni Manna-nın sözlərinə görə, danimarkalı hücumçu onsuz da klubun uzunmüddətli planlarının içindədir. United üçün bu, təkcə uğursuz transferdən çıxış deyil, həm də PSR (Profitability and Sustainability Rules) çərçivəsində zərərdən qaçmaq imkanıdır: 44 milyon avroluq satışla hesablar tarazlanır.
Joshua Zirkzee üçün də qapı açılır. Bologna-da parlayan, Manchester United-də isə iz buraxmayan hücumçu üçün Napoli yenidən gündəmdədir. İtalyan mətbuatına görə, United onu icarəyə buraxmağa hazırdır və Zirkzee yayda klubdan ayrılmağa “hazırlaşanlar” siyahısındadır.
Rashford düyünü: Barcelona, Arsenal, Bayern və sol cinah planı
Marcus Rashford ətrafında isə tam bir yay serialı formalaşır. Barcelona onun üçün 26 milyon funt dəyərində satınalma opsiyasına malikdir, lakin Kataloniya tərəfi bu məbləği aşağı salmağa çalışır. Manchester United-in cavabı isə aydındır: “Tam ödəniş, ya da heç nə.”
İspan mətbuatında Anthony Gordon-un nümayəndələrinin Barcelona-da görüntülənməsi fonunda Rashford üçün alternativ axtarışları da başlayıb. Bu, Old Trafford rəhbərliyinə təzyiq kimi görünə bilər, amma klub geri çəkilmək niyyətində deyil.
Arsenal və Bayern Munich də Rashford-un vəziyyətini izləyir. Eyni zamanda Daily Mail yazır ki, United yayda sol cinah hücumçusu almaq niyyətindədir, lakin əvvəlcə Rashford-un gələcəyi qəti şəkildə həll olunmalıdır. Bu məsələ aydınlaşdıqdan sonra AC Milan ulduzu Rafael Leao üçün hərəkətə keçmək planlaşdırılır. Leao-nun San Siro-dan ayrılmağa hazırlaşdığı bildirilir.
Harry Kane ssenarisi: qapı açıq, yol bağlı
Harry Kane adı Old Trafford koridorlarında hələ də səslənir. Football Insider-in məlumatına görə, klub ingilis hücumçuya marağını saxlayır. Amma reallıq sərtdir: Bayern Munich Champions League finalına bir addım qalıb, Kane Almaniyada xoşbəxtdir və bu yay Premyer Liqaya dönüşü çox çətin görünür. United marağı masada saxlayır, amma bu, daha çox uzunmüddətli fürsət gözləmək kimidir.
Gənclər bazarı: Ouedraogo, Moreira, Kroupi və Amass
Gələcək üçün qurulan planlar da diqqət çəkir. RB Leipzig-in 19 yaşlı yarımmüdafiəçisi Assan Ouedraogo üçün Manchester United, Liverpool və Newcastle arasında yarış var. Ouedraogo bu mövsüm 18 oyunda üç qol vurub və Almaniya mətbuatına görə, United onu artıq bu yay gətirmək istəyir.
Portuqaliya U-21 yığmasının üzvü Afonso Moreira üçün də klub hərəkətə keçib. A BOLA yazır ki, Lyon gənc cinah oyunçusu üçün azı 22 milyon funt tələb edir. Onu ötən yay Sporting-dən cəmi 2 milyon funtdan az məbləğə almışdılar, indi isə “breakout” mövsümünün bəhrəsini yığmağa hazırlaşırlar.
Bournemouth-un 19 yaşlı hücumçusu Eli Junior Kroupi isə bu yay əlçatmaz görünür. i-nin məlumatına görə, Bournemouth onu satmamaq qərarını klub daxilində qəti şəkildə ortaya qoyub. United, Manchester City, Chelsea və Liverpool-un marağına baxmayaraq, Kroupi üçün “qapı bağlıdır”.
Harry Amass məsələsində isə başqa cür prioritet var. Gənc sol cinah müdafiəçisi bu mövsümün ilk yarısını Sheffield Wednesday-də icarədə keçirdi, yanvarda Norwich City-yə keçdi, lakin məşqdə aldığı zədədən sonra yalnız bir oyunda meydana çıxa bildi. Norwich onu yenidən icarəyə götürmək istəyir, amma yaydakı Dünya Çempionatına gedəcək oyunçuların çoxluğu fonunda Amass-ın ən azı mövsümöncəsi toplanışın sonuna qədər United-də saxlanılması gözlənilir.
Bruno Fernandes: yeni müqavilə və titul iddiası
Bruno Fernandes ətrafında çıxan şayiələr klubun səbrini daşırıb. TEAMtalk-a görə, Manchester United kapitanın gələcəyi ilə bağlı hər cür şübhəni aradan qaldırmaq üçün yeni müqavilə üzərində işləyir. Klub rəhbərliyi hesab edir ki, Fernandes növbəti iki il ərzində Premyer Liqa tituluna iddia etmək planında mərkəzi fiqur olmalıdır.
Türkiyədən isə başqa bir cəbhə var: Sky Sports Germany jurnalisti Florian Plettenberg yazır ki, Galatasaray üçün Fernandes hələ də “xəyal hədəf”dir. Lakin United-in Champions League-ə qayıdışı fonunda bu xəyal indi daha da uzaq görünür.
Rashford-dan mesaj, Neville-dən Mount hökmü, Schmeichel–Scholes polemikasI
Marcus Rashford Liverpool üzərində 3:2 hesablı qələbə və Champions League qayıdışı sonrası sosial şəbəkədə klubu təbrik etdi. O, bu mövsüm Barcelona forması ilə artıq turnirdə oynayıb və gələn mövsüm United-in Avropa elitasına dönüşündə yenidən rol ala bilər. Əlbəttə, əgər yayda gələcəyi Old Trafford-la kəsişsə.
Gary Neville isə Mason Mount barədə sərt danışır. Onun fikrincə, United Mount-u satmalı və daha çevik, həm mərkəzdə, həm də hücum xəttində bir neçə mövqedə oynaya bilən bir oyunçu gətirməlidir. Neville prioritet mövqelərin az olduğunu deyir və həmin mövqelərdə “tam səviyyəli” futbolçular tələb edir.
Peter Schmeichel və Paul Scholes isə Sunderland kapitanı Granit Xhaka barədə zidd mövqelər sərgiləyiblər. Schmeichel, Kobbie Mainoo ətrafında komanda qurulmasını, Casemiro-nun gedişindən sonra liderlik üçün Xhaka-nın gətirilməsini təklif edir. Scholes isə bu ideyanı dərhal rədd edir və yaş, dinamika baxımından Casemiro ilə eyni problemə düşmə riskini xatırladır. Schmeichel Xhaka-nın Sunderland-dəki liderliyini tərifləyir, Tonali-nin isə Newcastle-də hələ özünü tam sübut etmədiyini vurğulayır.
Peter Schmeichel başqa bir mövzuda da diqqət çəkib – Kobbie Mainoo-nun Dünya Çempionatına aparılmasını istəmir. O, Luke Shaw nümunəsini xatırladaraq, böyük turnirdən sonra altı ay oynamayan oyunçunun fiziki yükünü qabardır və United futbolçularının yayda dincəlməsini arzuladığını deyir.
Cunha, Sinayoko, Hall və Galatasaray xəyalı
Matheus Cunha ilə bağlı Braziliya mətbuatında yayılan, guya United-in onu Dünya Çempionatına hazır olması üçün son üç turda oynatmamaq barədə Braziliya Futbol Federasiyası ilə razılaşdığı iddiası klub daxilində təəccüblə qarşılanıb. Manchester Evening News-un məlumatına görə, bu xəbərin heç bir əsası yoxdur. Cunha özü də sosial şəbəkədə “what?” yazaraq bu iddiaları gülüş hədəfinə çevirib.
AJ Auxerre hücumçusu Lassine Sinayoko üçün də yarış qızışır. Africa Foot-un məlumatına əsaslanan xəbərlərə görə, Crystal Palace onu Jean-Philippe Mateta-nın əvəzedicisi kimi görür. Mövsüm ərzində 9 Ligue 1 qolu və Mali ilə Afrika Millətlər Kubokunda üç qol – bu statistika United-in də diqqətini çəkib. Mövsümün əvvəlində onunla bağlı ilkin danışıqlar aparıldığı, hətta ön müqaviləyə yaxınlaşıldığı iddia olunurdu, amma həmin vaxt Ruben Amorim-in vəziyyəti fərqli idi, indi isə o, 2027-yə qədər yeni anlaşma imzalayıb.
Sol cinah üçün West Ham United-dən El Hadji Malick Diouf da gündəmdədir, klub həm onu, həm də Sporting-dən Maxi Araujo-nu yaxından izləyir. Direktorlar otağında sol cinah müdafiəçisi üçün “ikinci prioritet” damğası artıq vurulub.
Galatasaray cəbhəsində isə Bruno Fernandes hələ də xəyal kimi qalır. Türk nəhəngi ötən yay da onu istəyirdi, indi də əlaqəni bərpa etmək niyyətindədir, amma United-in Champions League bileti bu transferin reallıq ehtimalını xeyli zəiflədir.
Hojlund, PSR və yay pəncərəsinin hüdudları
Napoli-nin Rasmus Hojlund üçün 38 milyon funtluq bəndi aktivləşdirməsi yalnız meydandakı planları deyil, klubun maliyyə strategiyasını da dəyişir. PSR çərçivəsində zərərdən qaçmaq, mərkəz xətti üçün 150 milyon funtluq büdcəni sərbəst şəkildə xərcləmək imkanı deməkdir. Klub artıq geri addım atmır: Casemiro gedir, Hojlund gedir, Rashford üçün sərt şərt qoyulub, mərkəz xətti isə sıfırdan yazılır.
Bu qədər böyük ad, bu qədər böyük məbləğ, bu qədər risk. Sual indi belədir: bu yay atılacaq addımlar Manchester United-i iki il ərzində titul mübarizəsinə qaytaracaq, yoxsa Old Trafford-da daha bir bahalı eksperimentə çevriləcək?
