Mayami Futbol Komandasının Hal-hazırkı Durumu

Mayaminin hazırkı halını bir cümlə ilə izah etmək çətindir. Amma bir fakt qaçılmazdır: bu komanda yaxşı deyil. Nashville-in şənbə axşamı 4:1-lik darmadağını hər şeyi açıb ortaya qoydu. Top onlardaydı, oyuna nəzarət sanki Mayamidə idi, amma hər əks-hücumda parça-parça oldular.

Mərkəz xətti ağır hərəkət edirdi. Xətlər arasında məsafələr həddən artıq böyüyürdü. Hany Mukhtar kimi liqanın ən güclü “10 nömrə”lərindən biri üçün bu, dəvət məktubu idi. O da fürsəti qaçırmadı – dubl etdi, Mayaminin mərkəzini asanlıqla yardı. Sam Surridge hesabı böyütdü. Andy Najar isə sağ cinahdan sanki cinah müdafiəçisi yox, hücumçu kimi cərimə meydanına dalıb dördüncü qolu vurdu. Mayami isə arxada heç vaxt sabit müdafiə forması tapa bilmədi. Eddi Tagseth və Matthew Corcoran mərkəzdə onları meydandan sildi. “Herons” üçün qaranlıq bir axşam idi.

Bu oyun bir daha sadə formulu göstərdi: Messini susdur və ya maksimum dərəcədə məhdudlaşdır, qalan hər şey özü dağılır. Messi müdafiə etmək istəmir. Luis Suarez 39 yaşında bütün gücü ilə çalışır, amma ayaqları yetmir. Sağ cinahda Rodrigo De Paul qaçır, çalışır, mübarizə aparır, amma mərkəzdə Casemiro sanki palçığın içində qaçır. Bu, sürpriz deyil, amma Jordi Alba ilə 2022-dən bəri müntəzəm oynamayan Sergio Reguilón arasındakı fərq gözqamaşdırıcı dərəcədə böyükdür. Bu çatışmazlıqları gizlədə biləcək taktiki sehr yoxdur. Mayami ən yaxşı halda, bir ulduzun çiynində daşınan orta səviyyəli pley-off komandasıdır.

Messi üçün qurulan komanda

Kağız üzərində bunların çoxu düzələn şeylərə bənzəyir. Kənardan baxan hər kəs bu heyəti analiz edib zəif nöqtələri göstərə bilər. MLS-in sərt maaş limitlərinə baxmayaraq, Mayami indiyədək kifayət qədər “yaradıcı” olub. Rəqib azarkeşlər bəyənməsə də, klub böyük adları gətirmək üçün maliyyə qaydaları içində akrobatika edib.

Aydın görünən budur: ön xəttə və mərkəzə ayaq, enerji lazımdır. Elit mərkəz yarımmüdafiəçiləri hər yerdə tapılmır, MLS-ə gəlmələri isə daha da çətindir. Amma nəzəri olaraq, məsələn, Casemiro əvəzinə N'Golo Kante tipli oyunçu gətirilə bilərdi. Təxminən 15 milyon dolların German Berterame kimi, konkret bir sahədə dəhşətli üstünlüyü olmayan hücumçuya xərclənməsi nə dərəcədə ağıllı qərar idi? Benjamin Cremaschi, Javier Mascherano tərəfindən düzgün istifadə olunmadığını açıq etiraf etdikdən sonra, bəlkə də çıxış yolunu klubdan kənarda axtarmağa məcbur qaldı. Halbuki ona bir az daha çox etibar Mayamiyə gənc, enerjili, üzərində qurula biləcək mərkəz yarımmüdafiəçi verə bilərdi.

Məsələnin kökü isə başqadır: Messinin bu layihədə söz haqqı açıq-aşkar hiss olunur. Hər şey 2023-ə, Sergio Busquets və Alba-nın Messini cəlb etmək üçün gətirildiyi dönəmə gedib çıxır. De Paul özü etiraf edib ki, Messiylə oynamaq və Dünya Çempionatı öncəsi formada qalmaq istəyi – turnir ərəfəsində ikisinin əlavə məşqlər etməsi haqda məlumatlar vardı – onu Atletico Madrid-dən uzaqlaşdıran əsas səbəb olub.

Hətta illərlə Real Madrid-də Messinin rəqibi olmuş Casemiro belə, Mayamiyə gəlişini açıq şəkildə onunla əlaqələndirdi: öz təqdimat mətbuat konfransında “Mənim üçün, şübhəsiz, yalnız zamanların ən yaxşı futbolçusu ilə oynamaq üçün gəlirəm. Zövq almaq, ona qazanmağa davam etməyə kömək etmək istəyirəm. O, qalibdir. Daha bir qalib, rəqabəti sevən futbolçu gəlir” dedi.

Messinin özü zəng edir, yoxsa yox – bu, o qədər də vacib deyil. Fakt budur: bu komanda ilk növbədə onu xoşbəxt etmək üçün yığılır, uzunmüddətli qalib layihə yaratmaq üçün yox. Mayami isə məhz bu sualla üz-üzədir: bu hekayənin Messidən sonrakı fəslini necə yazacaqlar?

MLS dəyişir, Mayami isə asılı qalıb

MLS üçün qəribə bir dönəm yaxınlaşır. 2027-28 mövsümündən tətbiq olunacaq payız-yaz təqvimi klublara transfer bazarında daha çevik davranmaq imkanı verəcək. Liqa sahiblərinə maaş strukturlarının yenidən qurulması, daha çox xərcləmə imkanı yaradılması ilə bağlı təkliflər təqdim olunub. Yəni tezliklə bəziləri daha ciddi layihələr qurmaq şansı qazanacaq.

Messinin müqaviləsi 2028 mövsümünün sonuna qədərdir. Yəni o, gələn ilin qısa “sprint mövsümü”ndə və ilk tam payız-yaz kampaniyasında kağız üzərində Mayamiyə bağlıdır. Minimum hesabla, klubun əsas ulduzla bir tam il, bir qısaldılmış mövsüm və cari kampaniyanın qalan hissəsi var. Amma Messi ilin sonunda “bəsdir” desə, mənzərə dərhal qaranlıqlaşır.

Çünki o zaman Mayami uyğunlaşmayan, bahalı DP-lərlə yüklənmiş vəziyyətdə qala bilər. De Paul DP maaşı ilə 2029-a qədər müqavilə altındadır. Berterame üçün də eyni situasiya. Casemiro hazırda DP slotu tutmur, amma De Paul-da olduğu kimi, əvvəl daha aşağı maaşla imzalayıb, sonra şərtləri yaxşılaşdırmaq variantı burada da işə salına bilər.

Bu isə bir neçə səviyyədə kabusa çevrilə bilər. Mayamiyə gələcəkdə lazım olan təkcə yüksək səviyyəli oyunçu deyil, həm də klubun idman və kommersiya simasına çevrilə biləcək bir fiqurdur. Bu baxımdan Julian Alvarez ideal ssenaridir. Messinin kassadakı təsirini təkrarlaya bilməz – bunu heç kim edə bilməz – amma səviyyəsi, yaşı, marketinq potensialı, işgüzarlığı və Argentina bağlantısı onu real varis planının mərkəzinə yerləşdirəcək yeganə ad edir.

Problem ondadır ki, Alvarez daha çox xəyal kimi görünür. Atletico Madrid onu 2024-cü ildə Manchester City-dən götürmək üçün ilkin 75 milyon avro, üstəlik 20 milyon avroya qədər bonus ödəyib. Bu yay klubun Real Madrid-dən gələn 150 milyon avroluq təklifi rədd etdiyi bildirilir. Deməli, Mayami MLS standartlarının çox-çox üzərində bir transfer paketi hazırlamalı, sonra da onun maaşını həll etməlidir.

Real varis planı təklif edən yeganə ad odur. Əgər Mayami belə bir razılaşmanın maliyyə baxımından mümkünsüz olduğuna qərar versə, növbəti məntiqli addım Amerika ulduzuna yönəlmək ola bilər.

Christian Pulisic və Weston McKennie bu mənada ən uyğun iki namizəddir. Pulisic ölkənin ən tanınmış aktiv futbolçusudur, McKennie isə həm keyfiyyət, həm xarakter, həm də ABŞ bazarında rezonans doğura biləcək profilə sahibdir. Amma heç biri Messinin qlobal cazibəsinə yaxın deyil. Onlar Inter Miami-nin növbəti versiyasının parçası ola bilər, amma klubun ətrafında qurulduğu cazibə mərkəzini əvəz etmək onlardan gözlənilə bilməz.

Məhz buradadır düyün. Mayami Messiyə təkcə meydanda yox, biznesdə də bağlıdır. Onun varlığı sponsorluqları, bilet tələbatını, qlobal diqqəti sürükləyir. Nu Stadium-da bir tribuna onun adını daşıyır, kompensasiya paketinə klub səhmlərinin də daxil olduğu bildirilir. Bu, təkcə futbol qərarı deyil. Messi bütün layihənin təməlidir və Mayami hələ göstərməyib ki, o getdikdən sonra bu təməli necə yenidən quracaq.

Köhnə kabus geri qayıda bilər

Sonra nə olacaq? Cavab aydın deyil.

Messidən əvvəl Mayami MLS-in ən zəif komandalarından biri idi. Blaise Matuidi və Gonzalo Higuain kimi adlar gətirildi, amma heç biri Messiyə yaxın təsir göstərmədi. Stadionda doluluq liqanın son üçlüyü səviyyəsində idi. Messi 2023-cü ilin iyulunda gələndə, komanda artıq pley-off yarışından demək olar ki, qopmuşdu, vitrinində heç bir kubok yox idi. Phil Neville işdən çıxarılmış, heyət deşik-deşik, klub istiqamətsiz görünürdü.

Təhlükə ondadır ki, Mayami yenidən həmin dalana qayıda bilər. Keçid labüddür və asan olmayacaq. Klub idman və kommersiya kimliyini bu qədər Messinin üzərində qurub, argentinalı isə təbii olaraq, Mayamidəki hekayəsinin nə vaxt bitəcəyinə özü qərar verəcək. “Herons” üçünsə bu, sonrakı mərhələyə hazırlaşmaq üçün çox az boşluq buraxır.

Messinin bir son “Herkul” mövsümü keçirib Mayamini daha bir kuboka daşıması tamamilə mümkündür. Amma son nəticələr, xüsusilə Nashville qarşısındakı aciz performans göstərir ki, bu, natamam komanda üçün nəhəng yük olacaq.

Hələlik isə Mayami hər məyusedici oyundan sonra ulduzunun tunelə tərəf yoxa çıxmasını izləyir və səssizcə eyni sualı düşünür: o, bu tuneldən sonuncu dəfə yoxa çıxanda, klubun əlində nə qalacaq?