Mbappé Dembélé ilə münasibətləri aydınlaşdırdı: Seçilmiş biri

Ballon d'Or uğrunda mübarizə Fransa millisinin iki ulduzu – Kylian Mbappé və Ousmane Dembélé – ətrafında kiçik fırtına qoparmışdı. Bir neçə gündür mətbuatı qızışdıran bu mövzuya indi birbaşa Mbappé nöqtə qoymağa çalışır.

“O həmişə istedadlı sayılıb, mən isə seçilmiş biri”

Hər şey 11 sentyabrda, Mbappénin “France Football”a verdiyi müsahibə ilə başladı. Oktyabrın 26-da Londonda təqdim olunacaq Ballon d'Or şanslarını dəyərləndirən “Real Madrid” hücumçusu söhbət zamanı karyera yolunu Dembéléninki ilə müqayisə etdi və həmin cümlə mübahisənin qığılcımı oldu.

“Sizə deyim ki, ona həmişə istedadlı futbolçu kimi baxıblar. Mənə isə həmişə seçilmiş biri kimi yanaşıblar. Mən əvvəldən zirvədə olmuşam. Onun yolu fərqli olub, zədələr, fasilələr, amma yaxşı qayıtdı”, – keçmiş “PSG” komanda yoldaşı haqqında danışan Mbappé belə dedi.

“Seçilmiş biri” ifadəsi sosial şəbəkələrdə sürətlə yayıldı, şərhlər alovlandı. Fransa millisinin hücum xəttinin iki aparıcı adının Ballon d'Or fonunda bu cür müqayisə edilməsi gərginlik ehtimalını daha da qızışdırdı.

Dembélé eyni ifadəni geri qaytardı

Cəmi iki gün sonra cavab gəldi. Son Ballon d'Or qalibi olan Dembélé “Ligue 1+” kanalına danışdı və Mbappénin istifadə etdiyi həmin sözləri bu dəfə özü işlətməyi seçdi. Ad çəkmədi, amma mesaj kifayət qədər aydın idi.

“Karyeram boyu bir kəlmə də danışmamışam, çox çalışmışam. Dediyim kimi, heç vaxt seçilmiş biri olmamışam, amma çox işlədim və ötən mövsüm “PSG”də fantastik mövsümlə mükafatlandırıldım. Bu il necə olacaq, görəcəyik, təzyiq yoxdur, sakitəm”, – deyə o bildirib.

Bu cavabdan sonra hər şey hazır idi: Fransa millisində yenidən bir araya gələcək iki ulduz, Ballon d'Or yarışı, “seçilmiş biri” ifadəsinin iki tərəfdən səslənməsi. Millinin toplanışı ərəfəsində gözləntilər və şayiələr maksimum həddə çatdı.

“Onunla danışmışam, dostuq”

Ancaq Mbappé odun üstünə daha çox yağ tökmək əvəzinə, alovu söndürməyi seçdi. “L’Équipe”ə açıqlamasında o, Dembélé ilə artıq bu mövzunu müzakirə etdiyini və aralarında heç bir problem olmadığını açıq şəkildə bildirdi.

“Artıq bu barədə onunla danışmışam və yox, heç bir gərginlik yoxdur. O, mənim dostumdur. Düşünürəm ki, bu mövzuda ümumiyyətlə problem yoxdur, tamamilə sakitəm”, – yeni sponsorunun tədbirində çıxış edən “10 nömrə” belə deyib.

Mbappéyə görə, yaranan səs-küy bir qədər də Fransa millisinin öz kontekstindən qaynaqlanır: “Nations League dövründə və Fransa yığmasının ətrafında həmişə müzakirə üçün mövzu tapılmalıdır və məncə, bu dəfə seçilən mövzu da çox yaxşıdır”, – deyə o, əlavə edib.

Ballon d'Or üçün yarış davam edir, sözlər isə artıq deyilib. İndi növbə meydandadır: səs verənlər “seçilmiş biri”nə üstünlük verəcək, yoxsa səssiz-səmirsiz çalışan çempiona?