Meksika Yığmasına Sərt Xəbərdarlıq: Gəlməyən Dünya Çempionatını Unutsun
Meksika Futbol Federasiyası ölkə daxilində dalğalanma yaradacaq qədər açıq mesaj verdi: Liga MX klublarında çıxış edən futbolçular təlim-məşq toplanışına gəlməsələr, evlərində keçiriləcək dünya çempionatını televizordan izləyəcəklər.
Söhbət adi toplanışdan getmir. Çərşənbə günü, 6 mayda start götürən bu düşərgə Fifa-nın rəsmi beynəlxalq pəncərəsindən kənarda təşkil olunub və birbaşa olaraq Liga MX pley-off oyunları, eləcə də Concacaf Champions Cup qarşılaşmaları ilə toqquşur. Yəni klub mövsümünün qaynayan nöqtəsi ilə milli komandanın “ölümsüz” layihəsi eyni anda gündəmdədir.
Federasiya isə tərəddüdü yerə vurdu. Futbolçulara yerli vaxtla saat 20:00-a qədər – cümə axşamına keçən gecə Bakı vaxtı ilə saat 03:00-a qədər – Meksiko Sitidəki Yüksək Performans Mərkəzinə çatmaq üçün qəti son vaxt verildi.
Aguirre-nin siyahısı və sərt şərt
Ötən həftə federasiya baş məşqçi Javier Aguirre-nin seçdiyi 20 Liga MX oyunçusunun adını açıqladı. Bu 20 nəfərdən 12-si artıq dünya çempionatına gedəcək heyətdə öz yerini təmin edib. Yerdə qalanlar isə bu düşərgədə son şanslarını oynayırlar.
Federasiyanın rəsmi açıqlaması da tonunu gizlətmədi: “Bütün oyunçular Meksiko Sitidəki Yüksək Performans Mərkəzinə gəlməlidirlər. Məşqçilər korpusunun göstərişinə əsasən, bu gün təlim-məşq toplanışına qatılmayan istənilən futbolçu dünya çempionatından kənarlaşdırılacaq”.
Meksika, ABŞ və Kanada ilə birgə yayda turnirə ev sahibliyi edəcək. Yekun heyət 1 iyunda açıqlanacaq. Buna qədər isə sıx qrafik gözlənilir: 22 mayda Qana, 31 mayda Avstraliya, 4 iyunda isə Serbiya ilə yoldaşlıq görüşləri var. Ardınca 11 iyunda Estadio Azteca-da Cənubi Afrika ilə mundialın açılış matçı.
Belə bir fonun içində klub-milli qarşıdurmasının bu qədər kəskinləşməsi təsadüfi deyil.
Toluca–Chivas xəttində gərginlik
Eyni günlərdə Toluca üçün də mövsümün həlledici anları yaşanır. Komanda Concacaf Champions Cup yarımfinalının cavab oyununda MLS təmsilçisi Los Angeles FC ilə üz-üzə gələcək. İlk matçda 1:2 hesabı ilə uduzan meksikalılar üçün bu görüş klub tarixində önəmli dönüm nöqtəsi ola bilər.
Toluca çərşənbə axşamı federasiyaya rəsmi şəkildə müraciət edərək hücumçu Alexis Vega və sol cinah müdafiəçisi Jesus Gallardo-nun bu mərhələ üçün komandada saxlanılmasını xahiş edib. Bu tələb dərhal ölkə daxilində rezonans doğurdu.
Ən çox qəzəblənən isə Chivas de Guadalajara oldu. Çünki onlar artıq öz beş oyunçusunu – qapıçı Raul Rangel, yarımmüdafiəçi Luis Romo, ABŞ-da doğulmuş yarımmüdafiəçi Brian Gutierrez, cinah oyunçusu Roberto Alvarado və hücumçu Armando Gonzalez-i – millinin ixtiyarına buraxmışdılar.
Toluca-nın bu addımı Liga MX klubları ilə federasiya arasında əvvəlcədən əldə olunmuş razılaşmanın pozulması kimi qəbul edildi. Yəni bəziləri milli üçün qapını tam açır, bəziləri isə yarımçıq.
Chivas prezidenti Amaury Vergara sosial şəbəkədə açıq mesaj yazdı: “Razılaşmalar yalnız bütün tərəflər onlara hörmət etdikdə keçərlidir. İdman Direktorluğuna göstəriş verdim ki, futbolçularımız sabah klubun bazasına gəlsinlər”. Bu cümlə həm federasiyaya, həm də rəqiblərə ünvanlanan açıq xəbərdarlıq idi.
Chivas özü də asan durumda deyil. Komanda ötən həftəsonu pley-off-un 1/4 final mərhələsinin ilk oyununda Tigres-ə 1:3 hesabı ilə məğlub olub və cavab görüşünə təzyiq altında hazırlaşır.
Çərşənbə günü klubdan verilən yeni açıqlama isə mövqeyi tam aydınlaşdırdı: “Futbolçularımızın 2026 dünya çempionatında Meksikanı təmsil etmək istəyinə hörmət edirik və bu imkanı məhdudlaşdıran tərəf olmayacağıq. Buna görə də onlar təlim-məşq toplanışına vaxtında və qaydalara uyğun şəkildə qoşulacaqlar”.
Aguirre: “Heç bir güzəşt yoxdur”
Federasiyanın sərt bəyanatından sonra Javier Aguirre mətbuat qarşısına çıxdı və bütün suallara tək cümləlik cavab verdi: “Bəyanatın nə qədər aydın olduğunu bilirsiniz: kim gəlməsə, dünya çempionatında olmayacaq. Güzəşt edə bilmərik, qətiyyən”.
Baş məşqçi eyni zamanda həm Chivas-a, həm də Toluca-ya təşəkkür etdi və ortada rəsmi pozuntu görmədiyini vurğuladı: “İndiyə qədər pley-off oyunları yığmanın futbolçuları olmadan keçirilib. İndiyə qədər hamımız imzaladığımız, müzakirə etdiyimiz, razılaşdığımız şərtlərə əməl etmişik – bizi şərtsiz şəkildə dəstəkləyiblər”.
Aguirre bu layihəni “unikal” adlandırdı və komandaya, eləcə də ictimaiyyətə verilən sözü xatırlatdı: “Burada qeyri-adi heç nə baş vermir, hər şey plan üzrə gedir. Azarkeşlər, futbolçular, klub rəhbərləri, media – hamımız eyni qayıqdayıq”.
Məsələ indi sadə, amma amansız seçimə gəlib dirənib: klubun bu mövsümü, yoxsa ölkənin öz evində oynayacağı dünya çempionatı? Cavabı verəcək olanlar isə artıq saatlarla deyil, dəqiqələrlə yarışırlar.
