Mike Dean: Hakimlikdə heç vaxt dürüstlüyü sarsıtmaq istəməmişəm

Keçmiş İngiltərə elit hakimi Mike Dean öz etiraflarından sonra yaranan qalmaqala cavab verib və “oyunun dürüstlüyünü sarsıtmaq” niyyətinin heç vaxt olmadığını bildirib.

25 il Premyer Liqada fit çalan, 550-dən çox oyunda meydançaya çıxan Dean 2022-ci ildə hakimliyi bitirib, daha bir mövsüm isə VAR komandasında çalışdıqdan sonra 2023-də bu roldan da ayrılıb.

Alovlanan mübahisə isə onun “Jamie Vardy's Having A Party” podkastında dediklərindən sonra başladı. Dean orada zarafatla özünə meydan oxuduğunu, fit çalmadan oyunu nə qədər axıda biləcəyini yoxladığını, həmçinin mərkəz dairəsindən çıxmadan nə qədər qala biləcəyini sınaqdan keçirdiyini danışmışdı.

Bu sözlər, xüsusən də hakimlikdə “oyunlar” oynadığını deməsi, İngiltərədə hakimlərin qərəzsizliyinə dair köhnə şübhələri yenidən gündəmə gətirdi. Keçmiş Premyer Liqa hakimi Mark Halsey başda olmaqla bir çox sabiq rəsmi onun açıqlamalarının ölkədəki hakimliyin bütövlüyünü sual altına qoyduğunu bildirdi.

Təzyiq artdıqca Dean mövqeyini aydınlaşdırmaq məcburiyyətində qaldı.

O, cümə günü Instagram hesabında yazdı: “Peşəkar hakim kimi keçirdiyim 25 il ərzində Oyunun Qaydalarını həmişə bacardığım qədər yaxşı tətbiq etmişəm”.

Dean öz üslubunu belə izah etdi: “Mənim hakimliyə yanaşmam həmişə oyunun axmasına şərait yaratmaq olub və mümkün qədər təmas üçün yüksək hədd tətbiq etməyi üstün tutmuşam, bunu futbolçular da bəyənirdi. Amma əgər düzgün mövqedən gördüyüm elə bir kobud müdaxilə olurdu ki, reaksiya vermək lazım idi, qərarı verirdim”.

Onun sözlərinə görə, niyyət heç vaxt hakimliyin etibarlılığını ləkələmək olmayıb: “Heç bir mərhələdə bu ölkədə hakimliyin dürüstlüyünü sual altına almaq, tənqid etmək və ya sarsıtmaq fikrim olmayıb. Mən həmişə bu peşəyə və hakim olmağın gətirdiyi məsuliyyətə hörmətlə yanaşmışam”.

Dean etiraf edib ki, fit çalmadan nə qədər dözə biləcəyini “Premyer Liqada bir neçə dəfə”, VAR dövründən əvvəl sınayıb. Həmin məşhur mərkəz dairəsi oyunu da o dövrdən qalan vərdişdir:

“Premyer Liqada mənimlə bağlı başqa bir şey də var idi: Mərkəz dairəsində dayanıb nə qədər orada qala biləcəyimi görmək istəyirdim”, – deyə o əlavə edib.

Son cümləsi isə sadə olub: “Bu, sadəcə mənim zarafatım idi”.

İndi isə bu “zarafatın” İngiltərə hakimliyinə nə qədər baha başa gələcəyi müzakirə olunur.