Mikel Arteta Premyer Liqa rəhbərliyinə açıq çağırış edir
Mikel Arteta Premyer Liqa rəhbərliyinə açıq mesaj göndərib. O, qərarın uzadılmasını yox, dərhal verilməsini istəyir – özü də elə bu mövsüm üçün.
"Arsenal"ın baş məşqçisi matç günü heyətlərinin genişləndirilməsini tələb edir və bunu birbaşa "futbolçuların rifahı" ilə əsaslandırır. Hazırda qaydalar baş məşqçilərə ehtiyatda 9 oyunçu saxlamağa icazə verir; pandemiyadan əvvəl bu rəqəm 7 idi. Arteta isə hesab edir ki, bu, artıq yetərli deyil.
Bu axşam komandası "Aston Villa" ilə qarşılaşacaq, amma Arteta mövsüm boyu çətin qərarlar verməli olub. Bəzən Gabriel Martinelli, bəzən də Gabriel Jesus kimi ulduzlar ümumiyyətlə matç günü heyətinə düşməyib. Onların tribunaya belə yazılmaması yalnız taktiki seçim deyil, daxildə gərginlik yaradan, gələcəklə bağlı sualları artıran qərarlardır. Arteta bunu "bütün tərəflər üçün problem paketi" kimi görür.
Mütəxəssis açıq danışır: “Ona görə Premyer Liqa rəsmilərinə yalvarıram ki, bu sayları artırmağı nəzərdən keçirsinlər, sadəcə futbolçuların təhlükəsizliyi üçün. Bu, ən vacib məsələdir”.
Onun fikrincə, müasir təqvim bu qaydalarla bir araya sığmır: “Düşünürəm ki, beynəlxalq matçların tələb etdiyi səviyyəni saxlamaq üçün hər komandanın meydanda, ideala yaxın halda, 20-dən çox futbolçuya ehtiyacı var. Amma qaydalar belədir və bu qaydalar çərçivəsində oynamaq məcburiyyətindəyik”.
Arteta üçün ən ağır yük isə texniki-taktiki yox, insani tərəfdir. O, həmin "çətin söhbətlərdən" danışır – xüsusilə də evdə oturub televizordan baxmaq yerinə komanda ilə səfərə çıxmaq, paltardəyişmə otağında olmaq istəyən futbolçularla.
“Bu sual, əslində, ilk növbədə futbolçulara verilməlidir, – deyə o əlavə edir. – Onlar nə istəyir? Əgər desələr ki, yox, mən evdə qalmağa üstünlük verirəm, onda problemimiz var. Çünki bu o deməkdir ki, etdikləri işi sevmirlər”.
Arteta əmindir: əksər oyunçu üçün matç günü heyətinin bir parçası olmaq, hətta meydana çıxmasa belə, əsas hissədir. “Əminəm ki, futbolçulara soruşsanız, hamı matç günü komandanın bir hissəsi olmaq istəyəcək. Yoxsa kimsəyə deməlisiniz ki, sən bu gün heç heyətdə də yoxsan. Bu, son dərəcə ağır qərardır. Və heç kimə xeyir gətirmir”.
Onun arqumenti sadədir: kənarda qalan hər futbolçu klubdan uzaqlaşır, özünü dəyərləndirilmiş hiss etmir, performansını göstərmək imkanı az olur. “Bu, nə klubun xeyrinədir, nə futbolçunun qiymətləndirilməsinə kömək edir, nə də onların özünü komandanın bir hissəsi kimi hiss etməsinə. Mənim fikrimcə, bu, həqiqi problemdir və çox sadə həlli var”, – Arteta sözlərini belə tamamlayıb.
İndi top Premyer Liqa rəhbərliyinin meydanındadır. Qayda dəyişəcək, yoxsa baş məşqçilər ulduzlarını yenə tribunaya göndərməyə məcbur qalacaqlar?
