Neymar və Robinho Jr: Məşqdəki Dava və Santos-un Taleyi
Copa Sudamericana-da Deportivo Recoleta ilə səfərdə 1:1 hesablı heç-heçə, qol müəllifi isə yenə də o – Neymar. Lakin oyundan sonra bütün diqqət tabloya yox, Santos-un 10 nömrəsinin dilindən çıxacaq sözlərə yönəldi. Çünki artıq Braziliya nəhəngində həftəsonu məşqində baş verən dava gizli sirr deyildi.
Neymar jurnalistlərin qarşısına qaçmaq üçün yox, məsuliyyəti üzərinə götürmək üçün çıxdı. Təcrübəli hücumçu təsdiqlədi ki, 18 yaşlı Robinho Jr ilə mübahisə idarədən çıxıb, söz davası fiziki toqquşmaya çevrilib.
Onun sözlərinə görə, məşqdəki anlaşılmazlıq gözlənilmədən böyüyüb, o isə həddini aşıb. Neymar bildirdi ki, hadisədən dərhal sonra həm gənc komanda yoldaşından, həm də ailəsindən üzr istəyib, paltardəyişmə otağında söhbət ediblər, məsələni içəridə bağladıqlarını düşünüblər. Ardınca bazar ertəsi bütün kollektivin qarşısında yenidən üzr istədiyini, Robinho Jr-in də öz payına düşən məsuliyyəti etiraf etdiyini vurğulayıb. Amma komandanın içindən kənara sızan məlumatlar hər şeyi böyüdüb, qalmaqalı yeni səviyyəyə daşıyıb.
Gənc hücumçu isə susmadı. Robinho Jr açıq şəkildə bildirdi ki, məşq zamanı Neymar-dan üzünə sillə alıb. Faktı gizlətmədi, amma davamını da bir o qədər aydın qoydu: kin yoxdur, mövzu bağlanıb.
Onun sözlərinə görə, müqavilənin birtərəfli ləğvi ilə bağlı ilkin müraciət də emosiyanın diktəsi ilə verilib. O, agentləri ilə birgə əsəbin təsiri altında bu addımı atdığını, artıq rəsmi tələbi geri götürdüyünü və 2031-ci ilin martına qədər Santos-la müqaviləsinə sadiq qalmaq niyyətində olduğunu açıqlayıb.
Robinho Jr üçün bu hadisə təkcə peşəkar yox, şəxsi zərbə də olub. Çünki Neymar onun uşaqlıqdan bəri kumiridir. İlk hədiyyəsini ondan 8 yaşında aldığını, hədiyyəni göz yaşları ilə qarşıladığını, bu günə qədər saxladığını xatırladıb. İndi isə həmin idol onu sillələyib. Amma gənc forvard deyir: səhv var, amma səhvi etiraf edən, dəfələrlə üzr istəyən bir Neymar da var. O, özünü də yetkin davranış sərgilədiyini, yaxınlaşıb danışdığını, məsələni kişi kimi həll etdiklərini deyib. Ətrafdakıların şişirtmələrindən, yalanlardan narazıdır, amma özü üçün nöqtə qoyub: sakitdir, danışılıb, həll olunub.
Meydanda isə Santos üçün sakitlikdən əsər-əlamət yox idi.
Neymar-ın qol vurduğu gecə Braziliya nəhənginə rahat nəfəs gətirməli idi. Hesab açıldı, oyun nəzarətdə kimi görünürdü. Amma son dəqiqələrdə Deportivo Recoleta-nın Fernando Galeano-sunun zərbəsi bütün planları alt-üst etdi. Top tora, Santos isə qrupun dibinə yuvarlandı.
1:1 – kağız üzərində adi heç-heçə. Reallıqda isə Santos üçün həyəcan siqnalı.
Dörd oyundan sonra cəmi üç xal, qrup D-də sonuncu pillə. Copa Sudamericana-nın reqlamenti də amansızdır: yalnız qrup birincisi birbaşa 1/8 finala keçir. Bu o deməkdir ki, artıq səhv üçün yer yoxdur.
Santos indi öz evində San Lorenzo və Deportivo Cuenca ilə ardıcıl iki finala çıxacaq. Hər ikisində qələbə şərtdir, başqa yol görünmür. Məşq meydançasındakı gərginlik, emosional partlayışlar indi heç nəyə yaramır. Bu enerji indi yalnız bir istiqamətə yönəlməlidir – oyuna.
Neymar və komanda yoldaşları üçün sual sadədir, cavabı isə ağır: sillələrin, üzrxahlıqların danışıldığı bu həftə, Santos-u qitə səhnəsindən utancverici şəkildə silən dönəm kimi tarixə düşəcək, yoxsa məhz buradan başlanacaq dönüş hekayəsi?
