Paris FC hücum xəttini gücləndirir: Jonathan David hədəfdir
*La Gazzetta dello Sport*un məlumatına görə, *Paris FC* bu yay hücum xəttini gücləndirmək üçün gözlənilməz, amma iddialı bir addım atmağa hazırlaşır: klub *Juventus*un forvardı *Jonathan David*in transferi uğrunda mübarizəyə qoşulub.
Kanada millisinin üzvü Turində özünü tapa bilmədi. Ötən yay *Lille OSC*dən azad agent kimi gələn 26 yaşlı hücumçu *Juventus*da gözlənilən sıçrayışı edə bilmədi və indi *Luciano Spalletti*nin planlarında yer almır. İtaliya mətbuatı futbolçuya açıq şəkildə çıxış qapısının göstərildiyini yazır.
Bu vəziyyət *Paris FC* üçün fürsət pəncərəsi açıb. Klub yayda hücum xəttində ciddi dəyişikliklər yaşadı: əvvəlcə *Willem Geubbels* satıldı, sonra isə onun yerinə *Lassine Sinayoko* gətirildi. Elə hamı bununla hücum xəttinin formalaşdığını düşünürdü ki, bir xəbər hər şeyi alt-üst etdi.
*Ciro Immobile* gözlənilmədən karyerasını bitirdiyini elan etdi. Daha bir mövsüm davam edəcəyi gözlənilən təcrübəli qolçu keçən ay *Paris FC*nin paltardəyişmə otağında komanda yoldaşlarına yaxın vaxtlarda futboldan gedəcəyini açıqladı. Bu qərar Liam Rosenior-un planlarını dəyişdirdi, hücum xəttində boşluq açıldı.
Məhz bu fonunda *Jonathan David* adı ön plana çıxıb. *Paris FC* rəhbərliyi və baş məşqçi hücuma əlavə keyfiyyət, rəqabət və dərinlik qatacaq bir oyunçu axtarır. Kanada millisinin forvardı bu profilə tam uyğun gəlir: təcrübəli, Avropa səviyyəsində sınaqdan keçmiş, fərqli hücum sistemlərinə adaptasiya ola bilən bir oyunçu.
Amma bu hekayə təkcə Paris klubu ilə bitmir. Səhnəyə böyük rəqib çıxıb – *Atletico Madrid*. İspaniya nəhəngi də *Jonathan David*lə maraqlanır və bu, *Paris FC*nin işini xeyli çətinləşdirə bilər. İdman layihəsi, maaş paketi, turnir səviyyəsi – bütün bu detallar hücumçunun qərarında həlledici rol oynaya bilər.
Bir tərəfdə yenidən doğulmaq, daha çox meydan vaxtı və komandanın mərkəzi fiqurlarından birinə çevrilmək şansı verən *Paris FC*. Digər tərəfdə isə *Atletico Madrid* kimi Çempionlar Liqası ambisiyalı bir klub.
*Juventus*dan ayrılıq artıq real görünür. İndi sual başqadır: *Jonathan David* karyerasını Parisdə yenidən yandırmağa çalışacaq, yoxsa Madrid səhnəsini seçəcək?
