Rafael Leao Milan-dan ayrılmağı düşünür: Yeni çağırışa ehtiyac var
San Siro-da çətin mövsüm, meydanın kənarında isə daha da sərt sözlər. Rafael Leao artıq pərdəarxasında deyil, açıq şəkildə danışır. Portuqaliya millisinin hücumçusu Milan-dakı gələcəyini sual altına salan açıqlamaları ilə yay transfer pəncərəsinin gündəmini dəyişdi.
“Bu sistemdə fərq yarada bilmədim”
Leao Sport TV-yə müsahibəsində təkcə gələcəyi barədə yox, geridə qalan mövsümün içini də açdı. Sözlərini gizlətmədi, cümlələrindəki ton Milan-ın oyun modelinə qarşı dərin narazılığı göstərirdi.
“O, mövsüm çətin idi. 4-5 ay qasıq ağrısı ilə, üstəlik, mənim stilim olmayan mövqedə oynadım,” – deyə o, etiraf etdi. “Taktiki sistem mənə kömək etmədi. Fərq yarada biləcəyimi hiss edirdim, amma komandanın oynama tərzi məni bunu edə biləcəyim vəziyyətə gətirmirdi. Sonda bu, adamı tükəndirir.”
Leao-nun sözlərində həm fiziki, həm də psixoloji yorğunluq açıq görünür. Ulduz hücumçu, özünü komandanın oyun planında mərkəzi fiqur kimi deyil, sistemin içində sıxışıb qalmış bir detal kimi hiss edib.
Serie A-dan kənara baxış
Portuqaliyalı forvard artıq açıq deyir: Serie A onun üçün dar çərçivəyə çevrilib. O, İtaliya çempionatının dəyişdiyini qəbul edir, amma öz oyununun bu taktiki qəliblərdə tam açılmadığını düşünür.
“İtaliyada liqa inkişaf edir, amma mənim futbol stilim üçün Premier League və ya La Liga istedadımı və məni futbolçu kimi daha yaxşı göstərə bilər,” – deyə Leao bildirib.
Burada isə bir liqa xüsusi vurğulanır. O, tərəddüd etmir: İngiltərə variantı masaya gəlsə, cavabı bəllidir.
“Əgər Premier League-də oynamaq imkanı qarşıma çıxsa, çox xoşbəxt olaram: düşünürəm ki, istedadımı çox yüksək səviyyədə olan futbolçularla uyğunlaşdıra bilərəm.”
Bu cümlələr təkcə arzunu yox, həm də özünə inamı göstərir. Leao özünü Avropanın ən sürətli, ən fiziki, ən tələbkar liqalarından birində sınamaq istəyir və bunun üçün hazır olduğunu deyir.
İkinci hücumçu – gizli silah
Mövqe məsələsi Leao üçün təkcə taktiki detal deyil, karyerasının növbəti mərhələsini müəyyənləşdirən əsas xəttdir. Özünü illərdir cinah oyunçusu kimi tanıdan futbolçu, əslində fərqli rolda daha rahat olduğunu açıq şəkildə dilə gətirir.
“Karyeram boyu tez-tez ikinci hücumçu kimi oynamışam və düşünürəm ki, bu, mənim sevimli mövqeyimdir,” – deyə o, vurğulayıb. “False 9 kimi də oynaya bilərəm, xüsusilə Portuqaliya kimi komandada.”
Cinahda oynayanda, Leao-nun sözlərinə görə, qərar vermək üçün daha çox vaxtı olur: “Driblinqdən sonra düşünməyə daha çox vaxtım var – zərbə vurum, yenidən keçim, yoxsa ötürmə edim?”
İkinci hücumçu rolunda isə nəfəs almağa belə imkan yoxdur: “Qapıya daha yaxın oluram və daha konkret olmalıyam: ya assist edirəm, ya da zərbə vururam. Bu, üzərində işləməli olduğum bir detaldır. Axırda futbol rəqəmlərə əsaslanır və bu, məndə çatmayan son addımdır.”
Bu etiraf, onun öz oyununa tənqidi baxışını da göstərir. O, sadəcə sistemdən narazı deyil, həm də şəxsi statistikasını növbəti səviyyəyə qaldırmaq üçün məsuliyyəti öz üzərinə götürür.
Milan üçün xəbərdarlıq, Premyer Liqa üçün dəvət
Leao-nun sözləri Milan üçün sadəcə mətbuat səsi deyil, ciddi xəbərdarlıqdır. Klub keçid dövrü yaşayır, meydanda qeyri-sabitlik, tribunada suallar, indi isə ulduz hücumçunun açıq şəkildə “mənə yeni çağırış lazımdır” deməsi.
O, “Mən fərq yarada bilərdim” deyə təkrarlayır, amma bunun üçün uyğun mühitin olmadığını bildirir. Bu, həm də özünü başqa səhnədə təsəvvür edən futbolçunun səsi kimi gəlir.
İngiltərə və İspaniya klubları üçün isə bu müsahibə açıq siqnaldır. Leao nə istədiyini aydın deyir: daha sərbəst rol, daha sürətli futbol, daha yüksək səviyyəli rəqabət və ən əsası – oyununun tam dəyərini göstərə biləcəyi səhnə.
İndi sual sadəcə budur: bu çağırışı birinci kim eşidəcək – Premier League nəhəngləri, La Liga-nın zirvə klubları, yoxsa Milan son anda onu bu layihənin mərkəzinə qaytara biləcək?
