Real Madrid Rodri-ni itirdi: Mourinho-nun seçimləri
Real Madrid bütün yay boyu Manchester City-nin dirəyi Rodri-nin ardınca qaçdı, amma sonda ispan yarımmüdafiəçi ürəyini Barcelona-ya verdi. Keçid hələ baş tutmayıb, amma bir həqiqət artıq aydındır: Rodri üçün yarışdan Real Madrid rəsmən çıxdı.
Bu da Jose Mourinho-nu çətin, eyni zamanda həlledici bir seçim qarşısında qoydu. O, öz oyun fəlsəfəsini artıq müəyyənləşdirib: 4-2-3-1. Hücumçunun arxasındakı “10 nömrə” mövqeyi Jude Bellingham-a məxsusdur və bu, müzakirə mövzusu deyil. Dünya çempionatındakı performansı ilə həmin zonanı öz adına yazdırıb.
Amma onun arxasındakı iki mövqe? Tamamilə açıq savaşdır.
Valverde kapitan, Bernardo beyin
Federico Valverde-nin start heyətində yeri demək olar ki, betonlanıb. Mourinho-nun əsas fiqurlarından biri kimi qalır, üstəlik yeni mövsümdə kapitan sarğısını da o daşıyacaq. Uruqvaylı yarımmüdafiəçi yalnız qaçmır, meydanı “yeyir”. Liderlik, döyüşkənlik, taktiki elastiklik – Mourinho-nun mərkəzdə axtardığı hər şey onda var.
Onun yanında isə yeni bir favorit sürətlə yüksəlir: Bernardo Silva. Təbiətən daha hücumameyilli, kombinasiyalı oyunçu sayılsa da, portuqaliyalı ulduz hazırlıq oyunlarında daha dərin zonadan oyunu diktə edə biləcəyini göstərdi. Topu alır, ritmi təyin edir, pressinqdən çıxışı asanlaşdırır.
Rodri tipli klassik dayaqlı yarımmüdafiəçi profili tapılmadığı üçün Mourinho balansı başqa cür qurmağa çalışır. Bernardo-nu daha geridə, topa nəzarəti üzərinə götürən “saxta dayaq” kimi istifadə etmək planı masadadır. Risklidir, amma potensial qazancı böyükdür.
Kağız üzərində Valverde–Bernardo tandemi parlaq görünür. Amma kağızda qazanılan çempionat olmur.
Tchouameni və Camavinga üçün “ya indi, ya heç vaxt” mövsümü
Aurelien Tchouameni hələ tam hazır deyil. Xırda fiziki problemlər səbəbindən yay hazırlığına gec qoşuldu, amma o, bu rəqabətdə sadəcə iştirakçı yox, ciddi iddiaçı kimi gözlənilir. Profil baxımından Rodri-yə ən yaxın futbolçu məhz odur: mövqeyini qoruyan, duellərdə güclü, hava toplarında üstün.
Eduardo Camavinga isə tamam başqa hekayədir. O, hazırlıq görüşlərinin hamısına startda çıxıb, amma yenə də bir sual havada qalır: uzunmüddətli rolu nə olacaq? Keçən mövsüm ziqzaqlı keçdi – bəzən sol cinah müdafiəçisi, bəzən mərkəzdə, bəzən ehtiyatdan. İndi də pre-sezonu elə də inandırıcı alınmayıb ki, Mourinho onu planlarının mərkəzinə qoysun.
Bu ikili üçün qarşıdakı il həlledici ola bilər. Gəncdilər, istedadlıdılar, amma Real Madrid-də “potensial” sözü bir yerə qədər keçir. İndi sübut dövrüdür.
Arda Güler parlayır, amma Bellingham kölgə salır
Arda Güler hazırlıq dövrünün ən çox danışılan adlarından biridir. Texnika, yaradıcı paslar, cəsarətli driblinqlər – türk futbolçu özünü xatırlatmağı bacarıb. Amma Mourinho-nun planında o, hələ də əsasən “10 nömrə” kimi görünür.
Bu isə onu birbaşa Bellingham-ın arxasına qoyur. Yəni, start heyətində mərkəzə deyil, daha çox rəqabətə məhkum edir. Mourinho üçün Arda hazırda oyunun gedişatını dəyişmək üçün əla silahdır, amma mərkəzdəki strukturun sütunu yox.
Thiago Pitarch üçün gözlənilməz qapı
Gənc Thiago Pitarch da birinci komandanın gündəminə düşənlərdəndir. Rəsmi olaraq hələ də Castilla oyunçusudur, amma planlardan silinməyib. Yayın əvvəlində onun ayrılığı real ssenari sayılırdı. Rodri planının dağılması isə onun üçün başqa bir cığır açdı.
İndi o, geniş heyətin bir parçasıdır. Bu, az görünə bilər, amma Real Madrid kimi klubda belə fürsətlər çox nadir olur. Bir zədə dalğası, bir cəza seriyası – və birdən gənc ispan özünü Bernabeu-nun işıqları altında əsas rol üçün mübarizə apararkən görə bilər.
Mourinho-nun əsas imtahanı: adlar yox, balans
Mourinho-nu gözləyən ən böyük sınaq sadəcə “ən yaxşı iki adı” seçmək deyil. Məsələ odur ki, hansı ikili və ya üçlük komandanın bütövünü taraz saxlayacaq.
Valverde–Bernardo cütlüyü topa nəzarəti və dinamikanı maksimuma qaldıra bilər, amma müdafiə keçidlərində kim arxanı sığortalayacaq? Tchouameni tam formaya qayıdanda onu kənarda saxlamaq nə qədər realdır? Camavinga özünü bir mövqedə sabitləşdirə biləcəkmi? Arda Güler Bellingham-ın kölgəsindən çıxa biləcəkmi?
Real Madrid yayda Rodri-ni itirdi. İndi isə sual başqadır: Mourinho öz Rodri-siz orta xəttini elə qura biləcəkmi ki, ispan ulduzun yoxluğu uzunmüddətli perspektivdə əhəmiyyətsiz detallardan birinə çevrilsin?
