Roma Manu Kone-ni saxlamağa yaxınlaşır: Manchester City üçün qapı bağlanır

Yay transfer pəncərəsi boyunca Manu Kone adı ətrafında sanki növbə yaranmışdı. Manchester United, Chelsea, Arsenal, Manchester City – hamısı Roma-nın yarımmüdafiəçisinin adının ətrafında dolanırdı. Hər həftə yeni iddia, yeni istiqamət.

İngiltərə mətbuatının son dalğası diqqəti xüsusilə Manchester City-yə yönəltmişdi. Rodri-ni itirən, Nico Gonzalez-i də itirə biləcək Pep Guardiola-nın komandası üçün Kone ideal hədəf kimi göstərilirdi. Lakin bu ssenari indi getdikcə uzaqlaşır.

Corriere dello Sport-un məlumatına görə, Roma rəhbərliyi fransalı yarımmüdafiəçini Stadio Olimpico-da saxlaya biləcəyinə getdikcə daha çox inanır. Klub mövqeyini sərtləşdirib: Kone-ni almaq istəyən hər kəs təxminən 55 milyon avro ödəməlidir. Və bu məbləği hazırda heç kim masaya qoymağa yaxın görünmür.

Roma iyunda Kone-nin satış variantını ciddi şəkildə nəzərdən keçirmişdi. Səbəb aydındır – Financial Fairplay çərçivələrində qalmaq üçün gəlir lazımdır. Amma o vaxt belə, xüsusən İngiltərədən, konkret, rəsmi təklif gəlmədi. Yeganə real addımı Atletico Madrid atdı, amma ispanların təklifi Roma üçün kifayət qədər cəlbedici hesab olunmadı. Klub, xüsusən də Kone-nin çox güclü keçən Dünya Çempionatı fonunda, onu ucuz qiymətə buraxmaq niyyətində deyildi.

İndi isə tablo dəyişib. Roma daxilində əhval-ruhiyyə xeyli müsbətdir. Klubda hesab edirlər ki, Kone-ni saxlamaq şansı əvvəlkindən qat-qat yüksəkdir. Çünki Manchester City artıq diqqətini başqa, daha bahalı hədəflərə – Enzo Fernandez və Ayoub Bouaddi kimi adlara yönəldib. Bu da Roma üçün təzyiqi azaldır, danışıqlar masasını isə faktiki olaraq boşaldır.

Yay boyu gedişi müzakirə olunan Manu Kone üçün vəziyyət tədricən aydınlaşır: Roma onu layihənin mərkəzinə yerləşdirməyə hazırdır. İndi sual başqadır – bu komandanın ambisiyaları, Kone-nin ambisiyalarına nə qədər cavab verəcək?