Rooney: Tuçeli dəyişmək üçün yalnız Pep əlçatan olmalıdır

İngiltərə yığmasının Argentina ilə dramatik yarımfinal məğlubiyyətindən sonra müzakirələr sakitləşmir. 1:0 öndə olduğu oyunu 1:2 uduzan komanda, indi yalnız meydanda deyil, kənarda da təzyiq altındadır. Hədəfdə isə baş məşqçi Thomas Tuchel var.

Amma keçmiş kapitan Wayne Rooney tələsik “inqilab” tərəfdarı deyil. Onun fikrincə, Tuçeli postundan tərpətməyə dəyərsə, bu yalnız bir şəraitdə mümkündür – əgər Pep Guardiola əlçatan olsa.

“Ya Tuchel, ya Pep”

Rooney, “The Wayne Rooney Show” verilişində mövqeyini açıq qoydu. O, əvvəlcə bazara baxdı, sonra da aydın xətt çəkdi:

“O an üçün başqa heç kimi görmürəm, yalnız gedib Pep Guardiola-nı gətirə bilərsiniz. Əgər Pep münasibdirsə, bəlkə də onu gətirməlisiniz”.

Runi Tuçelin səviyyəsini də kiçiltmir. Onun üçün bu, “ya yaxşı, ya da daha yaxşı” seçimidir:

“Düşünürəm ki, o, ən yüksək səviyyəli məşqçidir və ən yaxşı məşqçilərin etdiyi budur: səhvlərindən öyrənirlər, inkişaf edirlər, daha güclü olurlar”.

FA, çərşənbə günü Argentina ilə yarımfinalda alınan 1:2 hesablı məğlubiyyətdən sonra da Tuchelə dəstəyini rəsmən saxladı. Alman mütəxəssis tənqid atəşinə, xüsusilə də son dəqiqələrdəki əvəzetmələrinə görə tuş gəlsə də, özü açıq şəkildə qalmaq və komandanı Euro 2028-ə aparmaq istədiyini bildirib.

Runi isə bu nöqtədə sualı başqa cür qoyur: əgər indi qurban verilsə, əvəzində kim gələcək?

“Əgər biz onu işdən çıxarsaq, hansı məşqçini gətirəcəyik? Məncə, hazırda bazarda Thomas Tuchel qədər yaxşı heç kim yoxdur, Pep Guardiola istisna olmaqla”.

Dünya çempionatının “dərsi”

Rooney-nin əsas iradı taktiki deyil, təcrübə ilə bağlıdır. O, Tuçelin ilk dünya çempionatında yaşadığı çətinliyi Fabio Capello dövrü ilə müqayisə edir:

“Onun üçün böyük məsələ odur ki, dünya çempionatlarında təcrübəsi yoxdur. Eyni şeyi [Fabio] Capello ilə də yaşamışdıq. Dünya çempionatı tamam başqa mühitdir, onu hiss etməlisən, yaşamalısan. İndi isə artıq bunu yaşadı”.

Tuchel yanvar 2025-də 18 aylıq “missiya” ilə – dünya çempionatını qazanmaq tapşırığı ilə – təyin olunmuşdu. Fevralda isə müqaviləsi daha iki il uzadıldı. Yəni FA, turnir başlamazdan öncə ona uzunmüddətli etimad göstərdi.

Maraqlısı budur ki, həmin təyinatdan əvvəl FA-nın ilk hədəfi məhz Guardiola idi. Hətta məlumatlara görə, tərəflər arasında şifahi razılaşma da olub. Sonunda stul Tuchelin payına düşdü, amma Pep adı bu vəzifənin kölgəsindən heç vaxt tam çıxmadı.

“Əvvəlcə ‘kubok’, sonra iki illik müqavilə” paradoksu

Rooney, Tuçelə yeni müqavilə verilməsi qərarını da azacıq istehza ilə qarşılayır. Onun fikrincə, FA-nın qoyduğu hədəflə atdığı addım bir-birinə tam oturmur:

“Düşünürəm ki, FA bizə dedi: Thomas Tuchel gəlir ki, dünya çempionatını qazansın və bizi növbəti səviyyəyə qaldırsın. Əgər prioritet dünya çempionatını qazanmaq idisə, onda turnirə getməzdən əvvəl ona iki illik müqavilə vermək bir az qəribədir. Bu, bir az anlaşılmazdır”.

Bir tərəfdə yarımfinalda əldən çıxan final şansı, o biri tərəfdə isə artıq dadılmış, amma indi daha yaxşı tanınan dünya çempionatı mühiti. FA indi bu iki tərəziyə baxmalı olacaq: səhvlərindən dərs alan, artıq turnirin “havasını” duyan Tuchelə yenidən güvənmək, yoxsa hər şeyi sıfırlayıb yalnız bir ad üçün – Pep Guardiola üçün – hərəkətə keçmək.

Və əsas sual budur: İngiltərə bu nəsli riskə atacaq qədər cəsurdur, yoxsa mövcud kursu qoruyub, son zərbəni eyni məşqçi ilə vurmağa çalışacaq?