Salahın U-dönüşü: Liverpoolun Gələcəyi Nəyə Bağlıdır?
Salahın “U-dönüşü” ssenarisi: Slot getsin, qalsın?
Liverpool üçün 2025/26 mövsümü bir kabusa çevrilib. Keçən mövsümün çempionu olan klub bu dəfə titulunu qorumağa cəhd belə etmədən, zəif, ruhsuz və dağınıq təsir bağışlayır. Tənqidlərin mərkəzində isə iki ad var: Mohamed Salah və baş məşqçi Arne Slot.
Bir vaxtlar komandanın hücum ürəyi sayılan Salahın oyunu kəskin şəkildə aşağı düşüb. Təkcə o yox, demək olar, bütün heyət eniş yaşayır, amma misirli ulduzun adı həmişə daha gur səslənir. Slot isə nə nəticə, nə də oyun üslubu ilə inandıra bilib. Komandanın kimliyinə yad görünən taktikalar, ağır və boğucu futbol, üstəgəl 20 məğlubiyyət – tribunalar da, soyunma otağı da bu yükü hiss edir.
Bu gərgin fonun içində Salahla Slotun münasibəti də çat verib. Bir neçə dəfə hücumçunun iyerarxiyada geriyə atılması, ehtiyatda qalması, meydanı vaxtından əvvəl tərk etməsi açıq narazılıq doğurub. Nəhayət, yayda müqaviləsinin bitməsi ilə Salahın azad agent kimi klubdan ayrılacağı elan olundu və hər kəs bunu qaçılmaz son kimi qəbul etdi.
Amma hekayə hələ bitməyib.
Salahın şərti: rejim dəyişməlidir
The Athletic-in məlumatına görə, Salah qapını tam bağlamayıb. Misirdə ona yaxın olan bəzi şəxslər sakit-səssiz şəkildə deyirlər ki, ulduz hücumçu bütün açıqlamalara baxmayaraq, Liverpool-da qalmaq ideyasından tam imtina etməyib.
Burada isə əsas detal ortaya çıxır: Salahın fikrini dəyişməsi üçün klub daxilində “rejim dəyişikliyi” lazımdır. Yəni söhbət təkcə Arne Slotdan getmir, amma başlanğıc nöqtəsi məhz odur.
Xəbərə görə, Salahın komandada qalıb-qalmamasını müəyyənləşdirəcək ssenari belədir: Slot yola salınmalı, onun arxasında dayanan və ona güvənən əsas idman rəhbərləri də klubdan ayrılmalıdır. Həm baş məşqçi, həm də həmin direktorların müqavilələrinin bitməsinə təxminən bir il qalır. Yəni bu, sadəcə taktiki yox, struktur səviyyəsində dəyişiklik tələb edən addımdır.
Misirli ulduz son günlərdə açıq şəkildə Slotun futbol fəlsəfəsini hədəfə alıb. O, daha aqressiv, sürətli, riskli, bir vaxtlar klubla sinonimə çevrilmiş “heavy metal” hücum futbolunun geri dönməsini istəyir. Mövcud komanda isə bu tələbdən çox uzaqda görünür.
FSG tərəddüd edir, amma hələ ki, Slotun yanındadır
Cümə günü Aston Villa qarşısında alınan məğlubiyyətdən sonra Salahın sərt açıqlamaları yalnız tribunaları deyil, klub rəhbərliyini də silkələyib. TEAMtalk-ın məlumatına görə, FSG daxilində Slotun gələcəyi ilə bağlı yenidən düşünmə prosesi başlayıb, dörd mümkün namizəd masadadır.
Amma tanınmış jurnalist Fabrizio Romano-nun son açıqlaması başqa mənzərə cızır. Onun sözlərinə görə, hazırda klub sahibləri və idarəçilər hələ də Slotun arxasındadır, onu dəstəkləyir və inamlarını itirməyiblər. Romano vurğulayır ki, bu mövsüm nəticələr bərbad, oyun keyfiyyəti aşağı, 20 məğlubiyyətlə Liverpool üçün “çox mənfi” keçsə də, rəhbərlik hələ qəti dönüş nöqtəsinə gəlməyib.
Ən diqqətçəkən detal: indiyə qədər Liverpool nə Xabi Alonso, nə də başqa bir məşqçi ilə rəsmi təmas qurmayıb. Yəni klub hazırda alternativ axtarışını real danışıqlara çevirməyib, kağız üzərində ssenarilər səviyyəsində saxlayır. Səbəb aydındır – FSG hələ də Slotun layihəsinə şans vermək niyyətindədir.
İki U-dönüş, bir klubun taleyi
Beləliklə, Anfield-də paradoksal vəziyyət yaranıb. Bir tərəfdə qalmaq üçün “rejim dəyişikliyi” tələb edən Salah. Digər tərəfdə inamını itirmədiyini göstərməyə çalışan, amma təzyiq altında olan FSG və Slot. İki mümkün U-dönüş ssenarisi üst-üstə düşür, amma eyni anda reallaşmaları çətin görünür.
Əgər FSG Slotu qorumaqda israrlı olsa, Salahın Liverpool hekayəsi çox böyük ehtimalla bu yay bağlanacaq. Əgər tribunaların səsi, nəticələrin ağırlığı və ulduz futbolçunun mövqeyi üstün gələrsə, o zaman Slot və onu dəstəkləyən direktorlar üçün qapı açıla bilər – bu halda Salah üçün yeni müqavilə masaya qayıda bilər.
Liverpool illərlə kimliyini hücum fəlsəfəsi, meydandakı enerjisi və ulduzlarının klubla qurduğu emosional bağla qorudu. İndi isə sual budur: Anfield bu kimliyi qorumaq üçün kimi seçəcək – baş məşqçini, yoxsa meydanın ikonunu?
