Scholes Arteta-ya Zubimendi ilə bağlı sərt mesaj verdi

Manchester United əfsanəsi Paul Scholes, Arsenal-ın yay transfer planına açıq şəkildə meydan oxuyub. Onun fikrincə, London klubu bu yay yanlış futbolçunu qapıya göstərməyə hazırlaşır.

Söhbət 19 yaşlı Myles Lewis-Skelly-dən gedir. Akademiyanın parlaq yetirməsinin Premyer Liqa rəqiblərinə satıla biləcəyi xəbərləri dolaşdığı bir vaxtda, Scholes hesab edir ki, əslində sual altına alınmalı olan, Mikel Arteta-nın səs-küylü transferlərindən biri – Martin Zubimendi-dir.

“Mən mərkəzdə Lewis-Skelly-ni Zubimendi-yə üstün tuturam”

Sky Bet-in təqdim etdiyi “The Overlap Fan Debate” verilişində danışan Scholes tərəddüd etmədən mövqeyini ortaya qoyub:

“Mən mərkəz yarımmüdafiədə Lewis-Skelly-ni Zubimendi-yə üstün tuturam. Məncə, Zubimendi ötən mövsüm çətinlik çəkdi. Əgər bir futbolçudan qurtulmalı olsanız, bu, o olar.”

Scholes bununla kifayətlənməyib, klubun öz yetirməsini itirməsinin mədəniyyətə vuracağı zərbəni də önə çəkib. Onun üçün məsələ təkcə taktika və ya keyfiyyət deyil, kimliyi qorumaqdır. Akademiya oyunçusunun kənara itələnib, yerinə kənardan gətirilən, üstəlik daha yüksək tavanı belə olmayan transferin önə çəkilməsi – Scholes-un futbol fəlsəfəsinə tam ziddir.

“Bu, mənə Danny Welbeck-in gedişini xatırladır”

Keçmiş yarımmüdafiəçi sözü birbaşa öz təcrübəsinə gətirib, Manchester United-in illər əvvəl hücumçusunu Şimali Londona satdığı qərarla paralel aparıb:

“Bu, mənə bir az da Danny Welbeck-in Manchester United-dən gedişini xatırladır. Ondan zəhləm gedirdi, xoşlamırdım. Bəli, Danny Myles Lewis-Skelly-dən bir az yaşlı idi, amma öz oyunçularını itirəndə bu, məyusedicidir.”

Scholes-un mesajı aydındır: Arteta-nın komandasında ilk növbədə sual altına düşməli olan, klubun içindən çıxan gənc deyil, artıq formalaşmış, bahalı transferdir.

Carragher də çaşqındır: “Hələ də inana bilmirəm”

Bu mövzuda tək narahat səs Scholes deyil. Liverpool əfsanəsi Jamie Carragher də Arsenal-ın Lewis-Skelly-ni ölkə daxili rəqiblərə təklif etməsi iddialarını anlamaqda çətinlik çəkir.

Həftənin əvvəlində yayılan xəbərlərə görə, “topçular” gənc yarımmüdafiəçini Chelsea və Manchester United-ə təklif ediblər. Carragher üçün bu, məntiqi izahı çətin olan addımdır – xüsusilə də Lewis-Skelly-nin artıq Avropa səhnəsində göstərdiyi performans fonunda.

Carragher sualı birbaşa qoyub: “Sizcə, bu, onun tərəfi idi, yoxsa klubun? Məni çaşdıran da elə bu idi. Elə bil Arsenal Myles Lewis-Skelly-ni Manchester United-ə təklif etmişdi. Bu, Myles Lewis-Skelly-nin ‘mən getmək istəyirəm’ deməsi, ya da onun komandasının nəsə ortaya atması deyildi. Şok da buradan gəldi. Hələ də inana bilmirəm.”

O, tərifini davam etdirərək, bu yaşda həmin səviyyədə oynamağın necə nadir istedad tələb etdiyini vurğulayıb: “Bu yaşda o səviyyədə oynaya bilməzsən, əgər həqiqətən xüsusi deyilsənsə. Bütün gənc oyunçuların eniş-yoxuşları olur. Ötən mövsüm, yəqin ki, özü də istədiyi qədər oynamadı.”

Carragher-in xətti də Scholes kimi aydındır: belə profilli gənci rəqibə itələmək, xüsusən də daxili rəqiblərə, ağır riskdir.

Arteta-dan diplomatik cavab

Təzyiq artdıqca, diqqətlər Mikel Arteta-ya yönəldi. İspan mütəxəssis isə, gözlənildiyi kimi, açıq qapı buraxmadan, amma heç nəyi də tam inkar etmədən cavab verdi.

Həftə ərzində Lewis-Skelly-nin gələcəyi barədə soruşulduqda, Arteta qısa danışdı: “Mən heç bir şayiə barədə danışmayacağam. Əgər oyunçularımız haqqında şayiə varsa, bu, yaxşı işarədir.”

Nə təsdiq, nə təkzib. Sadəcə, gənc futbolçunun adının bazarda hallanmasının, onun dəyərinin və profilinin yüksəldiyini göstərən bir siqnal kimi təqdimatı.

İndi isə sual havada asılı qalıb: Arsenal bu yay öz akademiyasının növbəti ümidini rəqiblərinə həvalə edəcək, yoxsa Scholes və Carragher-in xəbərdarlıqları klubun qərar otaqlarında səs tapacaq?